ایکی شعر
صدیار وظیفه(ائل اوغلو)
دوز یانا
قایالاردا قیریلمازدی سسیمیز
قایا یالین، بولود چیلغین، دومان‌سیس.
قورخورام‌کی جوانلاشا عشقیمیز
داغ ارییه، دره دولا، دوز یانا.
اؤتن ایللر قاییتسایدی اوستومه
کولک‌له‌نیب شیغیاردیم اوستونه
کیم دئیرکی، اوزون آلیش توستونه
یاناندادا، یالاویندا کؤز یانا.
آرخالانما اوزو سندن دؤنه‌نه
آلولانما توستوله‌نیب سؤنه‌نه
بیرجه آددیم یول اولسایدی دوننه
هر آددیمدا، یول چکردیم یوز یانا.
سنی
گؤز اوره‌گین گؤزگوسودور
گول، گؤزونده گؤروم سنی!
چیچکله‌نن یاناغیندان
اؤپوش‌ـ اؤپوش دریم سنی!
گؤیه‌ر، سئوگی باغچاسنیدا
یاشا، اومید قونچاسیندا
دریب کونول بوقچاسیندا
سرگی ـ سرگی، سریم سنی!
دولان گل خیال چؤلومه
منیم نغمه‌لر ائلیمه
دیننده دولاش دیلیمه
ائله‌ییم ازبریم سنی!
