قلبیم پیچیلداییر
منی تشویق ائدیر هر آن.
دائیم قولاقلاریمدا آچیر یایلیم آتشی
ظولمتده غرق اولان گئجه‌نین اؤرتویون گؤتور
تا چاغلایا گونشین نور چشمه‌سی
ایلکین سحرده باشلایا بولبول ترانه‌سی
هم سئیره نغمه‌سی
هر گون قیزیل زمی‌لردن اسن کولک
قوی زولفون اوخشایا ساری سونبول‌لو بوغدانین
گول عطری ایله دولدورا دونیانین هر یانین.
***
قلبیم دنیز کیمی، سپه‌لندیکده هر زامان
سایسیز اومید دالغاسینی ساحیله یاییر
گؤزلرده انتظاریم اؤپور آل شفق یئرین
مین احتراص ایله اوره‌ییم لحظه‌لر ساییر؛
قویسون اوفوق کامانینا فجرین ایشیق‌لارین
گورشاد یاغیش کیمی تؤکسون نور اوخلارین
ظولمتده غرق اولان گئجه‌نین
یارسین اؤرتویون
تا آغ گولوشله رنگ آلا مشرق اوفوق‌لری.
***
ایلکین سحرده نرگیز آچاندا خومار گؤزون
افسانه گؤیلرینده گزر شن باخیش‌لاری
رسّام کیمی گونش ده آلیب فیرچاسین اله
آلتون بویاغی‌لا چکیر الوان ناخیش‌لاری
یعنی کی، گول گولور و طبیعت بزک‌لنیر
چؤل‌لر چیچک‌لنیر،
آچ گؤزلرین دان اولدوزوم،
ای صبح روشنیم!
الوان چیچک‌لر ایله بزه‌ندیکده کؤشنیم،
شعریم، شعوروم اویانسین دئیه بیر آن
ظولمتده غرق اولان گئجه‌نین اؤرتویون گؤتور
قوی چاغلاسین گونشین نور چشمه‌سی.
(۱): آذربایجانین تانینمیش شاعر، یازیچی، ادبیاتشناس و دیلچی عالیمی احمد شایا (آلاو) ۱۳۰۴ینجی ایلده خوی شهرینده دونیایا گؤز آچمیش و تام بیر انسان عؤمرونو یالنیز آذربایجانجا- فارسجا و فارسجا- آذربایجانجا سؤزلوک(۹۰ مین سؤز و ایضاحلاری) یاراتماغا صرف ائتمیشدیر. آذربایجانیمیزین بو مبارز اوغلو آزادلیق و ملی مدنیت اوغروندا ائتدیگی اجتماعی و سیاسی فعالیت‌لری و اوتوزونجو ایللرده گیزلی صورتده نشر اولان “آذربایجان” روزنامه سی‌نین یازیچیلار هئیتیندن اولدوغو اوچون نئچه ایللر عؤمرونو زندان و سورگونلرده کئچیرمیشدیر. احمد شایا عؤمرونون سون گونلرینه قده‌ر ادبیاتیمیزدا یورولماق بیلمه‌ین بیر صنعت فداییسی کیمی حضورو اولموشدور. او بیر چوخ کتابلارین، ادبی تدقیق‌لرین و یوزلر مقاله‌لرین موللیفی اولموش و چاپ اولونموش اثرلریندن: حیدربابادان شهریارا مکتوب، بابک منظومه‌سی، گونشلی گونلر، آیسیز گئجه‌لر، ادبیاتشناسلیغا دایر مقاله‌لر توپلوسو اوچ جیلدده، آذربایجان دیلینین فونئتیکاسی، خواجه نصیر طوسی، قادینلار شهری و بیر سیرا دیگر کتاب و تدقیق‌لری آد آپارماق اولار.
اوستاد احمد شایا عؤمرونون سون ایللرینده ساهر ادبی مدنی درنه یی‌نین آغ‌ساققالی کیمی فعالیت گؤسترمیش و درنه‌یین دیگر عضولرینه یول گؤسترن اولموشدور. ۱۳۸۳ینجی ایلده کرج شهرینده وفات ائتمیش و اؤز دوستلاری و شاگردلرینین مشایعتی‌ایله سون منزیله یولا سالینمیشدی. اونودولماسین دئیه، خاطره سینی عزیز ساخلاماق اوچون اوستادین بیر شعرینی سیز عزیز اوخوجولارا تقدیم ائتدیک.
2 پاسخ
Ba bozorge mane delam barash yek Zare shode hamine ke mesle unam man ba omidvaram jaye babaozorgamo man Por konam kheili delam tang shode barash
عولو تانریدان بو مبارز یازار و شاعیریمیزه رحمت آرزولاییرام و امید ائدیرم کی دیگر یازارلاریمیز و شاعیرلریمیزده آنا دیلیمیزین حاققیندا ئؤزلرین بئله نفیس اثرلر باقی قویسونلار.من رحمتلی شاعیریمیزین غربت ده اولدوغوم اوچون ساده جه بیر اثرین الده ئِتمیشم و اوخوموشام(حیدربابادان شهریارا مکتوب و بابک منظومه سی)کشکه ایمکانیم اولسایدی یازدیغی آزربایجانجا فارسرسجا و فارسجا آزربایجانجا اثرینده اله گتیره بیلسیدیم.تیکرار آلله دان رحمت و مکانین جننت اولماسین نیاز ائده ریم.