چالیش قلم
فاطمه ذلفی
چالیش قلم
چالیش قلم،
آلیش اوره‌ک،
ایستییرم شعر یازام
سیخیلان دویغولارین بندین آچام
توتولان ماهنی‌لارین گؤنلون آلام
قووولان آرزولارا سئوگی قاتام
بوکولن سؤزلریمین بوغچاسینا
ال آتام کلمه تاپام
بیرجه- بیرجه قوشما- قوشام
سطیر -سطیر شعر یازام
قویما منی باخا- باخا
اغیار الی ایزیم یاخا!
چالیش قلم
آغ کاغیذین کوله‌یینه دولاشمیشام
درین -درین خیاللارلا یاناشمیشام
یاساقلانیب دیلیم، ایچیمده یانمیشم
آ ل-وئر اوسته یامان کؤکده بویانمیشام
قویما گونوم بئله بیته
قازانجلاریم الدن ایته!
چالیش قلم
زامان گوجو، قاچار آ ت‌دیر
یهرسیزدیر، قوشوب چاپیر
داشدا نالی اود اوینادیر
یئره گؤیه نازین ساتیر
یئله سئله تپیک آتیر
قویما بیزی ازیب گئچه
ایللر أوته، نئچه-نئچه!
چالیش قلم
چالیش قلم
قاتیل یولا
جان آت،سؤزو جانا دولا
شعره، سؤزه، سئوگی جالا
آ ستا-آ ستا،بالا-بالا
یازی اوستن یازی قالا
یاز اؤلکه‌مین داغین، داشین
قالالارین اوزون یاشین
مئشه‌لرین یاشیل باشین
ایگیدلرین زور ساواشین
قویما بیزی آ ل اویدورا
چای-چمنه چادیر قورا !
چالیش قلم
ایستییرم یازام،بیلم
کلمه-کلمه دیله گلم.
اوندان أونجه دوشوب اؤلم،
چالیش قلم
چالیش قلم.
