چئویرن: رضا جوان
ترجمه: رضا جوان
رضا جوان

بوتون قورخوم یوخولاریمداندی، قورخورام یوخولاریم چین اولا. ‌یاتاقدا یانیمدا یاتان افسر دئییردی، دانیشیرسان یوخودا. ‌سرحددن ایشیمی آلیب گلدیم بورا. ‌اؤزومو گؤتوروب، شهردن شهره‌ قاچیرام. ‌ایچیمده‌کی اوغلان دیشلرین آغاردیر. ‌میمیکینده‌ اؤزوندن قاچانمارسان دئیه‌ بیر ایفاده‌ وار. ‌بیر آیدان چوخ اولار اینتیقال مکتوبوما قول آتیب سازمان. ‌سرحددن قورتولوب شهره‌ گلدییمده‌ سئوینیردیم. ‌قورشون یئییب، قوردا قوشا یئم اولان قازول قوخولو قاچاق آتلارین، اؤلرکن گؤردویوم سون باخیشلاری، هئچ واقت سیلینمه‌یجک بئینیمدن. ‌قاردا باتیب قالان، یاریشمایا قاچاقلانان دوه‌لرین سکسکه‌لی نفسلری یوخولاریما تیکیلیب. ‌قورخولارلا دولو بو سرحددن، یاشام دولو شهره‌ گلمیشدیم. ‌نه‌ قدر ده‌ تک اولسام، بو بویوک شهرین سسینده‌، ترافیکینده‌، سازمانین گیزلرله‌ دولو دوسیالاریندا ایتیلیرم. ‌گئدرکن هر شئیدن چوخ اونو گؤتوردوم. ‌چانتام دا تکجه‌ دیرلی شئی، گول پنبه‌‌نین یادیگارلاریدیر. ‌کتابلاریلا، یاپیشدیردیرماق اوچون منه‌ تاپشیردیغی، قیریلمیش قولباق. ‌کورلانماسین دئیه‌ ایشلتمه‌ دیییم زیپو فندک. ‌تزه‌ مامورییتیمین ایبلاغین کلهر گتیریب قاپیدان وئردی. ‌سوبای، اورتا یاشلی، یورولماز، یئتیک و یاشامیمدا گؤردویوم ان مرموز آدام. ‌گلندن دانیشدی. ‌اؤزو دئمیشکن ایچ ائله‌دی قویدو اورتایا دورومو. ‌”بو قاچاق چته‌سی ایکی ایلدیر گؤز آلتیندا، بورا سرحد ایله‌ فرقلیدیر. ‌سرحدده‌ برجکدن هر یئری گؤرورسن، بوردا هامی سنی گؤرور، گیزلیلیک هر شئیدن اؤنملیدیر. ‌آز دانیشمالیسان. ‌سورغوریا سورغویلا جاواب وئرملیسن. ‌هر آن دییشیکلری یوللامالیسان بیزه‌. ‌هئچ وقت شوبه‌ه‌لنمه‌. ‌آلدانما. ‌ایش یئرلری شهر گیریشینده‌، یوردشاه‌ دئییلن یئرده‌ بیر زئرزمیدیر و . ‌. ‌. ‌. ‌”‌‌ چوخو یادیمدا قالمادی. ‌دالبادال دئییب دوسیالاری قویوب، گئتدی. ‌گئدیب یئرده‌ یئرلشدیغیم ائله‌ بیرینجی گون، ایستمه‌دن بایدیرمیشام. ‌
نئتده‌ بو مکاندان بیر ویدیو یاییلیب. ‌یاییملانان ویدیودا من ده‌ وارام. ‌اولمامالییدیم. ‌دوز اورتادا دورموشام. ‌وایرال اولوب ویدیو. ‌هارداسا بیر قیز ائله‌ بئله‌ سی، کئف هاواسی اؤز بسله‌دیغی ماهنی-نی اوخویور. ‌گؤزلری بوردا گؤیه‌ چالیر. ‌نئونلارین ایشیغیدیر سانمیشدیم. ‌آما اؤز گؤزلریدی. ‌موبایلی الینده‌، اوزونده‌کی سایماماز او گولوشویله‌ اؤز ویدیوسونا باخیر. ‌گؤزلرینده‌کی نارسیسم ایشیلدیر. ‌
دئییرم: ‌”‌‌آد چیخارتدین ها. ‌ایسته‌ میسن تزه‌ یازدیغین رپی اوخویاسان؟”‌‌ گؤزلرین ایریدیب دئییر: ‌ “‌‌بوردا؟”‌‌ آیی اوزالدیر. ‌ دئییرم: “‌‌سؤزلری ده‌ اؤزون یازدین؟”‌‌ دئییر: “‌‌به‌یه‌نیلیب ائله‌ بی!”‌‌ قارسون گلیر، الینه‌ بیر پیتیک وئریر. ‌بار صندلیندن سوروشوب دوشور یئره‌. ‌گئدرکن دؤنوب گؤز وورور. ‌سَرکَرده‌ گلیب کسین. ‌قوناقلاری وار. ‌اؤنملی قوناق. ‌کلهر قوزو گؤزله‌ین قورد کیمی دیشلرین بیر ایلدی بو گون اوچون ایتیله‌دیب. ‌ماموریتین اصیل آماجی، سرکرده‌نین توتولماسی-دیر. ‌ایچیمده‌کی سس دئییر: گلمه‌سیدی ، گئجیکسیدی. ‌بیراز زامان وئرسیدی. ‌بیر نئچه‌ گون بئله‌ یئتردی. ‌گولپنبه‌ اولسایدی دئیجکدی: “‌‌بو فیروغون قیز کیمدی؟ او قدر آدامین ایچینده‌ بوننان نییه‌ دانیشیرسان؟ ”
ایچیمده‌کی سؤزلری یئییرم. ‌کاغاذ کیمی چئینیرم. ‌سرکرده‌ گلنده‌ بورا، میزی تتو دؤشویر. ‌معامله‌ده‌ کسین یانیندا اولمالیدی. ‌اَلیمده‌ اولسا گؤرر- گؤرمز، بو سرکرده‌ دئدیکلری گده‌نین بئینینه‌ سیخارام. ‌تَتو گؤزومون قاباغیندان یاواشجاسینا آخیر گئدیر. ‌قارسون ایسکورت ائلیریانیجا. ‌مَجمَه‌یینی اؤزو دوزوب . ‌قیسسا گیپور دونوندان آیاغینداکی تَتو گؤرونور. ‌تتودا، گؤزلری چکیلی مینیاتور بیر قیز چنگ چالیر. ‌اونا گؤره‌‌ده‌، اول گوندن تاخما آدین تَتو قویوب سازمان. ‌لیوانین قالانین ایچیب فیکریمی داغیردیرام. ‌ایستمیرم قالانین دوشونوم. ‌تتو سالونون دیبینده‌ دومانلارا قاریشیب یوخ اولور. ‌اودادان اوزون ه‌یریلداما سَسلری گلیر. ‌گؤزلرینین گؤیو آزالیب. ‌بو رنگه‌ آد قویماییبلار هله‌. ‌دئییر. ‌”‌‌صینیفداشلاریم دئیردیلر سنین گؤزلرین هر فصیلده‌ بیر رنگه‌ چالار. ‌گؤی، تورکوواز، -آچیق گؤی، توتقون گؤی. ‌”‌‌ دئییرم: “یانیق گؤی. ‌”‌‌هامیدان چوخ یانیق گؤیه‌ چالیر. ‌گولومسه‌‌ییر. ‌”او نه‌ رنگدی. ‌اوغلانلار گؤرن رنگلردندی ؟ “‌‌ . ‌دیلی ‌ایله‌ قامیشین اوجون یالیییر. ‌یالان دئییرم آما. ‌تکجه‌ گولپنبه‌نین گؤزلرینده‌ گؤرموشدوم یانیق ماوینی. ‌ایلک دَفه‌ من سئزمیشدیم او رنگی. ‌پاییز قفیلدن گلمیشدی. ‌پنجره‌دن باخدیغیندا ایکی گؤیرچین اوچوشوردو گؤزلریندن گؤیه‌. ‌بیلیم یوردوندان پیادا قاییتمیشدیق او آخشام. ‌قالدیریملار اوزانیردی آددیملاریمزلا. ‌چینار یارپاقلاریندا گیزله‌نن او پاییز، یئره‌ یامسینیب گؤزلرینده‌کی گؤزلویون پرده‌سینه‌ دوشوردو. ‌او گئجه‌، نه‌ قدر یولداشلاریما دئدیم اینانمادیلار. ‌درگینین توپلانتیسی اولان گون بئله‌ گؤرستدیم. ‌اونلاردا سئزمدیلر دئدیم هر فصیل دییشیر گؤیو. ‌توتوشان اودون آلوولارینین ایچینده‌کی گؤی. ‌دلیسو گؤی. ‌عاصی گؤی. ‌گؤی دئییب گئچمه‌یین دئدیم. ‌گولدولر. ‌یوخسا قاروولوق توتموشدو گؤزلریم؟ دئییرلر بیر طئیف بویالاری گؤرمک اوچون، بیر سیراسینی گؤرمه‌مه‌لیدیر گؤز. ‌منده‌ باشقا بویالار، کور اولموشدولار. ‌گولپنبه‌ دئدی: “هانی ماوی! ساده‌جه‌ ایشیقدی بیرآز گؤزلریم. ‌”‌‌ نه‌ قدر زامان کئچیب بیلمیرم. ‌صفحه‌- صفخه‌ بیر آلبوما باخیرام سانکی. ‌باخیشلاریمیز توش گلدیینده‌، قاچیردیر گؤزلرین، سانکی بوردان قوپوب اوزاق بیر اورماندا ایتیلیر گؤزلری. ‌قامیشی باتیریر لیوانین دیبینه‌، منه‌ باخیب بیردن اؤزونه‌ گلیب گولور. ‌گولوشون دوندوروب ساخلییاسیم گلیر. ‌بو سئری ده‌ گولسه‌، گولوشون امه‌جم. ‌کاش آداملاری اولماسا دا، گولوشلری دونداریب بیر الکل شوشه‌سینده‌ ساخلاماق اولاردی. ‌ایلانلار کیمی. ‌گولپنبه‌-نین گولرکن، بورخولان دوداقلارین ساخلاردیم اوندا. ‌یادا ایشیق گؤزلرین. ‌یئتردی منه‌. ‌بوجور بئینیمده‌ دوروب بیر سس کیمی داشیمازدیم. ‌ایچیمده‌کی سسلری ائشیدیر دئیه‌ قاشلارین دویونلور. ‌– “‌‌ بورداسان سن؟ هارا گئتدین؟ اؤزونده‌ دئییلسن! سو وئریم؟ قییامت اولماییب کی، دنیزلر کؤچور گئدیر بو شهردن، آداملارا نه‌ وار کی. ‌گلندن بوزوبسن دوداقلارین. ‌”‌‌ دوشونورم نه‌ جور بئینیمی اوخویوب بو قیز. ‌یوخسا اؤزوم دئمیشم گولپنبه‌نی. ‌بیلمیرم. ‌خاطیرلامیرام. ‌بو سالونا گیرندن بئینیم کئیه‌لیب. ‌هاوایا بیر شئی قاتیبلار کسین. ‌زامان دوروب. ‌کلهرا یازمیشام نئچه‌ وقتی بوردایام؟ گونلرین سایی الیمدن چیخیب. ‌جاواب گلمییب. ‌یوخسا بورادا زنداندی می؟ او اونلارجا گیزلتدیکلری زیندانلاردان بیری. ‌زامان یئریمیر. ‌دئییرم: “یاتمیشدیم؟ “‌‌ دئییر: “‌‌هه‌ یاتاندان بری باغیریسان”‌‌یوخسا ایچیب دانیشمیشام. ‌اورتامی دئییشسین دئیه‌ دوداقلارین یووارلاق ائدیب قامیشی باتیریر اوزون لیوانین دیبینه‌. ‌”من دیبینه‌جن ایچهرم. ‌قالسا قیجیغیم گلر”‌‌ دئییر. ‌قیجیغین نه‌ اولدوغونو دوشونورم. ‌سوروشمورام. ‌لیوانیمدا اولان بوزلارین بیرین گؤتوروب، بوینوما سورتورم. ‌الیمده‌ اَریییر. ‌ایچیمه‌ داملیر بو هاوالار. ‌ماوی گؤزلر خورما رنگلی توکلر. ‌هاواداکی سیس. ‌آجی آدکولونلارین قاریشیق قوخولاری. ‌ایچینده‌ SHE وار. ‌شی آدکولونو بوردان آلیر منی. ‌گؤتورور کئچمیش گونلره‌. ‌یانمیش روس آغاجی، وانیل، بلوط، هامیسی تامسینیر بورنوما. ‌کاش قوخولار سیلینردی بئینیمدن. ‌اونلار سیلینسه‌، قارالتیلاردا یوخ اولار. ‌
اؤلموش بیر دیلین سؤزجوکلرینه‌ بنزیر، اوزاقدان گلن بو ماهنی سسی . ‌هردن یادیمنان چیخیر بوردا اولدوغومون ندنین. ‌اوتورانمیرام آرتیق. ‌او آما راحت اوتوروب. ‌دئییرم: “‌‌تزه‌ یازدیغین رپی اوخو. ‌”‌‌ دئییر: “‌‌بوردا اولماز، او سئری گؤرمدین نولدی”‌‌ بارماقلاریلا نوتلاری، بیرده‌ دیلینده‌ ه‌وججوله‌ین سؤزجوکلری توتوشدورور. ‌یاواش اوخویور. ‌دوداق آلتی پیچیلدیر. ‌ائشیتمیرم. ‌باشا چاتدیغیندا گؤزلرینین ایچی ایله‌ سوزور منی. ‌گؤزلری چوخ دریندی. ‌هر سئریسینده‌ بیرآزدا ییغیشیرام. ‌بارماقلاری میزده‌ اوینارکن، لا ر می فا ررر لا لا سی. ‌. ‌. ‌”چوخ پیس باخیسان آداما”‌‌ دئییر. ‌بیراز دا ییغیشیرام اؤزومه‌. ‌یئنه‌ هاوادان بیر شئیلر داملیر ایچیمه‌. ‌چیسکین هاواسی وار سالوندا. ‌اؤزومو وورورام او یولا. ‌”من؟ یا سن؟ “‌‌دوداغین قاچیردیر. ‌بارماقلاری سی لابئمول اوسته‌ دورور. ‌“‌‌اوزه‌ باخ! “‌‌ دئییر. ‌لیوانیمداکی بوز چاتدیر. ‌–”بیده‌ قولاق آس گؤر بیرینجی خوشدی یوخسا ایکینجی؟ “‌‌الیمی قویورام میز اوسته‌، بارماقلاریمی آییریرام. ‌دیشلری ایله‌ بیچاغی آچیر. ‌”قورخسان گؤزلرین یوم. ‌”‌‌ یومورام. ‌چیلیک بارماغیمدان سولو بارماغیمین آراسیندا دوروب بیچاق. ‌بارماقلاریمین آراسیندا دؤرد یئره‌ دییر بیچاغین اوجو. ‌یئیینلشیر، گؤروشمور بیچاق. ‌آغریلا- قان ایلا قورتولان بو سؤزجوکلر دریمده‌ تامسینیر. ‌قیزدیرمام بارماقلاریمنان ائشییه‌ فیشقیریر. ‌گؤزلریمی قورخا – قورخا آچیرام. ‌صندلده‌ کیمسه‌ یوخ. ‌یوخ اولوب یئنه‌. ‌
سرکرده‌ آریقاناق، اوزون‌سوو چیرکین، اورتا یاش بیر کیشی‌ دی. ‌بوزومتول کوت شالوارایلا باشقالاریندان سئچیلمیر. ‌سول قیچی آخسییا- آخسییا، ایفاده‌ ایله‌ پیلله‌ لری یئنیر. ‌اؤنجه‌ وئرنی باشماقلاری گؤرونور، سورا آیاقلاری، سورا توپ ساققال اوزو. ‌یانینداکی ه‌وققا بورون اوغلان آیریلمیر یانیندان. ‌ساغ الینده‌ دوروب. ‌بیر ساهات سوراسین دوشونوب، گولماغیم توتور بو بویدا ایفاده‌‌یه. ‌
کلهرا کد ۱۱ یازیرام مئساژدا. ‌ آما گؤندری وورمورام. ‌ارینیرم. ‌بیر شئی دور دئییر ایچیمده‌. ‌ایکی یول آیریجیندایام. ‌بو ایشده‌ هر شئیدن قاباق، اوز وئره‌ بیله‌جک ایمکانلاری دوشونمه‌لییم. ‌بئینیمده‌ خریطه‌لر دولانیر. ‌گولپنبه‌ اولسایدی دئیجکدی: “‌‌چوخ تنبلسن. ‌آغزین آی آپاریب یئنه‌؟”‌‌ دوز دئییردی. ‌آغزیمی آی آپاریردی، گؤزلریمی ایسه‌ بویالار، قوخولار، ایمگه‌لر، آجیلار. ‌بونلاری کیمسه‌ ایله‌ دانیشانمیردیم. ‌ائشیک چوخ یئیین ایدی من ایسه‌ یاواش. ‌ایچیمده‌کی ساهاتلا ائشیکده‌ آخان زامان توتوشموردو. ‌ه‌میشه‌ گئجیکیردیم. ‌ه‌میشه‌ آی آپاریردی منی. ‌ایچیمده‌ بو زامان ایچیندن قورتولماغا، بیر چابا چکیردی اؤزونه‌ منی. ‌بیلمیردیم هاچانداندیر یئرآلتیندایام. ‌آرتیق منده‌ دونیانی او چنگ چالان گؤزلری چکیلی قیزین گؤزلریندن گؤروردوم. ‌ایکیمیزده‌ بیر تَتودا دوستاغا چکیلمیشدیک بلکه‌ ده‌. ‌بارماغیم گؤندر اوستونده‌. ‌وورسام، آنسیزین تؤکولجکلر بورا اوشاقلار. ‌هامینی توتاجاقلار، کیملیییمی باشقالاری بیلمسین دئیه‌، منی ده‌ توتاجاقلار یالاندان. ‌چاتیشسالار آدام دا اؤله‌ بیلر. ‌ایچریدن گولوشمه‌ سسلری دورمادان گلیر. ‌بیری گئچینیر گولمکدن. ‌ایکی نفر حوکم اوینور. ‌سالونون دیبینده‌ بیلیارد توپلاری توققوشورلار، سورا داغیلیرلار میزه‌. ‌توستوده‌ اوخونمور توپلارین نومره‌لری. ‌یورقونام. ‌بو ماموریت قورتولسا مرخصی آلاجام. ‌صاباح کلهروینان تیراسدا اوتوراندا، دئیجک: امنیت چؤرکدن واجیبدی. ‌بیز توپلومو قورویوروق. ‌ایشیمیز امنییتدی. ‌ایکینجی پئیکیده‌ ایشیمیزین قوتسال اولدوغوندان دانیشیب، خائنلری سایاجاق اولدن. ‌منیم ده‌ یادیمنان چیخاجاق گؤیومسوو او درین گؤزلر، یئنیجه‌ بسلدیغی و تکجه‌ منه‌ اوخودوغو سون رپی خاطیرلامییاجام. ‌بارماقلاریمین آراسینداکی بیچاغین ایتیلیغی. ‌تتوسونداکی چنگ چالان گؤزلری چَکیلی قیز. ‌هامیسین اونوداجام. ‌آما چیخماسا؟ هر سئری هاچان حبسدن قورتولاجاق دئیه‌ سوروشاجام. ‌سون بسلدیغی رپی، هئی گلیب بئینیمده‌ دوروب، بارماقلاریمین آراسیندان آخیب گونده‌ لیکلریمده‌ یوخ اولاجاق. ‌کسین او اون بیردندی هر شئی. ‌یوخولاریما گیرجک اون بیر. ‌نه‌ قدر نحس بیر سای ایمیش دئیه‌ دوشونه‌جم. ‌بیلیرم ۱۱-ی یوللاماسام دا، آنسیزین گَلَجک لر. ‌ها بوگون، ها صاباح. ‌صاباحا ساخلاسام، گئجه‌ بیرده‌ کئفله‌ نریک. ‌سون یازدیغی رَپی منه‌ ‌ده‌ اوخویار. ‌اوتوروب ائدیت ائدهریک. ‌یامانلارینا گولریک. ‌
کلهر دئییر: “‌‌نییه‌ بو قدر یوبالدیسان؟ ایستخاره‌ ائلیسن؟ بیر لحظه‌ شوبه‌ه‌ لنیب، وورسایدی او بوش بئینیندن. ‌اوندا بیلردین! سن هاچان توجیه‌ اولاجاقسان؟ فیکر ائلیسن رحم ائلرلر سنه‌ ؟ اوتوروب خاطیره‌ دانیشیسان اونا. ‌او رپر دئییل. ‌او بو قاچاق چته‌لرین، اَن اؤنملی رابیطیدی، هئچ دوشونموسن بو یاشدا قیز، بوردا، بو دییوثلارین ایچینده‌ . ‌. ‌. ‌”‌‌ دانلاییب-دانسیماقدان دویمایاجاق کلهر. ‌دالبادال ایچیب کئفله‌نیب دئیینجک. ‌بلکه‌ ده‌ کلهر دوز دئییر دئیه‌ دوشونوب اورییم اوشویه‌-جک. ‌
منه‌ رحم ائلردی می؟ . ‌توفنگی ایله‌ وورارکن دوروب بیرده‌ سوزردی می منی؟. ‌بئینینده‌ کی نوت-لار لا سی لا سی دو را دئیه‌، سؤزلر نوتلارا نوتلارایسه‌ سؤزلره‌ قاریشیب، بیر قملی قیغیلجیم یاناردی می ایچینده‌؟ منه‌ اولان دویغوسونا یئنردی می؟ کلهر دئییر: “ماموریت لریمده‌ راسلادیغیم آداملار سان کی بیر بیرینین قالانیدیرلار. ‌قوشا دونیالار کیمی دیر هر نه‌. ‌”‌‌ دیلیم یاپیشیب داماغیما. ‌بلکه‌ ده‌ او گول پنبه‌ کیمی دَئییل. ‌گول پنبه‌ آجیمازدی. ‌سون دَفه‌، آراباینان دالیمجا گلنده‌. ‌آددیملامیشدیق او سیرلی داغی. ‌قاییداندا منی ساری تاکسی لارین دوراغینا قدر آپاریب یولا سالمیشدی. ‌آد گونونه‌ آلدیغیم ساهاتی الی ایله‌ گئری وئریب دئمیشدی “‌‌ باخ بی “‌‌ گولپنبه‌ باخ بی دئینده‌ الیمده‌کی بوتون درگی پارچالاری تؤکولردی یئره‌. ‌ایلک گؤردویوم گون کیمی، گلیب اؤنومده‌ دوراردی. ‌درگی‌نین ایلک گونلری کیمی قورخاردیم. ‌بیلردیم پیس بیر سؤز، بیر خبر یولدادی. ‌او گون دئمیشدی: “‌‌سازمان دئییب سنین کؤلگن منیم حایاتیمدا ایکن اؤزومه‌ تصمیم توتانمییاجام. ‌سنی اونوتمالییام. ‌”‌‌ آرابانین قاپیسین آچیب یوخ اولموشدوم. ‌یاریدا دؤنوب دالیما باخدیقدا گؤرممیشدیم. ‌منجه‌ کابوس کیمیدی، دؤنوب دالییا باخیب و بیرینی گؤزلرکن کیمسنی گؤرممک. ‌گئرییه‌ باخماق فوبیاسینا دؤنوشموشدو ایچیمده‌. ‌او آخشام خیاوانلاری دولاندیم. ‌اؤزومو ایتیردیم شهرده‌. ‌یورولوب، شهردن گئچن چایین قیراغیندا اوتوردوم. ‌آدام تک قالدیقجا ایلان کیمی دری سالار. ‌قابالاشار، من سالمادیم آما، دئدیم بونو دا گئچسم، قورتولارام. ‌آدامی اؤلدورمه‌ین یارالار، گوجلندیرر. ‌آما ائله‌ دئییل. ‌هر بیر یارادا، بیر بؤلومو اؤلمه‌‌یه باشلیر آدامین. ‌یاواشجاسینا اؤلورسن. ‌قیریق- قیریق ایمگه‌لر یادیمدا او گوندن. ‌داغ. ‌سو. ‌بوغدالیق. ‌بارماقلاری گؤیده‌ سؤزجوکلری چکن قیز، چکدییی بالیقلار، چای، سو هامیسی هاوادا قالدی او گون. ‌کؤلگمین ریسکلی اولدوغونو دوشونمه‌ میشدیم هئچ زامان. ‌ایچیم بوشالدی. ‌بیر دؤیدورمه‌ ایزینی سیلمک آغریسینی یاشادیم. ‌قولومدا کی تتو کیمی. ‌خال دؤین اوغلان دئمیشدی: – سیلماغین آجیسی وارها! گئت فیکیرلرین ائله‌ سورا گَل. ‌اول اسیدی تؤکه‌جم. ‌سورا درینین اوزون قاشییاجام. ‌سورا یئنه‌ اسید تؤکوب ایکینجی قاتی قاشییاجام. ‌دریم آجیشیردی. ‌ایستی، دریمدن گیریب گؤزلریمدن پوسگوروردو. ‌
دئدی: دئمدیم اینجییه‌ جک؟ ‌دئدیم “‌‌یئری قالدی؟”‌‌ “هله‌ بللی اولماز. ‌زامان گؤرسدر بیر ایزین قالیب قالماماغینی. ‌چوخوندا ایزی قالار، گره‌ ایستی ایستی باشقاسین دؤیدورَسن. ‌سئچیبسن تزه‌ سین؟”
دریمه‌ باخدیقدا قابارمیشدی. ‌
بئینیم هارالارا چاشیب. ‌یاتمیشام سانیرام. ‌یئنه‌ یوخولاریمین چین اولدوغوندان قورخورام. ‌یوخومدا تتو “‌‌سن مامورلارا اوخشورسان، بیر شئی ایته‌ لیر آدامی سنه‌ باخدیقدا. ‌”‌‌دئییب ییرتیجی گؤزلری ایله‌ دوز گؤزومون به‌به‌یینه‌ باخیردی. ‌اوره‌ ییم آغزیما گلمیشدی، اؤدوم قوپدو. ‌آیاغین آیاغیما باسیب بئلیمدن یاپیشدی. ‌دؤیدورمه‌ قیز. ‌باشلامیشدی چنگ چالماغا. ‌او دئین کیمی لا لا سل دو لا سل. ‌. ‌. ‌‌چه‌نم چنه‌سیندن بیراز اوجادا دورموش. ‌”دوداقلارین نییه‌ قورویوب. ‌؟ ه‌میشه‌ اوچوقلار دوداغین یوخسا دیکسینیرسن مندن؟ “‌‌ دئدیم: “‌‌اؤزون بیلیرسن یوخولاریمی قارا باسیر گئجه‌لر”‌‌ دئدی: “‌‌بیلیسن آدامین عمللریدیر قارا اولوب گئجه‌لر گلیر یوخوسونا”‌‌ دیرناقلاری باتیردی دریمین چاتلارینا. ‌”سو ایچه‌سن گرک. ‌وئریم؟”‌‌ بیلمیردیم دوز دئییر یا شوخلوق ائلیر. ‌دوداغی آزجا بئله‌ قاچمیردی. ‌دینمیردیم. ‌باشقا چارم یوخویدو. ‌دینسه‌ ایدیمسه‌ بایدیرا بیلردیم. ‌نهایت دوداغی قاچدی. ‌او سسسیزلیک آراسیندا. ‌
اوزاقدا نعنا قلیانی عود قوخوسونا قارییشیب یانیردی. ‌سورکلی قیریلمایان، دامار دامار دومانلار بیر بیره‌ یاپیشیب، هر نه‌ آغ قارا گؤرونوردو. ‌من ایسه‌ یونگوللشیب یئردن اوزولوردوم. ‌اوزاقلاشیردیم یئردن. ‌آغیرلیغیم آزالیردی، ایچیمده‌ کی زامان یاواشلاییب یوخ اولوردو. ‌قاوالا قاشدی سکسکه‌ لی دونیادان خبر یوخ ایدی. ‌روحوم قورتولوردی بو بدن دئدیییم زینداندان. ‌گول پنبه‌، سرکرده‌، تتو، کلهر، آتلار، سازمان، تیمی ائولر، قاچاقچیلار، سرحد، شهر. ‌هامیسی آشاغیدا قالیردیلار. ‌ایلگیمی بوتون گرچکلرله‌ کسیردیم. ‌تتونون “سو ایچیرسن وئریم”‌‌دئدییی سؤزه‌ دوشونوردوم. ‌اوشاقلیق کابوسلاریندا. ‌حیط تویوقلارینی کسمدن اؤنجه‌ دیمدیکلرینه‌ تؤکولن سویون، نه‌ قدر قورخونج اولدوغونا آزیردی فیکریم. ‌بیر نئچه‌ دیقه‌ سورا اؤنونده‌ اولان بو جانلی، آرتیق بو دونیادا اولمایاجاق دئیه‌ سو وئریرسن. ‌بلکه‌ده‌ سوسوز اؤلمه‌سین. ‌سو نیسگیلی اوریینده‌ قالماسین دئیه‌. ‌کسین تتو سؤز قاندیریردی منه‌. ‌کسین کینایه‌ ووروردو. ‌بلکه‌ ده‌ گئت-گئده‌ اولوشان شوبه‌ه‌لرینه‌ جاواب تاپماق اوچون، آغزیمدان سؤز چکمک ایستیردی. ‌اؤلدورمدن اؤنجه‌ سو وئرن بیر جانلی کیمی. ‌هئچ دادمادیغیم بیر داد وارایدی داماغیمدا. ‌سئوگیله‌ اؤلوم اینجه‌ بیر ایپ اوسته‌ یاریشیردیلار. ‌سالونداکی توستولر، تانگو کیمی بیر بیره‌ دولاشیب شکیل اولماقدان قاچینیردیلار. ‌اودادان سس گلیردی. ‌معامله‌ قورتولموشدو کسین. ‌زامان دارالماقدایدی. ‌بارماغیم (گؤندر) اوستونده‌ قالمیشدی. ‌ووروب وورماماغی یادیما گلمیردی. ‌مئساژلاری چئک ائدرکن، کلهر پیلله‌‌لری یئنیب گلدی. ‌اییلیب قولاغیما “ضییافت قوتولدی “‌‌ دئدی. ‌درین بیر یوخودان دیسکیندیم سانکی. ‌سسیمی شنود ائدیرمیش، بیلیرم. ‌اونا گؤره‌ بئینیمیده‌ اولان هر نه‌یی اوخویوب کسین. ‌گئجیکدییمدن قورخموش. ‌سیلاحیمی آلیر. ‌بیرازدان اوشاقلار تؤکولوب هامی‌میزی توتاجاقلار. ‌بلکه‌ هئچ واقت، گؤره‌ بیلمه‌ییم تَتونو. ‌کلهرا دئییرم: یوخومو دا شونود ائلیرسیز؟ “‌‌دئییر: “بورانین تینی توتوب سنی. ‌آز قالیردی الیمیزدن چیخسین. ‌بیراز دینجلملیسن. ‌”‌‌ دئییرم “‌‌نولاجاق بو تتو؟”‌‌ دئییر “‌‌ ه‌ئشزاد. ‌مشارکت در ارتکاب جرم . ‌. ‌. ‌ان آزی بئش ایل. ‌. ‌. ‌”‌‌ قالانین ائشیتمیرم. ‌ان آزی ۵ ایل قالیر یادیمدا، بوتون ایچدیکلریم بئینیمدن اوچور. ‌قاپیدا پلیس آرابالاری دوروب. ‌ساری باند چکیبلر یوردشاه‌ین گیریشینه‌. ‌چیراقلارین ایشیلدیسی یاش آسفالتین اوستونه‌ دوشوب. ‌یولدان گئچن آرابالار یاواشلادیب باخیرلار بورا. ‌آخشامین لاپ داریخمالی یئریدیر. ‌سرکرده‌نی اللری باغلی ایکن باسیرلار آرابایا. ‌گؤزلریم تتونو آختاریر. ‌گؤرمورم. ‌
گول پنبه‌ بوردا او. ‌لسایدی هامیسین ناغیل کیمی دئیردیم. ‌یوخولاریمی. ‌سون مامورییتیمی، قورخولاریمی، تتونو، شنود اولماغیمی. ‌یورقونلوغومو، تزه‌ اؤیرندیییم قیجیق سؤزونو. ‌گول پنبه‌ یوخدو. ‌ناغیللاریم ایسه‌ یاریمچیق. ‌
کلهر صاباح یئنه‌ گلدی. ‌خانسار قلیانین دمله‌دی. ‌تیراسدا اوتوردوق. ‌مئوین آلتیندا تخته‌ میز اوسته‌ یاسدیغی ایکی بؤلوب اغندی. ‌ قلیانین توستوسویله‌ اوینایا اوینایا دئدی: “حاییف اولدو. ‌داماران ایشله‌میشدی ها بو قیز!!! آما یوخون قولاغین دیبیندن رد اولوب ها! یوخودا اؤلن آدامین، چوخ چتین آیاغی دوشر بو دونیایا”‌‌ گولمه‌یینی اوتدو، قاشلارینی دویونله‌یرک “‌‌بونلاری گؤتوروب سون گزارشده‌ یازمایاسان ها. ‌دئدیم: – هانسی یوخو؟ یوخولاری دا دینلیه‌-ییرسن؟ گولدو. ‌دوروب باغداش قوروب کؤمورو پوفله‌ یرک دئدی: سندن گؤزلمیردیم قیچین بو تئزلیکده‌ سوروشه‌! دئدیم: نه‌ دئمک ایستیرسن؟ هاردا بیر قوصور وارسا دئنن. ‌سان کی ائشیتمیر سؤزلریمی، قاییدیب تختده‌ اوتوردو. ‌دئدیم: من موقعیت اولان آن، سنه‌ خبر وئردیم. ‌ه‌من ۱۱ یازدیم ! دئدی: یازدین آما دایاندین. ‌سورا یوللادین. ‌کؤمور اود توتوب آلیشدی. ‌اینانمیرام. ‌کسین یوخومو بیر یئرده‌ بیر نفره‌ دئیرکن دینله‌ییب. ‌اوزونده‌کی او سایماماز میمیکی، الینده‌کی یمن عقیقلی اوزوک. ‌قولونداکی قیللارا باتان ایشدن دوشموش، بیر عتیقه‌ سئیکو ساهات. ‌قلیان توستوسویله‌ اوینادیغی فیگور، هامیسی قورخودوردو آدامی. ‌کاش قالاردیم سرحدده‌. ‌بورا هارادی؟ بونلار کیمدیلر؟ اورتامی دییشسین دئیه‌ دئدی: “‌‌نولدی؟ اوچوقلادی یئنه‌ دوداغین یا اوولده‌کینین یئریدی؟ “‌‌ کئفلییدی. ‌الکل قوخوردو آغزی. ‌گولدوکجه‌ آغزینداکی دیلچه‌یی گؤرونوردو. ‌دئدیم: “یوخ هماندی. ‌”‌‌ دئدی: “گزارشی اؤزون یازارسان، من گئتمه‌لییم. ‌”‌‌ ساهاتینا باخدی. ‌دئدیم: “ایشلمیرسه‌ ندن باخیسان او ساهاتا. ‌”‌‌ قولونو قالدیریب دیققت ایله‌ یئنیدن باخیب دئدی: “خاراب ساهات بئله‌، هر گون ایکی سئری دوز گؤرسدر. ‌“‌‌ایشقیراغی گولماغینی کسدی. ‌باشماقلارینی دابان چکن ایله‌ چکیب، تیراسین پیلله‌لریندن یئره‌ دوشدو. ‌ایکی آددیم آتمادان دؤنوب دئدی: “دانیشدیقلاریمیزی اونوت. ‌سون گزارشده‌ یاز، یوردشاهدا اولان، تیمی ائو آداملاردان تمیزلنیب.

چاپ

2 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یانیق ماوی

رضا جوان
www.ishiq.net

آذربایجان ادبیات و اینجه‌صنعت سایتی

یانیق ماوی

رضا جوان
www.ishiq.net

آذربایجان ادبیات و اینجه‌صنعت سایتی

یانیق ماوی

رضا جوان
www.ishiq.net

آذربایجان ادبیات و اینجه‌صنعت سایتی