بیزیم قونشونون اوشاغی
بؤیوک‌آغا افندی
اوشاقلارا ياخچي آد قويماق دده، ننه‌نين بير وظيفه‌سيدير. بيز بو وظيفه‌ني ياخچي يئرينه يئتير‌مه‌سک جامعه‌ده بير عده ياخچي آد قويانلار وار كي، سونرا بيز قويدوغوموز آدلاري تكميل‌لشدیره‌جکلر.
دوققوز آيدان سونرا بيزيم قونشونون بير اوغلو اولدو. اوشاق چوخ گؤزل، دوزلو، اوره‌يه يا‌‌‌‌‌تان بیر کؤرپه‌ایدی. اوشاغین اولما خبری قوهوم- اقریبا، دوست- تانیشا یاییلان کیمی، هره بير قابلامادان، قازاندان، مجمعی‌دن، چايداندان ووروب قولتوغونا، اوشاغین آتا- آناسینا “گؤزونوز آیدین اولسون”- دئمک قصدی‌ایله، اوز قویدولار اوشاق ائوینه.
اوشاق ائوینده هره بيرسؤز دئیير. آنجاق ايكي سؤز هرسؤزدن آرتیق ائشیدیلیر. بيری اوشاغین كيمه اوخشاماسی و ایکینجیسی‌ایسه آدي‌نین نه اولماسی.
قیزقاییت خانیم هله یئره اوتورمامیشکن سؤزه باشلاییر:
– آي بالا گؤزلريز آيدين اولسون! اوغلاندي‌دا؟ ماشاللاه، ماشاللاه. آللاه ساخلاسين. نه‌ده گؤزلدي. ائله بيل بيزيم میریشین باشين كسيب، قويموسان بونا.
اوشاغين خالاسي فرصتی فووتا وئرمه‌دن اعتراض ائتدی:
– وا، گينه من دئسم بير سؤز، هامي دئيير ائله بيل بیزیم زولفعلي‌نن جوت آلمادي‌لار.
بو آندا قاپي دؤيولدو. بير خانيم الينده گؤيوم ميرتدانا، ميرتدانا ایچری گیردی:
– خالان قوربان اولسون بالا، هيچ گؤر بيزه خبر وئريرلر.
قاپي‌دان ایچری گيرمه‌ميش، یوگوروب اوشاغين اوستونه:
– بالاما قوبان ايلانلار، بالام نه واخت ديل آنلار.
اوچ گونلوک اوشاغي آتير توتور، اوينادير. بیر ته‌هر اوشاغي اونون اليندن آليرلار. باشلايیر سؤزه:
– آدين خالاسي قوياجاق. محرم دئيیب آدين اوروجعلي قويون.
اوغلانين باجيسي جلد يئردن قالخدي:
– خالاجان گذشت ائيليه‌سيزها، بيز تازا آدلاردان قوياجاغيق.
اؤزونو یاتماغا ووران اوشاق ننه‌سي بو سؤزلري ائشیدن کیمی ديك قالخدي:
– قوقولي بالام، بالاجا بالام، قوربانين اولوم. كيشد،كيشد. آدين مميش قوياجاغام بالامین.
اوشاغين دده‌سي بو آد قویما یاریشیندان گئری قالماماق اوچون، ميدانا گيردي:
– آدين اؤزوم قوياجاغام. نه مميش، نه چپيش، منيم رحمتليک دده‌مين آدي غضنفر ايدي. دئييرم ائله غضنفر قويون قورتولسون.
هامي‌نين دوداقلاري ساللاندی.
– غضنفر؟!!
نهایت اوشاغين ننه‌سي سؤزون يئريتدي. اوشاغين آدين مميش قويدولار.
باشيزي چوخ آغریتماییم. ممیش ياواش- ياواش بؤيويور، چيخير كوچه‌يه. گئدير، گلير. بترده بير هئيكل ساليب. بير گون كوچه‌ده او آد قويان دوببه‌لرین بيرينه راست گلير. آقا سوروشور:
– بو كيمين قودوقودو؟ آدي نمندي؟
دئييرلر فيلان كسين اوغلودور، آدي‌دا مميش‌دي. آقا بويورور:
– بو كي گاميشا چوخ اوخشايير تا مميشه. فوري آد قويما اولدو. گاميش مميش دوشدو آغيزلارا. ممیشین بؤیویوب کیشی اولماغینا باخمایاراق، گامیش لقبی قالدي اوستونده. او ائولنندن سونرادا مميش آدی ياددان چيخسادا، گاميش لقبی ياددان چيخمادی کی چیخمادی. ممیش، گامیش‌لا ائکیز یاشادی….