ایکران آغاراندان
افراسیاب نوراللهی

ایکران آغاراندان، قارالیر گونوم
قارالیر، ایکران قارالانادک
ایکران قارالاندان، باشلاییر گونوم
باشلاییر بیر داحا آغارانادک

باخ بودور بیر عؤمرون ایکران طالعی
باخ بودور بیر عؤمرون نیگران طالعی
باخ بودور بیر عؤمرون
بیر خالقین باغیران،
هایکیران طالعی

ایکران آغاردیمی،
باشلاییر تحقیر
باشلاییر قاداغا،
باشلاییر تدبیر؛
باشلاییر دانیلما، دانما پروسه‌لری بیربیر…

او اؤز خولیالاریندا،
منی قورتارمادا
آنجاق من،
“ko gito so ergo sum ” یانی،
من یاشییرام، دئملی وارام دئییل؛
من دانیلیرام، دئملی چوخ بؤیوک بیر وارلیغام-دئیه،
بیر داحا باشلانمادا…

                                                    ۵/۱۲/۱۳۸۹