چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی

بیزیم بو آغامهدی بیردنه‌دیر، بیر دنه. آللاه اونو بیزه چوخ گؤرمه‌سین. من بیر سؤز دئییرم سیز بیر سؤز ائشیدیرسینیز. حقیقتن اونونلا دوشمه‌یینجه بیلمزسینیز کی من نه دئییرم. الی آچیقلیقدا کیشی تامامدی؛ پیس گونده قارداشدان یاخیندی؛ دار گونده اؤلر سنی تک قویماز؛ باشین آغریسا او تب ائلر. باخ، بو آدامین حاققیندا هرنه دئسم هئچ یوزدن بیرینده دئمه‌میشم. یازیق چوخدان‌ایدی آزی گونده اون دفعه منه دئییردی:
– به سن نییه شعیرلرینی چاپا وئرمیرسن؟ بابا فیس‌ده، اینستادا سنین شعیرلرینی مین-مین لایک ائدیرلر. سن قورخما چاپ ائله، سنین کیتابینی هاوادا وورارلار. بیر ده بیز اؤلمه‌میشیک کی، هره‌میز ایکی- اوچ یوز دنه آلساق ایکی گونه چکمز قورتولار سنین کیتابین. سنین ایشین اولماسین، ساتماق منله. سن فقط چاپ ائله!
آغامهدی‌نین گؤزوندن ایراق آروادا وعده وئردیم کیتابین منفعتینه هم فرشی تازالایام، هم ده بیر کناره سالام یانینا. فرشی ساتدیم وئردیم ناشیر دوستوما. بیر ایل دالینجا قاچاندان سونرا آخیردا اؤزوم طراح، ویراستار تاپدیم. اونلاردا دؤرد- بئش آی منی شیرین-شیرین اویناداندان سونرا، دوققوز آی دا یکسره ایرشاد ایداره سینه یول دؤیدوم. خولاصه کیتاب ایشیق اوزو گؤردو. یئرده، گؤیده دورموردوم. کیتابین شکیلین قویدوم فیسه، تلگراما، اینستایا، واتساپا. وئردیم اوغلوم تویوت ائله‌دی، قیزیم یوتیوپا قویدو، آروادیم شیشه- شیشه بوتون قوهوم قونشویا خبر وئردی.
سحر- آخشام هی تبریک ایدی اویان- بویاندا یازیردیلار. آللاهدان گیزلین دئییل سیزدن نه گیزلین، قارداشلاریمین آدینا اؤزومه پئپسی آچدیم، وئردیم آلتی مئتیرده بنئر یازدیلار ووردولار قاپییا:
«شاعیر گرانقدر اوستاد بادمجان اوغلو!
اوتای-بوتای آذربایجاندا تایسیز کیتابینیزین ایشیق اوزو گؤرمه‌سینی سیزه، عائیله‌نیزه، محله اهلینه، شهرداشلاریمیزا، وطنداشلاریمیزا، دونیا اهلینه تبریک دئییریک.»
بیر آی دا بئله کئچدی، آمما کیتاب آلان اولمادی کی اولمادی. ناچارلیقدان زنگ ائله‌دیم عزیزدوستوم آغا مهدی‌یه؛ موشتولوق وئردیم، دئدیم:
– آغا مهدی، امرین اطاعت اولدو‌. کیتاب حاضیردی. نئیله‌ییم؟ نئچه یوزون گتیریم سیزه؟
آغامهدی دئدی:
– تلگرامدا گؤردوم. جیلدی ائله جالیب دئییلدی، آمما اولسون، سنین کیتابیندی دا، بوطرفدن کئچنده بیرینی ده وئر بیزیم دفتره. اوشاقلارا تاپیشیرارام ایسته‌ین اولسا سنه خبر وئرسینلر.
بیر ایکی اوچ آی دا بوجور کئچدی؛ گؤردوم اولمور. هرگون بئش- آلتی کیتاب قولتوغوما ووروب ، شهرین بوتون انجمنلرین گزدیردیم. شهرین اهلینی بئش آی اوزدن آپاراندان سونرا نهایت دؤرد کیتاب ساتدیم؛ اللی‌سینی ده اونا بونا پای وئردیم؛ هله ۹۴۵ جیلدی ده ائوده قالیردی.
آروادین یاواش- یاواش سسی چیخیردی:
– فرش جهنم، بولار نه واختاجا قالاجاقلار بوردا؟ قالخ آیاغا، گئت آغا مهدی‌له مشورت ائله، گؤر نه دئییر؟
آغامهدی‌یه اون یول زنگ ائدندن سونرا بویوردو:
– بوجور اولمازکی، بیر شام وئر، بیر ایکی ایستکان زهریماردان زادن؛ گلیم گؤره‌ک سنه نه ایش گؤرمک اولار.
او دورد بئش کیتابین پولونا بیر ایکی دنه پوفک آلدیم؛ شام بیزدن، مشورت آغامهدی‌دن؛ حسابی یئییب ایچندن سونرا آغا مهدی دئدی: -«دوغوردان کیتابلار قالیر؟» – «هه، واللاهی!» ائشیدندن سونرا بویوردو:
– بابا بئکار آدامسان، بئش قیرانا گولله آتیرسان، صاباحدان آپار کیتابلاری خیاواندا دؤشه، سات گئتسین دا! هم کیتابلارین پولو قاییدار، هم ده بو بئکارلیقدان یاخا قورتارارسان.
ایندی هر سحر تئزدن کیتابلاری پیادارودا دؤشه‌ییرم. «سد معبر» مامورلاری گلیب پول ایسته‌ییر؛ هرنه یالواریرام: – «بیرزاد ساتمامیشام، هله پولوم یوخدو، گؤتورون کیتاب آپارین!» هئچ بیری‌نین قولاغینا گیرمیر. پادار دئییرلر:- «یا پول وئر، یا دا بو زیر- زیبیلی ییغیشدیر بوردان…!»

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دوستوم آغا مهدی‌نین مصلحتی

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

دوستوم آغا مهدی‌نین مصلحتی

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

دوستوم آغا مهدی‌نین مصلحتی

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی