کؤکوم دور تبریزیم!
اکبر صالحی “قاداش”
دولانباج باغ کوچه‌لری؛
یولچولارا پای وئرمک ایسته‌ین-
مؤهره دیوارلاردان کوچه‌یه ساللانان-
اوزوم سالخیملاری؛
باغلارین گؤزل‌لییینه-
منه باش أیدیرن-
آلچاق- آچیق قاپی‌لار؛
دیوار چاتلاقلاریندا-
قارغانین دیمدیییندن منه پای قالان-
قوز، بادام؛
آرخین چیملرینی اؤپه- اؤپه-
آخان سویون شیریلتیسی؛
اوشاقلیغیم، یئنی یئتمه‌لیییم
شیبلی گدیییندن کئچنده،
اتوبوسون پنجره‌سیندن
الیمدن، دره‌یه توللاندی.
ایللر بویو-
گدیکدن کئچنده،
اونلارین ایز- توزونو آختاراردیم.
ایندی شیبلی‌یه چاتاندا،
گدیکده قویلانیرام.
ملیک مممد سیمیریق قوشونا تاپشیریب،
من یئر آلتی دونیادا چوخ قالماییم.
گؤزلریمی تبریزله ایشیقلاندیریر؛
چؤللره یاییلان تبریزیم-
داغلارا دیرماشیر.
کؤکم دیر تبریزیم!
تاوادا قاباران کؤکوم دور تبریزیم.
یانسا دادی قاچاجاقدیر!
آماندیر، کؤکوم دور تبریزیم!
۱۵/۴/۱۳۹۴
