ای مقدس مسکنیم، ای شانلی آذربایجان!
بیز سنینله فخر قیللیق یئر اوزونده هر زامان.
قوی وار اولسون ای وطن، اصلان صفت اوغلانلارین!
اؤپسون آلنیندان آنا! اونلار سنین، سن اونلارین.
***

سیل گؤزندن آخان یاشی!
سن آغلاسان من آغلارام.
گؤینر اوره‌یمین باشی،
سن آغلاسان من آغلارام.

سن گولنده چمن گولر،
قرنفیل، یاسمن گولر،
ائل‌لر گولر، وطن گولر،
سن آغلاسان من آغلارام.

گولوش دوداغین اؤپنده
سئوینجه دولارام من‌ده؛
ایکی روحوخ بیر بدنده،
سن آغلاسان من آغلارام.

آیدیندیر آغلایان گوزون،
ایچینده‌کی اوره‌ک سؤزون،
قوی من دئییم سؤزون دوزون:
سن آغلاسان من آغلارام.

سنسن منیم آرخام، ائلیم،
سنسن اؤتکم شیرین دیلیم؛
سن اولماسان سینار بئلیم،
سن آغلاسان من آغلارام.

گول قوی بوتون دنیا گولسون!،
گول سئوینسین، صحرا گولسون،
غمدن دولان «شیدا» گولسون،
سن آغلاسان من آغلارام.