گؤروشلر ايله دوشدو!
حميد آرش آزاد
اوچ- دؤرد گونه سؤز وئردي يار، اوچ – دؤرد ايله دوشدو
چون كي اونودوب وعده‌سين، ايش موشكوله دوشدو
گاهدان «كانادا»، گاه‌دا «سويس» ويلاسي آلدي
من كنده داشينديم، آرادا فاصيله دوشدو
ميليارددان اوچ- دؤرد دولار اسگيك پول آپاردي
بو آزلـيغا خاطير، آرامـيزدا گله دوشدو
من سنگكي سئوديم، او اولوب «يورو»يا عاشق
او چاتدي ووصاله، منيم عـشقيم ديله دوشدو
قارداش ايشي چون قارداشا دوشدو، ايشي بيتدي
من «هابيل»ايديم آنجاق ايشيم قابيله دوشدو
مؤولوك، قانالـيق‌لار اونون اولدو بؤلوشنده
قيسمت بوايميش، بنده‌يه دؤرد- بئش گيله دوشدو
روزي بؤلوننده اونا كاميون‌لا وئريلدي
من روزي‌يا باخديم كي، سؤكوك زنبيله دوشدو
او اكدي، بيچيب، حاصيلي‌ده ائـيله‌دي صادر
يوزلر جوره آفت‌ده بيزيم حاصيله دوشدو
دوقتور فلاني، آي‌دا بئش- اون دفه گؤروردوك
چون اولدو نمايـنده، گؤروشلر ايله دوشدو
بعضي‌لره بختين قاپي‌سي يكسر آچيلدي
بيزلر يـئـتيشنده، قاپي تـئز ايشگيله دوشدو
هر كيم كي يـيـغـيب رأي گئديب، بخته‌ور اولدو
رأيي سالانـين‌دا اوره‌يی نيسگيله دوشدو
چون «بخش خصوصي» دئديلر ايش‌لره باخسين
امكاناتـيمـيز تكجه بئش- اون فاميله دوشدو
«طنز» عنوان ائديب «آرش» ائلين درديني يازدي
شعري او دو كي، اؤلكه‌ده ديل‌دن ديله دوشدو.