آذربایجان
رضا نقی‌زاده(اوزان)
وطن تورپاغینا جـــــان قوربان اولسون
کی هر شئی‌دن شیرین اینسانه جاندی.
بورا بابک‌لــــــــــــرین اودلار دیاری
وطن تورپاغی آذربایجاندی.
بو داغ داش کی بوتون قانـــه بویانمیش
شهیدلر قانی هر یئرده جــــــالانمیش
بو کی ظالیم‌لره قارشی دایانـــــــمیش
شهیدلر داغی آذربایجاندی.
او کی مشروطه بایراغین اوجالتــدی
او کی وار دؤره‌سینده مین بیر آتلی
او کی آزاده‌لیک‌ده آد چیخارتــدی
اونون قونداغی آذربایجاندی.
گؤزه‌ل فرشی یمن‌دن چینه چاتدی
هونر دونیاسینی عرفانــــــه قاتـــدی
او کی شعر و ادبده آد چیخارتــدی
هونر قایناغی آذربایجاندی.
گؤره ظولم و ستم وار ایرانینــــــــدا
گئچر باشدان دورار مظلوم یانینـــدا
اونون غئیرت، شهامت وار قانینـــدا
شرف بایراغی آذربایجاندی.
ایگیـــــــد آزاده‌لر بوردا بوی آتدی
یاشار بوردا کوراوغلی تک قیر آتلی
یاتان میللت‌لری تبریز اویاتدی
رشادت داغی آذربایجاندی.
«اوزان» فخر ائیلیر آذربایجانیم وار
وطن یوخ لعل و گوهر مرجانیم وار
اونا لاییق اولان تک بیر جانیم وار
کی جان اورتاغی آذربایجاندی.
خرداد ۱۳۹۴
