اوزاق گز، بالا…!
چئویرن: حمید آرش آزاد
ترجمه: حمید آرش آزاد
حمید آرش آزاد
00:00
00:00

دوکتور بویورور: «مین جوره نعمت‌دن اوزاق گز
تاپسان، یئ بیرآز سووزو- چؤره‌ک، ات‌دن اوزاق گز»
ائو صاحیبی، دستور بویورور: «ایل باشا چاتمیش
مستأجر آقا! آرتیق اقامت‌دن اوزاق گز»
واعظ بویورور: «پول‌کی وار، ال چیرکینه بنزه‌ر
قوی من تالاییم، سن، بالا! ثروت‌دن اوزاق گز»
گئتسه قیزا ائلچی، آناسی تئز وئره‌ر اخطار:
«ائوله ماشینین اولماسا، وصلت‌دن اوزاق گز»
وارلی وئره‌ر احسان، ائله‌یر پوللونو دعوت
سؤیلر فقیره: «گئت، بو ضیافت‌دن اوزاق گز»
آرواد بویورار: «آل منه بیر بوللو جواهر
یوخدوری پولون، ائوده محبت‌دن اوزاق گز»
قبره قویولان گون‌ده، «نکیر» سؤیله‌یه‌جک‌دیر:
دوز سؤیله‌ جواب، یئرسیز حکایت‌دن اوزاق گز»
قبر اوسته گلیب گون‌ده، طلبکار دئیه‌جک‌دیر:
«بوش چیخدی چکین، بوردادا راحت‌دن اوزاق گز»
قورخوم بودو، محشرده ملایک‌ده بویورسون:
«پولسوزلارا یئر قالمادی، جنّت‌دن اوزاق گز»
گئتسه‌م‌ده بهشته، منه «رضوان» دئیه‌جک‌دیر:
«مئیوه یئمه، آرخلارداکی شربت‌دن اوزاق گز»
حوری دئیه‌جک: «بیرجه قاریش‌دیر بویون، آنجاق
یورما الی، شومشاد کیمی قامت‌دن اوزاق گز»
چوخلار منه چوخ سؤز دئمیش، هم ده دئیه‌جک‌دیر
آنجاق دئمه‌ییرلر کی: «فلاکت‌دن اوزاق گز»
تنقید یازانین، باش- قولاغی ساغ قالا بیلمز
«آرش»! بو مقامات‌لا ظرافت‌دن اوزاق گز!

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

اوزاق گز، بالا…!

حمید آرش آزاد
www.ishiq.net

آذربایجان ادبیات و اینجه‌صنعت سایتی