او حسرتدن(تورکمنلره)
کیان خیاو

منه ده بیر یئر آچین اوردا
قول- بوداق آچماغیم توتموش.
بیلیرم
دیدرگینجه‌سینه بوی آتیر کولک‌لر اوردا
دیدرگینجه‌سینه ایلیشیر دمیر بارماقلیق‌لارا.
اوردا خوریات‌لاردا نه درد وار بیلیرم
بیلیرم “او یار آیدان
شیریندی او یار آیدان.
قورخوم وار اؤلوم گئدیم
او حسرت او یارایدان.”
او حسرت، او یارایدا بیر یئر آچین منه ده
او بایراغین سونسوز ماوی‌لییینی بزه‌ین
بئینیمده بیتمک بیلمه‌ین ایمگه‌لرین آنلامیندا.
بیر خویرات داها سؤیله‌یین
آلدیغیم دادلار درد اولوب دوشسون جانیما سینسین!
آخ، “کرکوکون آلتی خرمن”
منه ده بیر یئر آچین اوردا
قویلانماغیم توتموش آرتیق.
گونباشی بیر سس اوخشاسین روحومو:
آهای، یانمیش خرمن‌لری ساتیریق
تؤر- تؤکونتو خویرات‌لاری آلیریق!
آهای، قیریق- ساریق اومودو، اوره‌یی، یوردو اولانلار!
آهای وطندن وطنه غریب قوناق اؤلولر!…
۱۳۹۳/ ۱۱/ ۲۰ (۲۰۱۵)