کؤلگه
کیان خیاو
یارغیلانار دیلین
سورغولانار دیلین
سوسقون- سوسقون باخارسان هاچا دیللی ایلانلارین گؤزونه.
دوداغیندان سانجی‌لارسان
کؤنلوندن سانجیلانارسان
کیمسه آلدیرماز سنی
کورک- کوره‌یه دؤنر اینسانلار قالابا‌لیقدا
کیم ایلک آددیمینی آتار آیریلیغا بیلینمز.
دیلینی بیلمه‌ین دیلینی اینجه‌له‌یر
شئعیرلرینی آنلامایان شئعیرلرینی
و هله قان وئرن ساغالماز یارا‌لارینی
ایشکنجه‌چیلر.
اویویار اللرین
سویویار اللرین
دورقون- دورقون آخارسان کور و آج ییرتیجیلار اؤنونده.
گؤزلریندن بوکولرسن
بئینیندن سؤکولرسن
کیمسه‌نی آلدیرمازسان
آغزیندا قارانلیق قیفیللایارسان
اوره‌تدییین اسکی یاوان هئجا‌لاری.
و یاشاما اولان سئوگین
اؤز قاتی‌لیغینا ساریلمیش
دمیرله‌شر بیر قیش آغاجی ایچینده.
قار قورشون یاغار اوستونه بیر آخشام
دونیا آغ کاغیذا دؤنر قارشیندا.
سوسقون، سولقون، داغینیق
دمیرلشمیش بیر قیش آغاجی دیبینده اؤلرسن بیر گئجه ده
گله‌جه‌یین مات گؤرسلی کیمی بؤیوک و قورخونج.
و سونوندا
آغلیغینا اییلدییین یازیلی بیر کاغیذی
بیر اؤلو کؤلگه‌سی پوزار پوزا‌راق!…
یک پاسخ
چوخ گؤزل و دیرلی .اوستاد دان بیر دیله ییم وار …غزللریزیده قویون هم اوخویوب لذت آپاراخ و همده اویره نک.