چیچکلرده اویویان گونلر
حسن ایلدیریم

«آیدین» ماهنی دینله‌ییر
موغنی اوخویور:
“منی رویالاردا بوراخما” دئییر
رؤیالار… رؤیالار… رؤیالار
او منی رؤیالاریم‌لا بوراخیب گئتمیشدی.
«برهوت»چؤلونده
آیاق یالین هاراسا قاچیردیم.
باشیمین اوستونده قارا قیر بولوت‌لار؛
آیاغیمین آلتیندا قوورولموش تورپاق؛
آلتی بیر یاندان
قیزمار، قاینار کولک‌لر اسیردی؛
منی قارا سئودا
هاراسا چکیردی…

بیردن قاپی آچیلدی
«سئودا»
«دونیا»
هره‌سی بیر قولتوق چیچکله گیردی قاپیدان؛
بالالاریمین گولوشلری،
آلا گؤزلرینین سئوینجی-
قاریشدی چؤل چیچکلرینه؛
منی قوپاریب آلدی رؤیالاردان.

روحوما جالاندی اونودولموش عطیرلر؛
جانیما ساریلدی
چؤلللرین هاواسی؛
بئینیمده سسلندی ایتمیش دونیامین صداسی.
چؤل چیچکلرینه بوکولموش
«آنا» گولوشلری،
«تای- توش» سسلری،
«آتامین» باشیمی تومارلایان اللری،
بیرده «حسین»ین قومرال گؤزلری.

جانلادی گؤزلریمده،
یئنه یاشانماغا باشلادی
عؤمرومون سولان فصیل‌لری،
آرخادا قالان ایللری؛
اوزومه گولومسه‌دی
چیچکلرده اویویان گونلر.
۱۳۸۷