شعرلر
اسماعیل سولغون
(۱)
اوره‌ییم یوخسول ایدی
آج ایدی، سوسوز ایدی
دیر‌ندیم
دیلنمه‌دیم
سنی گؤردوم
سنین وارلیغینی دویدوم
ایندی اوره‌ییم
سندن ده وارلی‌دی.
(۲)
بوگونکو باخیشلارین
گؤرمه‌دیگیم شهرلر قده‌ر
یئمه‌دیگیم یئمک‌لر قده‌ر
اوخومادیغیم-
و یازمادیغیم کیتابلار قده‌ر
یاددیر، اؤزگه‌دیر،
اؤگئی‌دیر منه.
(۳)
من یازی سئورکن
پاییز قیسقانیر
من یایدا گونشله یانارکن
قیشین باغری چاتلاییر.
پاییزدان
ازیلمیش بیر یارپاق،
قیشدان سنی آلدیم
هر ایکیز سولدونوز
سولدونوز
منی سولدوروب
گونشه حسرت قویدونوز
یازا حسرت قویدونوز.
سیزه الوداع دئیه‌جم
سیزدن قاچیب
گونشه دوغرو قاچاجام.
(۴)
اوردان
دمشقین-
یانان دووارلارینین
پیچیلتیسی گلیر.
بوردان
تهرانین-
کار قولاغی‌نین،
آچیلمامیش سحری دیسکینیر.
بو جیندا مئیداندا:
اوردان مئییت‌لرین-
بیری اؤلو
بیری دیری چیخیر.
بوردا
هچ بیر دیری‌نین
صاباحا اومیدی یوخدو.
صاباح هله اویانماییر، یوخویا دوام ائدیر
و قارانلیق اویاق قالیر.
