سنسیزلیک‌لر(۱۴)
مجتبی نهانی
(۱)
هاردان باشلاییب
هاردا بیته‌جک
بو قارا دلی‌لیک
سس‌سیزجه یالقیزلیقیما-
بورونموش باخیشلارین
(۲)
قاچماغین یاریسیندا
قالماق-
آیاقلاریمدان یاپیشدی
یئره میخلاندیم
گؤزون،
چیرپدی منی
(۳)
سسینده،
زامان گؤزه گلمیر
گونلر، آیلار، ایللر
سس‌سیزجه، سئوینجله یاشاییرلار
سسینده هر نه وارسا،
یاشاماغی گؤزللشدیریر…
(۴)
آغلاماغا آمان وئرمیر کی-
گؤزلرین
دوداقلارینا سپیلیبدیر-
گولمک
نه گؤزل یاراشیر
سنله یاشاماق، یاشلانماق
(۵)
دلی بیر دمیر یولویام
کیمسه‌سیز دوراقلاردان
کئچیرم
سندن اوزاقلاشماقدان
قورخورام
آمان، یامان گؤیوندن دوشموشم
هئی باخ
قانادسیز اوچموشام
(۶)
باغلا بئلیمه
زامانسیز دویغولاریمی
هردن بیر
سن یوخکن
توتوم اونلاردان
دوشمکدن قورخورام!
(۷)
داشی یونتالادین
من چیخدیم
بیر خوش گلدین یوخ مو؟
