چئویرن: مرتضی مجدفر
ترجمه: مرتضی مجدفر
مرتضی مجدفر

majdfar_2
قاشینما
مرتضی مجدفر

یئنی ایل بایرام تعطیل‌لری‌نین صاباح سحریسی ایشه گئتمه‌لی‌ اولان سون گونون آخشام چاغیندان‌، الینین ایچی قاشینماغا باشلامیشدی. کئچمیش‌ زامانلاردان یادیندا قالمیشدی،کیمسه‌نین الینین ایچی قاشینسا، قاشینما کسیلن کیمی، یوکسک پارا الین توتاجاقدیر. بونو همشه قاری ننه‌سی دئیر‌دی، آنجاق بیر نئچه دؤنه بو سؤزو آتا- آناسیندان دا ائشیتمیشدی.
اوشاقلیقدا الینین ایچی قاشیناندا، چوخ سئوینردی. آمما عادت اوزه‌ره، آتاسی وئرن کیچیک خشلیک‌دن باشقا، بیر شئی الین توتمازدی و بو دور الینین قاشینتی‌سینی تئزلیکله اونوداردی. آمما بو سَفَر الینین قاشینتی‌سی آیری بیر زاد ایدی و زامان کئچدیکجه داها دا آرتیردی. الینین قاشینتی‌سی اونو بئزیکدیرسه‌ ده، آنجاق هله ده شن گؤرونوردو. الینین ایچی، قاشییب-   دیدمکدن‌ قیزارمیشدی. داهی امین‌ ایدی کسین‌لیکله، بوللو بیر پول اونو گؤزله‌ییر.گئجه یاتاندا، الین یئره قویوب، قاشینتی‌سینا، الینی خالچایا سورتمکله توختاقلیق وئریردی.
سحر تئزدن یوخودان اویاندی، قئین‌آلتی‌سین تله‌سیک یئدی، قاشینان الی ایله چانتاسین گؤتوروب، ایشه گئتدی. ایلین بیرینجی ایش گونو اولدوغو اوچون، ساعات اون‌بیره قَدَر الینین آرتماقدا اولان قاشینتی‌سی ایله، امکداشلاری ایله گؤروشمکدن باشقا بیر خبر اولمادی. ساعات اون‌بیرده الینین قاشینتی سیررینین دوغرولما واختی چاتدی. اداره‌نین مکتوبللارین اویان- بویانا آپاران کیمسه، بیر سیرا مکتوبلار گتیردی. مکتوبلارین ایچینده یئنی ایلین اداری حؤکملری ده گؤرونوردو. مکتوبلاری آلت- اوست ائله‌ین بیر امکداشی دئدی:« اللرینه ساغلیق! حؤکملری نه تئز ووروبلار. بورا باخین هامی‌نین دا آیلیقلاری آرتیب…»
داها امکداشی‌نین نه دئیه‌جه‌یینی ائشیتمیردی. هله ده الی قاشینیردی، آنجاق هئچ ده اوزگون دئییلدی. اؤز- اؤزو ایله دئییردی:« اینجیمه‌ییمین دَیَری وار ایدی‌. دئیه‌سن دوغرولور…»
قاشینان الی ایله حؤکمونو آلدی. ماسا اوستونده، او بیری الینین بارماقلاری ایله، سالیب چیخدی، حئسابلادی وساده‌جه، تخمین اوزه‌ره آیلیغینین یوزه سکگیز- دوققوز آرتیلماسینا یئتیشدی. رادیو بیر خبری یایماقدا ایدی. رادیو سؤزچوسو بو ایلدن بیلدیره گؤره قیمت‌لرین یوزه ایییرمی آرتیلماسیندان خبر وئریردی. خبرلر بیتمیشدی، آنجاق الینین قاشینتی‌سی بیتمه‌ییب‌سه هئچ، او بیری الی ده قاشینماغا باشلامیشدی.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قاشینما

مرتضی مجدفر
www.ishiq.net

آذربایجان ادبیات و اینجه‌صنعت سایتی

قاشینما

مرتضی مجدفر
www.ishiq.net

آذربایجان ادبیات و اینجه‌صنعت سایتی

قاشینما

مرتضی مجدفر
www.ishiq.net

آذربایجان ادبیات و اینجه‌صنعت سایتی