ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

کرمانلي والي نين ديواني/ ائل اوغلو

اؤتن ایللرده ایران مجلیس کیتابخاناسینین ال یازمالار بؤلومونده اولان تورکجه شعیر مجموعه لرینی آراشدیردیقدا، بیر اؤنملی دیوان اثریله راستلاشدیم. ندنسه شعرلی آراشدیریلمامیش قالان او شاعیر، یالنیز نوسخه شوناسلارین دئییل ادبیات تاریخیله مشغول اولان عالیملریمیزین و آراشدیریجیلاریمیزین گؤزوندن ده بئله قیراقدا قالمیشدیر. بو آجی طالعین سببینی هله ده اؤیرنمه میشم. اونون چوخ جهتلرن قابیلیتلری اولان غزللری و قصیده لر و باشقا- باشقا شعر نوعلری واردیر. تذکره چیلر بیر نئچه والی تخللوصلو شاعیردن آد آپاریبلارسادا اونلارین هئچ بیر الیمیزده کی دیوانین مؤلیفی والی دئییل. من اونون الده ائدیله بیلینن مونوگرافیسینی دا اونون دیوانیندا اولان شعرلردن توپلادیم. تذكيره‌لرين قئيدينه گؤره« والي» تخلّوص ائدن شاعيرلرين سايي بارماق ساييندان آرتيق دئييل. اؤتن عصيرلرده والي تخلّوص ائدن شاعيرلرين هئچ بيريندن معاصر چاپ اصولوايله نشر اولونموش شعر مجموعه لري‌نين اوخوجوسو اولماميشيق. اونلارين آدلاري و ياراديجيقلارينا عنوانلانان قئيدلرله، آنجاق كلاسيك شعر آنتولوژييالاريندا و تذكيره لرده راستلاشيريق. ايندييه دك بو سيرادا، «والي استرآبادي»، والي بخاري «والي بخارايي»، «والي بختياري»،«والي هروي»ني آد آپارماق اولار، آدلاريني چكديييميز«والي» تخلّوصلو شاعيرلرين حيات و پوئتيك نمونه‌لرينه دايير” تذكيره نصر‌آبادي”، ”تذكره خوشگو”، ”تذكره سامي”،” تذكره صبا”، ”تذكره حسيني” و ”فرهنگ سخنوران (دكتر خيامپور)” كيمي قايناقلاردا د‌يرلي معلوماتلار واردير. والي بختياري»(11)ه.ق، «والي بخارايي»(11)ه.ق، «والي بخاري»(11)ه.ق، «والي هروي»(11)ه.ق، «والي استر آبادي»ايسه (13)ه.ق عصيرلرده ياشاميشلار.

 اونلاردان باشقا والي تخلّوصلو بير شاعيرله‌ ده راستلاشيريق. او، الينيزده‌كي مجموعه‌نين شاعيري « والي» دير. او، صفويلر دؤرو ياشاييب يارادان «والي»  تخللوصلو بيرشاعيردير و هئچ بیر قایناقداندا اونون حاقیندا معلومات الده ائده بیلمه دیک .

اونون اؤز شعرلريندن آلينان مؤحكم اعترافا گؤره، من اونو، كرمانلي والي آدلانديريرام. اونون شعرلري ايندييه‌د‌ك ايشيق اوزو گؤرمه‌ميش، اثرلري و حياتي باره‌ده معلومات وئريلمه‌ميشدير. 11-ینجي هیجری قمری عصيرینين قدرتلي شاعيرلريندن اولان « كرمانلي والي » نين ايندييه‌د‌ك يالنيز و يالنيز بير نوسخه ال يازماسي تاپيليب. اونون شعرلري ايران مجليس كيتابخاناسي‌نين ال يازمالار فوندوندا ساخلانيلير. اونون فارسجا یازدیغی شعرلری بیر دگرلی مجموعه دیر. تاسفله ایندییه دک اونون تورکجه یازدیغی شعرلری چاپ اوزو گؤرمه میشدیر من اونون تورکجه شعرلرینی توپلاییب، چاپ اوچون ارشاد اداره سینه گؤندرمیشم. یقین کی اجازه وئرسه لر چاپ اولاجاق. بیرده یادا سالمالییام کی،  ال يازمانين تانيتديرماسيندا ايسه، تاسفله  اونون احتواسيندا اولان شعرلرين ديليني آنجاق فارسجا يازميشلار. حال بو كي، ال يازمادا 38 تكميل غزل نوعينده اولان توركجه شعرلر واردير.

 بير چوخ صحيفه‌لري ايللر سوره‌سينده قوپاريليب دير. يقين كي شعرلري‌نين آراسيندا، اونون توركجه يازديغي شعرلردن‌ده يوخا چيخميشدير.

منه بئله گليركي، «كرمانلي والي» نين ادبي ارثي بير چوخ جهت‌لردن اؤنملي‌دير، يئري گلديكجه اونون حاققيندا دانيشاجاغيق. والي‌نين توركجه شعرلريني اونون ال يازماسيندان كؤچوروب، بير كيتابچا كيمي چاغداش دؤروموزون اوخوجولارينا چاتديرماغي اؤزومه ميللي بير بورج بيلیب، اونون شعرلريني ايلك دفعه ادبي اجتماعيا‌تا چاتديرديقدا، اونون حياتي باره‌ده آپارديغيم آختاريشلاري دا بيرينجي دفعه اولاراق حؤرمتلي اوخوجولارا چاتديريرام. اينديه‌دك شعرلرينه، حياتي و ياراديجيليغينا دايير‌ هئچ بير كيتابدا معلومات وئريلمه‌ميشدير.

 كرمانلي والي نين حاققيندا يالنيز ايران مجليس كيتابخاناسينين ال يازمالار فوندوندا اولان كيتابلارا كاتالوقلار حاضيرلايان بؤيوك عاليم و نوسخه شوناس اوستاد عبدالحسين حائري قيساجا اولاراق معلومات وئرميشدير.

 آمما كرمانلي والي‌نين توركجه‌ده يازديغي شعرلريندن هئچ ده  سؤز آچماميشدي. والي‌نين شعرلرينده، اونون ياشاديغي ايللر دفعه‌لرله قلمه‌ آلينميشدير. «سلطان صفي» و اونون وفاتيندان سونرا يئرينه كئچن‌ ايكينجي شاه عباس دؤورو يازيب ياراتميشدير. آدي چكيلن پادشاهلار، صفوي‌لرين تانينميش پادشاهلاري اولموشدور.

 بيز كرمانلي والي ‌نين شعرلرينده صفويلره عاييد اولان اوچونجو پادشاهين آديله راستلاشميريق. دئمك اونون ياراديجيليق ايللري، يالنيز ايكي پادشاهين حاكميت ايللرينده اولموشدور. ال يازمانين 166-ینجي صحيفه‌سينده اوخويوروق:

«ستاره موكب، جم احتشام شاه صفي

قضا كمان، قدر ناوك سنان خـنـجـر»

ائله جه ده ال يازمانين 126-جي صحيفه‌سيند اوخويوروق:

«در زمـان شـهـنـشـه عــادل

رونـق افـزاي شـرع پيـغمبـر

خـسـرو جم سپاه، شاه صفي

شـاه عـادل دل فريـدون فـر

قيصر روم هم از كمال غرور

بر سر ايروان كشيده حشـر»

ال يازمانين 126-ینجي صحيفه‌سينده ائله‌جه‌ده شاه صفي‌نين اؤلومونو مصرع لرينده، عكس ائتديرن شاعير، والي يازير:

«چو وقت شد كه گذارد به ارث شاه صفي

ممالكي كه گرفت و به او رسيـد از جدّ

تبارك خلف صدق خويش تـاج نـهـاد

سفر گزيد بسوي مراب سـراي مخـلّـه

سپرد افسر شاهي و گفت تـاريـخـش

بقاي دولـت عـبـاس شـاه‌بـاد مـؤيـد

سلطان صفي آن مظـهر الـطـاف‌ ودود

چـون كـرد جـهـان بــي‌وفـا بـدرود

در يــازده مــاه صــفـر در كـاشـان

تـاريـخ جـهـان هزار و  پـنـجـاه‌ و‌ دو بـود»

دئمك «بقاي دولت عباس‌شاه باد مؤيد» مصرع- سينده كلاسيك ادبياتين عنعنه‌سي اولاراق ابجد حسابيلان (1052) ايل گؤستريركي، شاه عباس (ايكينجي شاه‌ عباس) 1052-جي ايلده تاختا كئچميشدير.

ائله جه ده ال يازمانين 124-جي صحيفه‌سينده اوخويوروق:

«خطه  بلخ بتـذوير گـرفـت

خلف پادشاه هنـدوستـان

شاه بلخ از سپه او بگريخت

التـجا بـرد بـه شـاه ايران

بود تذوير علـيـمـردان شـه

سال تاريخ عليمردان‌خان»

دئمك ابجد حسابيله «بود تذوير عليمردان» جومله‌سي گؤستريركي هندوستان پادشاهي بلخ اؤلكه‌سينه يوروش ائتميش، اؤ بؤلگه‌ني فتح ائتميش و بلخ پادشاهي ايران پادشاهينا آمانا گلميشدير. بس او ايلده، شاعير حيات سورورموش.

ال يازمانين 176-جي صحيفه‌سينده اوخويوروق:

«اين قصيده را ابيات شصت و چهار، تاريخش

يك بر او چو اغزل در دو بـار تحسيـن است»

گؤستريركي شاعير 1064 ده حيات سورورموش

منه ائله گليركي شاعير ايكينجي شاه عباس ين وفاتيندان قاباق دونياسيني دييشميش، وفات ائتميشدير. بونا گؤره كي، ايكينجي شاه عباس‌دان سونرا حاكيم اولان پادشاه و اميرلرين آدلاريني قلمه  آلماميشدير

بير داها قئيد ائد‌ك كي شاعير كرمان بؤلكه‌سيندن اولدوغونو داها دا آچيق آشكار دئميشدير. ال يازمانين 170 -ینجي صحيفه‌سينده يازير:

«ماية تخمير بنيـادم زخـاك نـجـف اسـت

گرچه باشد خاك كرمان مولد و منشاي من»

اونوتماياق كي صفويلر دؤرو كرمان و ايرانين شيمال غرب بؤلگه لرينه ده خوراسان دئييرميشلر. والي ايكي ديلده سوز اوستادي اولدوغونو آيدينلاشديرميشدير (فارسجا و توركجه). ال يازمانين 128-ینجي صحيفه‌سينده اوخويوروق:

«آســمـان سيـر ابـلـق دو زبـان

كه داد در دست من عنان سخن

طـوطـي خـوش مـقـال ايـرانـم

مادح خسـرو جـهـان ســخـن»

دئمك والي توركجه شعرلريني خاص نييت اوزره يازميش، آنا ديلينه(توركجه) يازماغي اؤزونه بير شرف سانميشدير. اودوركي (  آسمان سير ابلق دو زبان ) مصرعسينده، آچيقجا فارسجا يازديغي‌كيمي توركجه‌ني‌ده يازيرميش. بيز اونون چاغيميزا چاتان شعرلريندن، اونون اقتدارلي سؤز اوستاسي اولدوغونو، اؤيره‌نيريك. اونون شعرلريني اوخوياندا ديليميزين اينجه‌ليك‌لرينه دريندن بلد اولان بير صنعتكارين اثرلري‌نين اوخوجوسو اولدوغوموزو باشا دوشوروك و همين شعرلرده «طوطي خوش مقال ايرانم» دئديكده او زامان ايراندا  فارسجانين و توركجه‌نين جرياندا اولدوغونو دا باشا سالماق ايسته‌ميشدير.

 بس «خاك پاك كرمان بودمؤلد و منشاي من» مصرع سينده :

گؤرونور كي، شاعيرين اجدادي كرمان بؤلگه‌سينده، ياشاميشدير و بو اونو گؤستريركي شاعير اجداديني قلمه آلديقدا اونلارين كرمان بؤلگه‌سيندن اولدوغونو گؤسترميشدير. او اجدادينا اشاره ائده‌رك ال يازمانين 173-ینجي صحيفه‌سينده اوخويوروق:

«در شكست خودبيني در حسب كمان طينم

گرچه نام اجدادم در نسب سلاطين است»

دئمك او«گرچه نام اجدادم در نسب سلاطين است» دئمكله، سوي – كؤكونون كيم اولدوغونو قئيد ائدير. كورونوركي، او سولطانلار نوه‌سي اولموشدور. او بو سؤزو اوغلونون دونيايا گلمه‌سينه دايير يازديغي شعرينده‌ده قئيد ائدير (ال يامانين 126-جي صحيفه‌سينده اوخويوروق):

«دوشم از روي بشـارت‌ هـاتفي

گفت شكر لـطـف يـزداني بگو

قره‌الـعـيـن كـــه داد ايـزد تـرا

مهـبـط الـطاف سبحانـي بـگـو

ايـن نــهـال نـــورس امّيـد  را

ارشــد اولاد و انـسـانـي بـگو

چـون سـمّي آخ اعيانيـست او

يــادگــار اخ اعـيـانـي بـگـو

حيدرش نام‌وي و تاريخش بود

يـادگـار حـيـدر ثــانـي بـگـو»

شعردن آيدين اولوركي دونيايا تزه قدم قويان اوغلونو اعيانلارين يادگاري آدلانديرميشدير. ظن ائديرم كي حيدر دئديكده ،شاه شيخ حيدره اشاره ائدير و صفويلر سلاله سيندن اولدوغونو گؤسترير و اوغلونو ايكينجي حيدر آدلانديري

 قئيد ائد‌ك كي، ال يازمانين، شاعيرين وفاتيندان سونرا قلمه آلينديغي آشكارلانير. بونا گؤر‌ه‌كي، كاتيب مختلف صحيفه‌لرينده يازير «وله ايضانور الله مرقده» دئمك: «تانري قبريني نورلا دولدورموش دان» دير، دئمك له، كاتيب ايسه، شاعيرين شعرلريني اونون وفاتيندان سونرا يازديغيني باشا سالماق ايسته‌ميشدير. والي عصرينين بير چوخ شاعيرلري كيمي، شيعه دير. او شيعه اولدوغونا دؤنه-‌دؤنه گوونميش و شيعه‌لرين دوشمن‌لرينه نفرين‌لر ياغديرميشدير، شيعه‌لرين ايماملاريني مدح ائتميش‌دير. ال يازمانين 118-جي صحيفه‌سينده يازير :

«از ديو طبعي عمرسعد، قدسيان

درماتمند بهر سليـمـان كـربـلا»

ال يازمانين 236-جي صحيفه‌سينده اوخويوروق :

والي از گلزار مدحش چيد اين گلها ولي

كي توان چيدن ز يك گلزار اين مقدار گل

در مشام ارنيست اين گلهاي رنگي شميم

خار بشد زيره در كرمان و در گـلـزار گـل

 والي قصيده يازماقدا اؤزونو «ظهير»[ظهير الدين فاريابي] و انوري‌دن اوستون گؤسترير. ال يازمانين 242-جي صحيفه‌سينده يازير:

لاف كدايش نزند آنكه حَشَم را

بر سرمة سخاي قزل ارسلان نهاد

سودي نكرد آنكه در شاهوار خويش

بر ترك تاج مدح ملك احتشان نهاد

سلمان چه كام يافت كه از احمد اويـس

دل شاد كرد و بيهُده همه داستان نهاد

توفيق نام بردن اين گنجنامه را

بركاش و سليمي صاحبقران نهاد

اين زرگري نه كار ظهير و انوري

تا بخت اين متاع را كه در دكـان نـهـاد

 «كرمانلي ولي» نين دونيادان كؤچدويونو قئيد ائدن بير قايناق الده ائده‌ بيلمه‌ديك. يقين كي، صفوي‌لر دؤورو ديليميزده شعر يازان بو قدرتلي شاعيرين حاققيندا سونكي آختاريشلايميز اولاجاقدير، اوميد كي، عاليملريميزين هيمتيله اونون حياتي و ياراديجيليغي باره‌ده تدقيقات آپاريليب، شعرلرينده اولان اينجه‌ليك لر داها دا تحليل اولونسون، كرمانلي والي‌نين اينديه‌د‌ك ايشيق اوزو گؤرمه‌يه‌ن توركجه‌ شعرلري آذربايجان توركجه‌سي‌نين شيوه‌سينده‌دير. اينانيرام كي ديلچي عاليملر، ادبيات شوناسلار الده ائتديييميز شعرلرين حاققيندا داها دا گئنيش دانيشابيله ر لر. آشاخیدا اونون بوتون غزللرینی اوخویورق .اومید ائدیرم کی بو غزللر نشر اجازه سی آلاندان سونرا اونلاری کیتابخانالاریمیزاد اوخویا بیلک.

 

ديوان والي

1

آغلار اولدو غملر ايلن ناله- ي زاريم [گؤروب]

شيون ائتدي همنيشين‌لر چشمِ خونباريم گؤروب

تا جونوندان گؤردو کاميل دؤوره‌مي مجنون دئيه‌ن

شهردن هامانه چيخدي گرم بازاريم گؤروب

چون محبّت آغريسي ساغ اولمادي اعجازدان

نااوميد اولدو مسيحا جسمِ بيماريم گؤروب

شمع تک غمدن اريندي تؤکدي کوللر باشينا

صؤحبتيم پروانه ‌تک يار ايله اغياريم گؤروب

اونله‌ين درد ايله کيمدير؟ ياردان سوردي رقيب

دئدي والي‌دير جونوندان خسته ديداريم گؤروب

2

ساقييا تعطيله سالما بيزدن ادرارِ شراب

گلميشيک ديرِ خرابه گئده‌ليم مست و خراب

کؤنگلوم هئنگامه وزدي تا خييالِ يار ايلن

سينه‌دن هرگيز کسيلمز نالهِ چنگ و رباب

مولکِ غم سولطانيييک بيزچش‌مز ايلر نزول

چئوره‌ميزده ياشيميزدان خئيمه‌لر تيکر حوباب

ديده‌دن قان آخماز اولدو ناله‌دن دوشدوم مگر

چوق ياناندا قاني قالماز ناله قطع ائـيلر کباب

زولفونو گؤرجک يوزونده حلقه وورموش هر طرف

يارالي ايلان تک ائـيلر خسته جيسميم پيچ و تاب

روزيگارِ نامووافيق ناتوان ائتدي بيزي

گلدي شيب ايامي والي قالمادي ذؤوقِ شباب

3

ائتمه‌دي  تحرير شرحِ درديمي رنگِ مداد

ياندي شرحِ شؤقيميزدن خامهِ عنبر سواد

رويِ ليلي‌دير چمن طورفينده آدي برگِ گول

آهِ مجنوندور بيابانلاردا آدي گرد و باد

ايکي گؤزون بير گؤزي گه بدردير، گاهي هيلال

احول اولدي ايري باخماقدا سپهرِ کج نهاد

حقّينه قانئع دئـييل هئچ کيمسه, گؤر اينصاف خلق

ناحق اولدي مستمر عالمده يوخدور عدل ‌و داد

عندليب آدي فنا ائتمکده چوخ مشهور ايدي

ائيله‌دي والي بو طرزِ ناله‌دن, عالمده, آد.

4

بر نظر گؤزدن عذار ياريمه ائـيلر نفاد

روح اجزأي تنيم جسمِ زاريمه ائـيلر نفاد

طورفه‌دير کيم بير پريوش  گر گؤررسه گؤزيمه

نشئه‌ِ شورِ جنون اطواريمه ائيلر نفاد

چنگِ عشق آهنگ ائديب و ز طرح و وصفه سينه‌مه

چنگ تک آهنگ بير- بير تاريمه ائـيلر نفاد

باده‌دن والي عذاريم بير گون اولمور لاله‌گون

گول تکي خونابلر روخساريمه ائـيلر نفاد

چؤهره‌مي هردم سيريشکيم ماني گولزار ائـتمه¬سي

پرتوِ  رنگ خزان گـــــولزاريمه ائـيلر نفاد

5

غؤنچه تک آشوفته کؤنلوم خلعتِ گونلگون گئيه‌ر

لاله تک داغِ جونونوم کسوتِ پرخون گئيه‌ر

نولا گئيديرسه‌م گؤزومدن خاکِ کويين لاله‌گون

ابردن والاِي احمر داغدان هامون گئيه‌ر

ماتمِ مجنونا تا ليلي پريشان قيلدي زولف

هر بنفشه چتسه رنگِ ماتمِ مجنون گئيه‌ر

ماتمِ ايمان دوتوب يارين پريشان طورّه‌سي

ياس ايلن مشکين ليباس اول طورّهِ شبگون گئيه‌ر

عشقدن والي سنين سوزِ درونين‌دير بو کيم

دودِ آهيندن قارا چون گئجه‌لر گردون گئيه‌ر

6

پريشان زولفونو خورشيده اول مه تا نيقاب ائـيلر

تلسمکدن تنيم ايلان تکي مين پيچ‌ و تاب ائـيلر

اگر ايچسم برهمن مذهبينده باده منع ائتمه

محبّت مستيني, زاهيد, هاچان ايزد عذاب ائـيلر

خراباتـين شرابينده کؤنگول ساغر تکي توتماز

بو مئي آخر اونون احواليني بير گون خراب ائـيلر

تنِ زاريم بلندي عشق اودي اغياره رحم اتمي

بو آريق جلدي عشق اوستي موکرّر اينتيخاب ائـيلر

اگر بير لحظه ال وئرسه اونون نظّاره‌سي والي

ووجوديمي سراپا محض عئينِ آفتاب ائـيلر

7

چرخلن خوبلر اريشدي آهِ آتيشباريميز

نوح‌لن مردانه جوشدي ديدهِ خونباريميز

عشق ارشادينده کاميل‌دير جونونيم درس ايچون

گرم‌دير فرهاد و مجنون ايله خوش کرداريميز

گيرميشيک زوهد و ريادن تا محبّت دينينه

باغلادي پيرِ موغان تکبير ايله زونّاريميز

سينه‌ميز باغيندا سئير ائت داغلار گولزاريني

باغباندير باغدان شاداب ائديب گولزاريميز

خوبلر پامالي اولدوق خاکِ راهين خوبلارا

سايه تک والي يئتيشمز کيمسه‌يه آزاريميز

8

مني دورِ فلک بير کامِ دلدن کامران ائتمز

بيزه بيرلوغما وئرمزتاعوض يوزباغري قان ائتمز

هومادن کؤلگه دوشمز باشيما طوفانِ آهيمدن

او باخيشدان بو مجنون باشينا قوش آشييان [ائتمز]

پريشان اولدو حاليم زولفونه بير آه اسديکجه

صبا اول سونبولو داغيتسا ائل حالي يامان [ائتمز]

کؤنگول گولزارحوسن ‌ايچره پريشان زولفونو گؤرگجك

وطندن اينجيييب ويرانه‌سين هرگيز مکان [ائتمز]

اگر اول بي‌وفادن ريشتهِ اوميديني اوزدي

بيليب والي کي طالئع اول نيگاري, مئهربان [ائتمز]

9

کؤنگلوموز کوي بلادن اؤزگه مأوا تانيماز

غؤنچهِ باغِ محبّت کؤلمک اصلا تانيماز

کؤنلومو طوغيانِ سئودا قازدي قاچ مندن رقيب

کوهکن سئودايه قيزدي خاک‌ و خارا تانيماز

ايکيسي بير نئشه‌دن مست اولدولار باعيث ندير

اولفت ائـيلر وحشيلر مجنونه ليلا تانيماز

دوست کويي عزم ائدن منزيل کسر موژگان ايلن

کعبهِ مقصود اهرام ائيله‌ين پا تانيماز

گر مني پروانه سر دؤندري ديندن بير پري

خوبلار سئوداسي والي پير و برنا تانيماز

10

آهيميزدان رؤوشن اولدو, کولبهِ‌ جانکاهيميز

شمع‌لر يانديردي گر گون تک شرارِ آهيميز

جاني جانان ائيله‌دي بير نازه قوربان عاقيبت

حاصيل اولدو ياريميزدان مطلبِ ديلخواهيميز

بو چمنده قيلميشيق آماده اسبابِ سفر

لاله تک خونِ جيگر دير زاديميز, همراهيميز

اينقيلابِ چرخِ‌خونپروردن ائي‌ديل فاريغ اول

خسروِ صاحبقران سلطان‌صفي‌دير شاهيميز

مرکزِ غم اولموشوق والي بو گون داييره تک

جؤوردور هر يانه گئتمک، لشکرِ غم راهيميز

11

غؤنچهِ لعليندن ائـيلر خسته کؤنلوم اشاش

واردير رزقي به منبعدن مگر ائـيلر معاش

مئهريني ايمان تکي ائلدن نهان ائتمه دئديم

طيفل اشک آچيب دئدي اسراريمي يوزونده فا [ش]

ساغ ايديم, فاريغ گزرديم, بيخبر, چکدي منه

غمزه‌لردن گيپريگي هر کوشه زخمِ ديلخراش

اوستخوانيمدن توتوشدي شؤعله‌لر موژگانيمه

عشق او ياشدان توبوشنده قوري ايلن ياندي ياش

گؤز ليباسي ائتمک ايچون کاروانِ اشک ايلن

يوره‌گيمدن پرنييانلر گلدي والي خوش قوماش

12

صبادن طورّهِ عنبرفيشاني آيه داغيتميش

نسيم اول نافهِ چين عطريني صحرايه داغيتميش

بضاعتدن دوشوب گئيميش قرا اول مردومِ چشميم

متاعين‌سئيله‌وئرميش‌ مايه‌سين‌سئودايه‌داغيتميش

سنين عشقينده جان تاپشيرماغيمدان خلقه اولدي فاش

که مجنون عؤمرونو بازيچهً ليلايه داغيتميش

نه مظهردير تجلاي جمالِ حوسنِ سلمي کيم

ضياِ مئهر تک انواريني دونيايه داغيتميش

منم والي ديارِ عشق سلطان سليمان تک

بساطيم اوزره آهيم، قوشلار تک سايه داغيتميش

13

خسته کؤنگلوم قوردي عؤمرو ناله ايلن بزمِ خاص

چيخدي تا گؤز رؤوزنيندن ناله‌دن اولدو خلاص

نوشداروِ سلامت خوبلر بيمارينه

خضر اليندن وئرسه عيسي في‌المثل وئرمز خواص

ائي محبّت نشأسي قورتار مني هر قئيددن

وي جونون شوري مني قئيدِ جهاندان قيل خلاص

بير نظردن ديده تؤکدي خسته کؤنلوم قانيني

مردومِ چشميمدن آلدي عاقيبت کؤنگلوم قيصاص

صيدقدن جان وئردي والي بوالهوس‌ليکدن کئچيب

تاپدي آخر آه و افغانيله عزِّ ايختيصاص

14

خوبلر زولفو دئيه‌ندن رشته ي جاندير غرض

صيدق‌لن زونّاري قوشماق قصدِ ايماندير [غرض]

گلسه جان تندن لبينه ايستر ايستيقبال اونا

ناوک‌ايلن چيخا جان تعظيمِ مئهماندير غرض

ائيله ‌مست اول کيم صوراحي تک لب ائتسين قهقهه

باده‌دن لايعقيل اولماق ذؤوقِ مستاندير [غرض]

حوسن ‌ايلن عشق اينکيساري دير فغان آز ائيله‌مک

عندليب آز ائتسه افغان نقصِ بوستاندير غرض

جانه شکّردن فزون دير لذّتِ جؤورِ بوتان

عشقدن والي تمتّؤع جؤورِ خوبان دير غرض

15

گئتدي هيجران اينقيلابي, گلدي دؤورانِ نيشاط

قويما الدن باده ساقي چرخدن قيل ائحتيياط

دودِ آهيندن سيپر قيل باشين اوزره کيم سنه

غم ياغار دايم فلکدن، چرخدن، ائنمز نيشاط

زادِ راهين گؤر کي، اولماز دهر ائيلنمك¬ يئري

سن مسافيرسن او يئرده چرخ پر ويران رباط

طاقِ کسرادن بو رمزِ عيبرت‌افزا دور صريح

کيم بو يئرده‌عئيش ايچون چوخ سالدي نوشيروان بساط

ائحتيراز ائت طور اينساندان اويان مجنون صيفت

يوخ وفا اينساندا والي وحش‌لن قـيل ائختيلاط

16

جماليندن ائدر ماه آسمان حيفظ

قديندن بوستان سروِ روان حيفظ

دولانير بئلينه هر لحظه زولفون

او آغير گنجي ائيلر شول ايلان حيفظ

روخون عئين الکماليندن فلکده

مسيحا ائيله‌ميش سبع المثان حيفظ

کؤنگول ايستر شفا نوشين لبيندن

شفادان اؤزگه قيلمير ناتوان حيفظ

ائدر بير گون نيثار اول خاکِ پايه

اونونچون والي ائـيلر تنده جان حيفظ

17

ائي ياتان قافيل سحردير مئيدن ائت کسب انتفاع

مشرق خم ‌دؤور ائدير خورشيدِ ساغر ارتفاع

ائي هواي نفسدن ناصاف لاي خم تکي

باطيني صاف ايله حدب ائت شؤعلهِ مئي دن شوعاع

ائي زولئيخاي هوسدن متّهم يوسيف کيمي

فتح قيل ميصر قناعت ملکِ فقر ائت انتزاع

مجتهيدسن عشق فيتواسيندا والي کيم سنه

علمِ مجنوندان ازل گون حاصيل اولدو اطلاع

18

مؤسومِ گولدور صبا تک بيل قنيمت سئيرِ باغ

لاله تک کؤکسونده ياندير يار ايچون داغ اوزره داغ

ائي خورامان سرو تک گولگشت گولزار ائيله‌ين

بيرزامان گل قيل منيم کؤکسومده هم گولگشت داغ

باشيم اوزره هورکونوب پرواز ائدن بولبول دئييل

روحِ مجنوندور مني ارشاد ايچون مسدن اياغ

بير پري‌نين زولفونو منظور ائديب چوگان صيفت

ائيله‌دي والي محبّت يولونا باشدان اياغ

19

جانيميزدان قمزه‌سي گر ايمتحان ائـيلر دريغ

مرغِ ديلدن کيپريگي بير اوخ هاچان ائـيلر دريغ

سهل‌دير گر اول خورامان سرو ايچون گؤز آخسا سو

سرو اياغيندان هاچان سؤز باغبان ائيلر دريغ

جانيمي وئرسم خيالين تاپيلاندا سهل‌دير

واريني مگر قوناقدان ميزبان ائـيلر دريغ

وصلدن بير لحظه شادان اولمادين ائحساني گؤر

بير زامانليق عئيشي بيزدن آسمان ائـيلر دريغ

ناوکي ايلنمه‌دي کؤنگلومده والي نئيله‌ييم

ميزباندان بير دم اولفت ميهمان ائـيلر دريغ

20

زاهيدِ سالوسي گؤر زهد و ورعدن ووردي لاف

ائيله‌دي خم تک ملوّث باطين ايلن اعتکاف

محتسب دؤرد خم ايلن باطيني صاف ائيله‌دي

زاهيدين کؤنگلي فسادتدن دئييل خلق ايله صاف

کاشف سيرّ حقيقت عشق‌دير، مفتي دايان

مذهبِ عشّاق ايله بيهوده ائـيلر  اينحيراف

اهلِ تجريد ائيله‌مز رغبت علايق قئيدينه

جيفه‌ني‌ زاغ و زغن تک اولامر عنقاِي قاف

مطلبِ اسلاملا کفر انجامي بير مطلوب ايميش

اولدو والي بي‌سبب مذهب سؤزي باب‌الخلاف

21

آچيلدي گول، گول ايله، گول انداميميز گؤرک

گول تک نگار ايلن دولو قيل جاميميز گؤرک

ساقي زمانه عادتي‌دير اينهدام جمع

وئر جمع ايکن پيياله نه ابراميميز گؤرک

يارين ضميري مطلع ايام مرات کشف‌دير

قاصد گئدرسه ياره نه پئيغاميميز گؤرک

دامِ بلا کؤنللره زولفون يارادير

بير لحظه يار زولفو ايلن داميميز گؤرک

ليلي‌لرين هاواسينا والي جونونيميز

کاميل اولاندا، شؤهرهِ اياميميز گؤرک

22

طبعِ جاهانا گلدي فئيضِ هوا مووافيق

يانديردي لاله مشعل آلدي قدح شقاييق

بير مئيدن اولدو سرخوش زاهيد برهمن ايلن

بيهوده کفر و ايمان آد ائيله‌دي خلاييق

شور جونونه اولدو بير عؤمر عقل ناصيح

آخير جونون مئيدن عشق اولدو عقله فاييق

هر يانا عازيم اولدون بير لحظه راحت ايچون

راحت يولونو کسدي انديشهِ علاييق

بو شيب مؤسومونده نورس جاوانلار ايسه

عشق بوتان دگيلدير، مه¬روي والي لاييق

23

بيردم اونون خيالي کؤنگولدن جدا دئييل

يارين خيال [لي] يار تکي بي‌وفا دئييل

بيکانه دير فونونِ جونوندن نيگاريميز

بي‌رحم کؤنگلو رحم ايله هئچ آشنا دئييل

پئيغاميمي صفاي ضمير ايله کشف قيل

محرم ار آه قاصد باد ‌صبا دئييل

مشکيل دوشنده حاجتيني ياره عرض قيل

کم کي اؤيمسه کعبه حاجت روا دئييل

والي بلاي  عشقيله بيمار اولان لاري

خيضر مسيح قيلسا مداوا، شفا دئييل

24

لاله‌لر هامونه چکدي عئيش ايچون والاي آل

قولـله ي کهساردن گؤرستردي فانوسِ خيال

سبزه ِي نورسته چکدي فرش‌لر فيروزه‌دن

سروِ نوخيزي خورامان ائيله‌دي بادِ شيمال

ائيله‌دي ظاهير يدِ بيضا صبادن شاخِ گول

گؤردو اعجازِ مسيحا ابرِ نئيساندان نهال

ساقييا دؤورانِ گولدور, مغتنم‌دير, مغتنم

ساغرِ صاف مرووقدن بو گون دفعِ ملال

قئيدِ دونيايه کسيل, عيسا کيمي گردونه چيخ

پايمالِ قئيدِ دونيا اولما, اولما پايمال

روزگارِ نامووافيق‌دن فراغِ بال ايلن

گؤرمه‌دن بير لحظه راحت کئچدي والي ماه و سال

25

فرسودهِ شيکنجه, جور و جفا کؤنگول

آواره‌گردِ دشت جونون بينوا کؤنگول

آچيلمادي ترشّح ابرِ وصالدن

پژمرده قالدي لاله ِي دشتِ بلا کؤنگول

دايم گئيه‌ردي کيسوتِ کؤنگول فراقدن

داغ اوسته داغدان گئيه‌ر اولدو قرا کؤنگول

خاکستر اولدو عشق اودوندان و يانديم دئمز

آيينه‌سين بو نؤوو‌عله وئردي جلا کؤنگول

جور و جفادن اؤزگه گولستانِ عشقدن

بير لحظه وئرمه‌دي گول مئهر و جفا کؤنگول

بيگانه‌لر تک اولدو جلا گنج سينه‌دن

اولماز بو تار سينه‌يه بير آشنا کؤنگول

والي صفاِي عشق ايله صرف اولدو نقدِ عؤمر

آخر بو مؤحنتي بيزه گؤردي روا کؤنگول

26

ائي ديل گذارِ عشقده جيسمين نزار قيل

اکسيرِ عشق‌لن مني کاميل عيار قيل

نرگيز، گؤزي آغاردي رهِ اينتيظارده

ائي سرو ناز، باغا خورامان گذار قيل

آچيلدي غؤنچه‌لر منيم آشوفته کؤنلومو

ائي گول نسيمِ وصل ايله خرّم بهار قيل

هيجران شبي اوزاق کئچر ائي آهِ آتشين

خورشيد تک بو ظولمتِ ليلي, نهار قيل

عطر دماغ ساليکِ راه ايچون, جونون

والي هواِي يارده جيسمين نزار قيل

27

بلاکئش جانيمي اول نرگيسِ بيماره تاپشيرديم

پريشان کؤنگلومو اول زولفِ عنبرباره تاپشيرديم

کؤنول‌اول باغِ‌حوسن‌آشوفته‌سي‌دير قييما کيم‌من هم

بو نالان عندليبي عئيش ايچون گولزاره تاپشيرديم

بيندي نامه ي اعماليمي ايزد بو مضموندان

کي من ايماني اوول حلقه ي زونّاره تاپشيرديم

دوشوبدور جانينا مين يئرده اخگر اول زاماندان کيم

فلک تنبيهيني من آهِ آتيشباره تاپشيرديم

سراپاي ووجودوم داغ‌لن گولزاردير والي

تنِ بيماريمي داغِ غمِ ديلداره تاپشيرديم

28

رقيب ايلن محبّت رازني تا برملا قيلديم

نواي وصلدن بيچاره کؤنگلو بينوا قيلديم

گل ائي منعييم قيلان, بازارِ روسواليقدا شانيم گؤر

کي مجنون تک يئل آتان داشلاري خونِ منا قيلديم

گذارِ عشقدن جيسمِ ضعيف و رنگ ‌زرد آلديم

بو کاميل نوسخه ي اکسيريميزدن, ميس، طلا قيلديم

آپارديم بير نيگارين مئهريني توپراغا ايمان تک

اونو سرمايه ي آساييشِ روزِ جزا قيلديم

جونونِ عشق‌لن تدبيرِ عقلين ربطي يوخ والي

بو دعويلردن اؤتري عقل‌لن چوخ ماجرا قيلديم

29

ياش مايه‌سيني ديدهِ پرخونه يئتيرديم

گؤز مردوميني اوزمگه جئيحونه يئتيرديم

عشقينده يووا توتدي منيم باشيما قوشلار

القصّه جونون مشقيني مجنونه يئتيرديم

آهيم علم و داغِ جونون تاجِ کيياني

غم کشوريني ملکِ سليمانه يئتيرديم

چرخ اوزره ملاييک منيم افغانيما آغلار

گؤر مرتبه‌مي, عشقده گردونه يئتيرديم

هر داغِ جونون کؤکسومه‌دير مؤهرِ سليمان

والي رقمي، مؤهرِ همايونه يئتيرديم

30

آچيلمادي گؤنگول بو خزان و بهاردن

دينج اولماديق زمانه ي ناسازگاردن

ياد اولدو, ياد ائتمه‌دي يار, ائي نسيمِ صؤبح

اسديکجه بير خبر يئتير اول گول عذاردن

مجنونه پستي خارِ جفادن گولِ مراد

بولبول شيکايت ائيله‌مه‌‌سين رنجِ خاردن

ساقي خومار خئيلي هوجوم ائيله‌دي, بيزي

بير لحظه فاريغ ايله‌ غمِ روزيگاردن

دفعِ ملال ايچون مئيِ گولگون حلال‌دير

والي نه بولدون ايشته بو زهد و خوماردن

31

عشق سئوداسي قيزاندا چوخ اريشديم داغ‌ايلن

رؤوزن آچديرديم کؤنگولدن سينه‌ميز ديرناغ‌ايلن

باشيميزدان بولمادي تسکينِ محبّت شؤعله‌سي

باشه سپديم مونجا اود، ار اولمادي توپراغ‌ايلن

عشق سئوداسي قيزاندا طورفِ هاموندور علاج

کوهکن بيهوده ايامي کئچيردي داغ‌ايلن

عندليبين کؤنگلو گول ايامي ايندن آچيلير

يوخسا مستِ عشق اولان کؤنگلو آچيلماز داغ‌ايلن

خالِ مشکين اول مهِ روخساره والي ياراشير

گؤز قراسيندن ايراق اولماز ياقشمك آغ‌ايلن

32

سونبول آچميش¬ساچيني مجنون ديل ناشاد ايچون

لاله خونين دير داغِ غمِ فرهاد ايچون

پيرِ کنعاني زولئيخادان شيکايت قيلماسين

يوسيفي بازار چکدي عشق جذبي آد ايچون

سورمه‌دن سور کيم اول تحريک موژگاندن بو صئيد

نيم‌بيسميل مضطريب‌دير خنجرِ جللاد ايچون

سورمه‌دن مشّاطه وئردي آب و رنگ اول نرگيزه

يئنگيدن پئيکان سواردي ناوکِ بيداد ايچون

پنديني ناصئح بيزه والي عجب صرف ائتمه‌سين

ائيله‌مز [افسون اثر مجنونِ] مادرزاد ايچون

33

مني مجنون ايچون مئي‌دن کؤنگل مست و خراب ائيله

جونون مقصوديني ديوانه‌لردن ايکتيساب ائيله

بيزيم تخميريميز خاکِ خرابات ايله مئيدندير

بيزه زاهيد دئيير کيم تؤوبه قيل، ترکِ شراب ائيله

کؤنگول‌اول‌ناوکِ موژگان ايچون اودلاردا دير,سن هم

بو بيسميل صئيدي موژگان شستينه گزدير کباب ائيله

سحر گل گؤر بياضِ سينه‌سيندن صؤبح تأثيري

تماشاي طولوعِ صؤبح و نور آفتاب ائيله

دئييردين گؤرمه‌ميشکن يوزونو کئچ عشقدن والي

گل ائي منعيم قيلان شيمدي بو ايشدن ايجتيناب ائيله

34

مؤوسمِ گولدور صوراحي تک سوجود ائت ساغره

دم‌به‌دم خونِ دروندان مايه وئر چشمِ تره

جان اگر جاناندان اؤتري مضطريبدير ساخلا

اول متاعِ لابقادير تاپشير خوبلره

نقدِ ايماني اوتوزدوق زولفونه خون ائيله‌دي

عشق مفتيسي موباح، ايمان اوتوزدون کافره

گؤردي ياتميش اوستخوانيمي هوما آتيب- توتور

عاقيبت سوزِ محبّتدن يئتيشديک بير يئره

مورغِ ديلدن دانهِ ايسپند خالين حيفظ ائديب

سونبولِ تردن چکيبسن آيه هر سو تبخره

ياره شرحِ شؤوقِ وصلين, والي ائـيلردي رقم

اولدو چون مضموني ظاهير دوشدو آتش دفتره

35

تا عندليب قونمادي يا گول بوداغينا

آشوبِ عشق سالمادي سئودا دماغينا

گؤز دئر حيس ائتمه‌يينجه کؤنگول جيلوه تانيماز

آخار حوسن جيلوه‌سي عاشيق سيراغينا

بير صؤبح باغِ عئيش بوداغيندا گلمه‌دي

اوخشاتمايانا غؤنچهِ ياردن دوداغينا

سودان نيياز رسميني اؤيرن بو باغدا

بير سرو ناز قانيخه  باش قوي آياغينا

احواليمي نيگار خبر يشتي غئيردن

والي يئتيشدي نالهِ زاريم قولاغينا

36

کرم قيل فصلِ گولدور ساقييا وئر جامِ گولگوني

بو دولو جاميلن قيل ياد جمشيد و فريدوني

شرابِ حوسن ليلي بيخود ائتدي قالدي ذؤوقوندن

بو سرخوشلوقدا چوق ياتي, اويات بير لحظه مجنوني

نئديم پروانه‌نين خاکيستريندن عشق سوز ايستر

دئييل معشوقه‌ميز بير جانچون عشّاق ممنوني

منيم‌لن مردمِ چشميم رقيب آلميش کي تا يازديم

اونون سئيلابي گلدي نامه‌دن آرتيردي مضموني

سنين سئيلِ‌سرشکين‌سدِّ موژگان ساخلاماز‌ والي

هاچان خاشاک ايلن يول باغلار اولدو کيمسه جئيحوني

37

شمع‌دير يارين جمالي روحوموز پروانه‌سي

کؤنگلوموز آتش‌پرست و سينه آتشخانه‌سي

خال و خط مشّاطه چکدي آتشين روخسارينا

آتش ايچره عشق‌چون اکدي محبّت دانه‌سي

کؤنگلوموز زنجيرِ زولفوندن رها ائتکج دئدي

اوصلو اولماز تا قييامت خوبلر ديوانه‌سي

گر سني آغريتسا بير درد, ايسته کؤنگلوندن شفا

ساييلير آرتـيق فلاطوندن جونون ديوانه‌سي

گؤزلريندن بي‌سبب والي آخار سئيلابلار

عاقيبت جئيحون اولور شول سئيلدن ويرانه‌سي

38

ناميه شاهيدلري ساز اولدو بوستان ترله‌دي

نرگسِ بيماره او ياندي خوش آسان ترله‌دي

ابرِ نئيسان سوتيني تا ايچدي اطفالِ نبات

چؤهره قونداقدان چيخاريب لاله‌لر قان ترله‌دي

هانسي مئيدن قيزدي اول روخسارِ نازيک گول تکي

شبنمِ آبِ بقادان ماهِ تابان ترله‌دي

اول گولِ روخساردن تر خاکه دامدي بيسميلين

لاله‌تک خونين کفندن چيخدي عريان ترله‌دي

بير نگاهِ گرم قيلدي والي اول گول عاريضه

ياندي حسرت آتشينده اولدو بريان ترله‌دي

4 پاسخ

  1. بیلیدیی کیمی آوشار تورکلری سلجوقلولار دونمینده ن کیرمان دا یاشاماقدادیرلار.. من بئله حساب ائدیرم والی ده آوشار تورکلرینه منصوب دورلار…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *