ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

vahed
حکایه‌جیک‌لر
حسين واحدی

شانس‌سيز اوغرو

گئجه‌نين لاپ او شيرين يوخو گلن زامانی، دووارين ياپيشيغينداكی آغاجدان ديرماشيب ائوين حيطينه آتيلدی. سينه-سينه ائوه ساری گئديب، الين ياپيشاجاغا آتيب قاپينين آچيق اولدوغونو گؤروب، سئويندی!

ايچه‌ری گيرنده، بير كيشی‌نين اوتاقدا يوخودا اولدوغونو گؤردو. آی‌ين ايچه‌ری‌يه دوشن ايشيغيندا ائوی آلت-اوست ائتدی، آما آپارماق اوچون درده ده‌ين بير زاد تاپا بيلمه‌دی. اومودو پوزولوب قاچماق ايسته‌ديگی آن، ائو ييه‌سی يوخولو-يوخولو، “آی باشی داشلی اوغرو گون ايشيغيندا من بو ائوده بيرزاد تاپا بيلميرم، سن، آی ايشيغيندا تاپماق ايسته‌ييرسن؟” دئييب، يورقانی تپه‌سينه چكدی!

گونش ايله گونه‌باخان

ساری ساچلی گونش، گؤيه ديرماشميش داغلارين آرخاسيندا، خوروزون بانلاماسينی گؤزله‌ييردی. آخشامدان، بوغدا تارلاسيندا اولان يالنيز گونه‌باخان ايسه قارا دنه‌لرينی گونشين باتان يئرينه توتوب، گونشی گؤرمك اوميدی ايله يوخلاميشدی.

بير آزدان، خوروز، سسی‌نی باشينا آتدی. كند ائولرينين چيراق‌لاری بير-بير ايشيقلاندی. گونش گؤزله‌دييی آنی گؤرونجه دوغماغا باشلادی. گونه‌باخان، سئوينجك اولوب، اوياندی. سئودييی گونشی بيرداها گؤره بيله‌جه‌يينه چيچه‌يی چارتلادی…

آرتيق، گونش گؤی اوزونده، هر يانی باخيشی آلتينا آلميشدی. گونه‌باخان، گونش بونون اوچون گليب‌دير دئيه، اوزون اوندان چئويرميردی. او، اوچوب گونشين يانينا گئتمك آرزوسوندايدی.

ياواش-ياواش آخشام گليب چاتيردی. گونش يئره سردييی ساچلارينی داراييب، هؤرمه‌يه باشلاميشدی. گونه‌باخان ايسه گونشين گئتمه‌سيندن اوزولوردو. او، بيليردی بير آزدان گونش باتی‌داكی اوجا داغين آرخاسينا گئديب يوخ اولاجاق‌دير…

گونش، گئتدی! آنجاق هئچ بيلمه‌دی گونه‌باخان‌نين آدي‌دا اونون آديندان آلينيب‌دير. او هئچ بيلمه‌دی، گونه‌باخان بوتون ياشاييشيندا اونون سئوگی‌سی ايله ياشادی!

قورخولوق

آخشام اوستو كئچن گونلره تای، قارغالار، اوزوم باغينا هجوم چكديلر. كئفلری چكينجه اوزوم يئييب باغی كورلاديلار.

قورخولوق آنلاملی سس‌سيزليك له، باغين اورتاسيندا اونلارا باخيردی. اليندن بير ايش گلميردی، او ساده‌جه اؤز گله‌جه‌يينی دوشونوردو! دونن آخشام، باغ ييه‌سی، باغدان آيريلاندا، «صاباح‌دا گليب گؤرسم قارغالار، باغی كورلاييب، قورخولوغو يئريندن چيخارديب، يانديرجايام» دئميشدی!

بونلاری دوشونه‌رك، قورخولوغون اوره‌يی دولوب، خيمير-خيمير آغلاماغا باشلادی!

3 پاسخ

  1. سلام
    تورکی دیلده بوجور داستان گوزومه دیمه میشدی
    اوخویوب اورییمه یاتدی
    ساغ اولون

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *