ساوالان کؤلگه‌سی
انصار قره‌داغی
ساوالان قارلی ـ قیاملی ساوالان کؤلگه‌سی سالمیش
اودلو ـ آتشلی آذربایجانا جان کؤلگه‌سی سالمیش
یوخوسوز بیر گونشی یئلکه‌لمیش قوللو ـ بیلَکلی
آرانین ، میل ـ موغانین اوستونه قان کؤلگه‌سی سالمیش
تانری اوغلو بو قوروقدان قوزو اولدوزلاری قایتار
قارا سلطان بو قلمرودا چوبان کؤلگه‌سی سالمیش
زامانین سقفی دومان ، قیبله‌لرین قلبی فغانلی
ساوالان قدسی ثریّادا آذان کؤلگه‌سی سالمیش
بابالار غملی ـ کدرلی ، اوبالار دؤولتی قان ـ قان
ساوالان خطّی خطالاردا یالان کؤلگه‌سی سالمیش !! …
قوردلارین کوشکورور آللاه یازیق السیزلرین اوسته
شاه داغی کؤرپه کؤنوللرده فغان کؤلگه‌سی سالمیش
انسان ائولادلارینین کؤکسونه بوزقورد تپیلنده
چارتلایان باغریمیزا خوفلو دومان کؤلگه‌سی سالمیش
توی آتی، سن دئنه، ناموسلو ایگیت‌لر ییخیلاندا
ظولمکار بَی‌لرین اندامینا «خان» کؤلگه‌سی سالمیش !
سس گلیر سان دده‌لر سازلارینین سئحری سسیندن …
– : یؤخ، قارانلیق سَحرین زولفونه دان کؤلگه‌سی سالمیش
دده‌لر کؤینه‌یینین کؤهنه نیشانگاهینا، اصلا ،
کومه‌لر آستاناسی اوزره قوران کؤلگه‌سی سالمیش
گولله‌لر قانلی، قیلینجلار قادالی، خَلقیم امانسیز
ساوالان بیرجه اومودلاردا آمان کؤلگه‌سی سالمیش
دینله‌یین، سؤیله‌سین او ایلدیریمی قمچیله‌ین قیز
قوزوسو ، خان چوبانی داغدا موغان کؤلگه‌سی سالمیش
سوولانان کسگین اوراقلار ، کیشی‌لر پنجه‌لرینده ،
ساری سونبوللو بو دوزلرده آران کؤلگه‌سی سالمیش
نَفَسی یؤخسول آنا سوره‌سی، اینجیلی سایاقدیر
کؤرپه عیساسی بئشیک‌لرده جاهان کؤلگه‌سی سالمیش
تانری ساچ ـ ساچ بزه نَرکن ، باشینا آینا گؤتورموش
تویو ـ توراتی مصللادا اوزان کؤلگه‌سی سالمیش
سوروشان یؤخ ، دئیه‌ر هر دَم او کرَم کؤرپه‌لی داغلار
بو داغین موسیقیسی روحی ـ روان کؤلگه‌سی سالمیش
ساوالاندیر، قورو یئرده قورولوب ، قصری جاهانا
اؤز چیراغین توتوب الده ساوالان کؤلگه‌سی سالمیش !
قارلی داغدیر ، باهاریندان لالازار دینله‌مه « انصار »
عشقی بیر باش آغاران باشدا خزان کؤلگه‌سی سالمیش .
۱۳۹۳/۴/۲۱
یک پاسخ
عشق اولسون سایین شاعیر انصار قاراداغلی یا. یاشاسین ساوالان اورکلی شاعیرلر