ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

kabir_2
اؤزگه‌له‌شیرم
رقیه کبیری

هر سحر گؤزلریمی آچاندا آیدینلیغا
اؤزومدن سویونورام
نسنه‌له‌شیرم
ائو…
ائشیک…
نسنه‌لشمیش‌لرله گؤز- گؤزه …
گؤرمه‌یینجه بیر- بیریمیزی
قوندارما گولوش قونور دوداغیمیزا
«تانری گولنده دونیانی یاراتمیش»
-مین ایل اؤنجه افریقالی بیر فلسفه‌چی سؤیله‌سه ده بو سؤزو،
فلسفه یوناندان باشلانمیش
و مدنیت، سومر آتا- آنالاریمیزدان؛
اورتا عصیرده، دوشونجه‌میز چیراق توتوب،
اوروپانین قارانلیق چاغینا
و آلمانیا،
دوغوب فلسفه‌نین فاخیر دیلینی
بیزسه،
بیر دیلیملیک فلسفه بئله،
کلمه کسمیر دیلیمیز
هاوادان سؤز قاپیریق
سؤزوموزده سؤز اولماسا دا
آنجاق دانیشیریق، دیلدن دوشوروک

قاچ ها قاچ …
دؤشه‌مه‌لر …
باشماق‌لار …

آیاق یالین،
نال‌سیز آتلاریمیزی چاپدیریریق سانال دونیادا
قزئت‌لر باریت باغلاییر خبر تیترله‌رینه
یان کئچیریک
سؤزلر اینتحار ائدیر گؤزموزون اؤنونده
گؤرموروک!
آنجاق بویلانیریق،
استاتوس‌لانیریق،
گؤز آتیریق!
بیر پای بو حکایه‌دن، ایکی پای او شعردن،
سؤز آتیریق.
رمانتیزم چیرکینله‌شیر،
شیرین‌لییی خیمیر- خیمیر  اَکیلیر بارماقلاریمیزین آلتیندان
بونونلا بئله،
شکیللریمیز حقیقتیمیزدن گؤزل گؤرونور سانال دونیانین پنجره‌سیندن

گئجه‌نین 12سینده زامان کؤینک دَییشیر
اؤزگه‌لیییمی سویونورام
اؤزلویومو گئیینیرم
سحرین خیالی‌ایلا، یوخویا دالیرام …
93.3.21

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *