(۱)، اوچوش
گئجه‌نین قارانلیغیندا اوولانیر
ایکی هوندور دووار آراسیندا بیر قوش؛
و من
یادداشتیمین قان ایتیردیگینی
اوره‌ییمین درینلیگینده دویورام،
و اونون آلدیغی هر بیر ضربه‌سیندن
اومید اوره‌ییندن آسلانیرام؛
و اینانجیمین نهایتینده
اونو گؤرورم،
و یاناقلاریندان اؤپورم.
او ایسه،
یاز روزگاریلا اوینایان بیر یارپاق تک
منه دوغرو گلیر
و یاناقلاریمدان اؤپور.
من‌ایسه
گؤز یاشلاریمی سیلیب،
اونونلا ابدیته اوچورام.
(۲)، سنسیز
اوره‌ییم ایسته‌میر
پاییزین سون یارپاغی اولام
و یولا سالام
یارپاق تؤکوملو سون باهاری.
اوره‌ییم ایسته‌میر
یووالاریندا انتظار چکسین دن اوچون
سحره‌دک قوشلار.
اوره‌ییم ایسته‌میر
سنسیز
آیلی گئجه‌نین قوناغی اولام،
و یاخود
سنسیز
قوناق چاغیرام آیلی گئجه‌نی ائویمه.
(۳)، یاشیل اؤلوم
دیندیرمه اوره‌ییمی!
چوخداندیر اؤلدورموشم سنی.
قیصاص آلماق ایسته‌سن
پارچالا منی،
و صنوبر آغاجی‌نین بوداغیندان آس!
خوش‌دیر جان وئرمک
طبیعتین قوینوندا.
(۴)، کؤمور قوخولو هاوا
کؤمور قوخوسویلا دولودور نفس‌لر؛
آنجاق
سئرچه‌لر یئنه‌ده جیککیلده‌شیرلر.
سما بوزدور؛
آنجاق
گونش تمناسیز ایشیقلاندیریر هریانی.
گئجه قارانلیق دیر، ذیل قارانلیق؛
آنجاق
گوندوز ایشیقلی و بعضا‌ده یاغیشلی؛
هر ایکیسی گؤزل
هر ایکیسی ایشیقلی…
بیزی سوراقلاشسانیز
قفسده‌کی بیر قوش کیمی؛
آنجاق
اوره‌ییمیزده آزادلیق اومیدی،
آزادلیق اومیدی.
(۵)، قیش
سحره‌جک
آغ دیشلرینی قیجیریردی بیزه
قیشین سویوغو؛
و دونوردو هاوادا نفس‌لر
هر سویوق باخیشی‌لا.
آنجاق
سحر آچیلارکن
گونشین ایستی و محبتلی باخیشیندان
اوتانیب،
سوزولوب، ایتدی
داغلارین آرخاسیندا.
