قیسا شعرلر(۸)
فریبا مرتضایی
(۱)
آجی‌دیر سنسیزلیک-
اوره‌ییمین ایچیندن دادیرام؛
یارادی یاناقلاریم
سئل اولوب گؤز یاشالاریم.
آه
دایاز یئردن
درین سئوگیمه باخان یاریم !
اؤلدوروب منی
بو سنسیز – ساییسیز
غریب دوشن
نفسلریم!
(۲)
اوره‌ییم-
دؤزوم وئر!
ایچیمده‌کی سئوگییه –
اَل ساللایان وار.
(۳)
آیاقلارینین سسی
کیرپیکلریمدن آسلانار!
گؤزلریم آخار،
آستانانین توزون آلار؛
آغزیمی آچسام
اوره‌ییم دانیشار ؛
بیر قادینین سئوگیسی
بؤیله آخار
بؤیله داشار!
(۴)
غم نه قده‌ر ده سس‌سیز چالا
اوره‌ک او قده‌ر
یئیین هاوا اویناییر.
(۵)
آجیقمیشام؛
بیر تیکه باخیشینا-
اوره‌ییم گئدیر
(۶)
نه گؤزلدیر آدام یئرینه-
پالتار آسماق؛
بیله-بیله اوجاق باشیندا-
اوره‌ک یئرینه ال یاندیرماق،
یئر آلما سویوب اوستونه یازماق؛
نه گؤزلدیر قادین اولماق
سنی سئویب،
سنی یازماق!
(۷)
کیمسه‌نین-
الیندن توتا بیلمیرم؛
الیمده،
اووجومدا-
بیر تک سن وارسان!
(۸)
بیر تیکه توتدوم-
بال باخیشلاریندان؛
ایل‌لردیر
گؤزوم توخدور!
4 پاسخ
چوخ تشکرلر عزیز دوستوم خانیم ترقی .شاد یاشایین سالامات قالین .
نه گؤزل شعرلر وار اولون عزیز خانیم مرتضایی آجیقمیش روحمو دویوزدوردو بو دویغو دولو حیس لر. گؤزلریم دولو دولو بو شعرنیزی اوخدوم نه قده ر تشکر ائلسم ازدیر
نه گؤزلدیر آدام یئرینه-
پالتار آسماق؛
بیله-بیله اوجاق باشیندا-
اوره‌ک یئرینه ال یاندیرماق،
یئر آلما سویوب اوستونه یازماق؛
نه گؤزلدیر قادین اولماق
سنی سئویب،
سنی یازماق!
ایشیق سایتینا تشکرلر.
عزیزو مؤحترم خانیم مرتضایی چوخ تشکر ائدیرم بیزی گؤزلدن ده گؤزل شعر لریزه قوناق ائله مسیز واقعا لذت اپاردیم بو شعریزی نئچه دفه اوخدوم چوخ گوجلو گؤزل و خاص بیر دویغودور. ایشق امکداشلارینا عشق اولسون . بئله ایستیرم بو شعری قیشقیرام اوخوماق یئتمیر !
نه گؤزلدیر آدام یئرینه-
پالتار آسماق؛
بیله-بیله اوجاق باشیندا-
اوره‌ک یئرینه ال یاندیرماق،
یئر آلما سویوب اوستونه یازماق؛
نه گؤزلدیر قادین اولماق
سنی سئویب،
سنی یازماق!
موحترم و عزیز فریبا خانبم تبریکلر
چوخ گوزل و دویغولی شیعرلریزی اوخودوم
سیزین بو یولدا پارلادینیزی و موافاق اولمانیزی جانی گونولدن ایستریم؛ اللریز آغریماسین وساغ اولون