ایکی شعر
عدالت دومان
سون گول
اوزاقدان او کؤورک سسینی دویدوم
دئدیم بس آدیمی چاغیردی سسین!
سوسوزدان سارالمیش چمن کؤنلومه
نارین یاغیش ایدی یاغیردی سسین!
نارزان بولاق کیمی سیزمیش قایادان
دوم دورو آرینمیش هر بیر بویادان
سحر مئهی کیمی منی اویادان
گونومه آیدینلیق اوغوردو سسین!
پاییز دومانیندا تیتره‌ین سون گول
منیم اوره‌ییمدی سئوگیده اؤنجول
گلرسه شئح اوسته ایشیقدان یونگول
گلمزسه داغلاردان آغیردی سسین!
گولوش
گولوش گوله خوش یاراشیر
گولوم گوله گوله دانیش!
قوی یاییلسین نفسینله.
عطیر گولدن گوله دانیش!
من قلبینه گولله دولان،
سنسه قوینو گولله دولان
گولله گزیب گولله دولان
گولدن اؤیرن گوله دانیش!
هئی سن دئییب قارا باخدیم
دؤندو بوزا قارا باختیم
بیرجه دفعه قارا باختیم
بلکه اوزه گوله دانیش!
