بوگون یکشنبه 29 فروردین 1400 ساعات 02:13
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

 

نور چشمه‌سي
احمد شایا- آلاو
(1304-1383)

قلبيم پيچيلدايير

مني تشويق ائدير هر آن.

دائيم قولاقلاريمدا آچير يايليم آتشي

ظولمتده غرق اولان گئجه‌نين اؤرتويون گؤتور

تا چاغلايا گونشين نور چشمه‌سي

ايلكين سحرده باشلايا بولبول ترانه‌سي

                        هم سئيره نغمه‌سي

هر گون قيزيل زمي‌لردن اسن كولك

قوي زولفون اوخشايا ساري سونبول‌لو بوغدانين

گول عطري ايله دولدورا دونيانين هر يانين.

                      ***

قلبيم دنيز كيمي، سپه‌لنديكده هر زامان

سايسيز اوميد دالغاسيني ساحيله يايير

گؤزلرده انتظاريم اؤپور آل شفق يئرين

مين احتراص ايله اوره‌ييم لحظه‌لر سايير؛

قويسون اوفوق كامانينا فجرين ايشيق‌لارين

گورشاد ياغيش كيمي تؤكسون نور اوخلارين

ظولمتده غرق اولان گئجه‌نين

                        يارسين اؤرتويون

تا آغ گولوشله رنگ آلا مشرق اوفوق‌لري.

                       ***

ايلكين سحرده نرگيز آچاندا خومار گؤزون

افسانه گؤيلرينده گزر شن باخيش‌لاري

رسّام كيمي گونش ده آليب فيرچاسين اله

آلتون بوياغي‌لا چكير الوان ناخيش‌لاري

يعني كي، گول گولور و طبيعت بزك‌لنير

                        چؤل‌لر چيچك‌لنير،

آچ گؤزلرين دان اولدوزوم،

                   اي صبح روشنيم!

الوان چيچك‌لر ايله بزه‌نديكده كؤشنيم،

شعريم، شعوروم اويانسين دئيه بير آن

ظولمتده غرق اولان گئجه‌نين اؤرتويون گؤتور

قوي چاغلاسين گونشين نور چشمه‌سي.

(1): آذربایجانین تانینمیش شاعر، یازیچی، ادبیاتشناس و دیلچی عالیمی احمد شایا (آلاو)  1304ینجی ایلده خوی شهرینده دونیایا گؤز آچمیش و تام بیر انسان عؤمرونو یالنیز آذربایجانجا- فارسجا و فارسجا- آذربایجانجا سؤزلوک(90 مین سؤز و ایضاحلاری) یاراتماغا صرف ائتمیشدیر. آذربایجانیمیزین بو مبارز اوغلو آزادلیق و ملی مدنیت اوغروندا ائتدیگی اجتماعی و سیاسی فعالیت‌لری و اوتوزونجو ایللرده گیزلی صورتده نشر اولان “آذربایجان” روزنامه سی‌نین یازیچیلار هئیتیندن اولدوغو اوچون نئچه ایللر عؤمرونو زندان و سورگونلرده کئچیرمیشدیر. احمد شایا عؤمرونون سون گونلرینه قده‌ر ادبیاتیمیزدا یورولماق بیلمه‌ین بیر صنعت فداییسی کیمی حضورو اولموشدور. او بیر چوخ کتابلارین، ادبی تدقیق‌لرین و یوزلر مقاله‌لرین موللیفی اولموش و چاپ اولونموش اثرلریندن: حیدربابادان شهریارا مکتوب، بابک منظومه‌سی، گونشلی گونلر، آیسیز گئجه‌لر، ادبیاتشناسلیغا دایر مقاله‌لر توپلوسو اوچ جیلدده،  آذربایجان دیلینین فونئتیکاسی، خواجه نصیر طوسی، قادینلار شهری و بیر سیرا دیگر کتاب و تدقیق‌لری آد آپارماق اولار.

اوستاد احمد شایا عؤمرونون سون ایللرینده ساهر ادبی مدنی درنه یی‌نین آغ‌ساققالی کیمی فعالیت گؤسترمیش و درنه‌یین دیگر عضولرینه یول گؤسترن اولموشدور. 1383ینجی ایلده کرج شهرینده وفات ائتمیش و اؤز دوستلاری و شاگردلرینین مشایعتی‌ایله سون منزیله یولا سالینمیشدی. اونودولماسین دئیه، خاطره سینی عزیز ساخلاماق اوچون اوستادین بیر شعرینی سیز عزیز اوخوجولارا تقدیم ائتدیک.

2 پاسخ

  1. Ba bozorge mane delam barash yek Zare shode hamine ke mesle unam man ba omidvaram jaye babaozorgamo man Por konam kheili delam tang shode barash

  2. عولو تانریدان بو مبارز یازار و شاعیریمیزه رحمت آرزولاییرام و امید ائدیرم کی دیگر یازارلاریمیز و شاعیرلریمیزده آنا دیلیمیزین حاققیندا ئؤزلرین بئله نفیس اثرلر باقی قویسونلار.من رحمتلی شاعیریمیزین غربت ده اولدوغوم اوچون ساده جه بیر اثرین الده ئِتمیشم و اوخوموشام(حیدربابادان شهریارا مکتوب و بابک منظومه سی)کشکه ایمکانیم اولسایدی یازدیغی آزربایجانجا فارسرسجا و فارسجا آزربایجانجا اثرینده اله گتیره بیلسیدیم.تیکرار آلله دان رحمت و مکانین جننت اولماسین نیاز ائده ریم.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *