مارالیم!
کیان خیاو

بو وطندیر، بئله نارسیز- ناناسیزدیر، مارالیم!
بو دا غوربتدی،قرنفیل-قاناسیزدیر،مارالیم!
ائللرین وار یوخو بوردا تالانیب….اسره مرم!
بو وئران دونیا،موزئی مئیخاناسیزدیر، مارالیم!
داها هاردان گله‌جکسن؟ بئله کی تورپاق ائویم
قاپی سیز،پنجره سیز،آستاناسیزدیر، مارالیم!
تاپشیریب تورپاغا چوخدان خینالی ال‌لریمی
آنامین بیرچه‌یی چوخدان خیناسیزدیر،مارالیم!
آرادیم گوز یاشیمی،تاپمادیم ایتگین‌لریمی
بو دنیز، آینا ملک‌سیز، سوناسیزدیر، مارالیم!
و بو یوللار توخونا بیلمه‌یه‌جک بیر- بیرینه
کیرکی‌سیزدیر، هه‌وه سیزدیر، هاناسیزدیر، مارالیم!
ائله بیر گون کیمی چیخ قارشیما، زاغ-زاغ اسه‌لیم!
چن-دومانسیزدی بو داغ، فیرتیناسیزدیر، مارالیم!
آه اوونمور اوره‌ییم، سال بونو بیر ساز دؤشونه
بو اوشاق هم آتاسیز، هم آناسیزدیر، مارالیم!
کیانام! باغریما غوربتلی تیکان‌لار سوواشیب
بو وطندیر! بئله نرگیز- ناناسیزدیر مارالیم!