حکایه‌جیک‌لر
فرید ائدگو(۱) – آذربایجان تورکجه‌سینه اویغونلاشدیران: همت شهبازی
قصاص
(۱)
کندین ان اَرکؤیون قیزی ایدی،
اونو کندین ان آخماق گنجینه وئردیلر.
هئچ اوشاقلاری اولمادی
داها دوغروسو سایسیز اوشاقلاریندان هئچ بیری او آخماق گنجدن دئییلدی.
بالیقچی
(۲)
قاییق ساحیلدن آیریلدیقدان سونرا
تورلار آتیلدیقدان سونرا
قاییق ساحیله دؤندوکدن سونرا
گؤزله‌یک باخاق، دئدیکدن سونرا
و توردان، ایستاوریت*لر ، ایزماریت*لر، ایسکورپیت*لرله
بیرلیکده گنج بیر قادین جسدی چیخدیقدان سونرا
بو قدر چوخ، دئییب قادی‌نین جسدینی یئنیدن دنیزه آتدی.
•هر اوچو ده بالیق نوعو
یوخو
(۳)
منی اؤلدورمه‌یه آند ایچمیش.
من ده اونو اؤلدورمه‌مه‌یه آند ایچمیشیم.
دوئل سیلاحینی منیم سئچمه‌ییم لازیم اولورموش.
گؤزلریم یاخشی گؤرمه‌دییی اوچون من ده توتوب تاپانچانی سئچمیشیم. ایشه باخین کی اؤلن یئنه او اولور.
آمما کیمین گولـله‌سییله، بونو نه من خاطیرلاییرام نه ده دوئل شاهیدلری.
اویانمیشام.
عدلیه
(۴)
ساغ قاپیدان گیریب سول قاپیدان چیخیرسینیز.
ایکیسی آراسیندا بیر نئچه دقیقه آیاق‌اوستده دایانیب بیزی دینله‌ییرسینیز. چیخدیغینیزدا سانیرسینیز کی اؤلکه‌نین عدالت قونوسوندا بیر بیلگی الده ائتدینیز. حال‌بوکی هئچ بیر بیلگی الده ائتمه‌دینیز.
بیر گون بو سالوندا، سوچلو یا دا شاهید اولاراق اولدوغونوزو گؤره‌جک و آنلایاجاقسینیز کی بو اؤلکه‌ده عدالت یوخدور. بیزلر، ایندی او اولمایان عدالتی اویغونلاشدیرانلاریق. سیزلرسه دوشوندویونوز اؤلچوده سوچلو.
———–
(۱): فرید ائدگو ۱۹۳۶ینجی ایل استانبولدا دونیایا گلمیش و بیر چوخ حکایه، شعر و رومان‌‌لارین موللیفی‌دیر. بوکسک لیسانسینی استانبولدا آلمیش، داها سونرا پاریسه گئده‌رک، تحصیل حیاتینی اورادا داوام ائتمیشدیر. داها سونرا تورکیه‌یه دؤنه‌رک، آدا نشرلرینی قورموش و ۱۹۷۶دان ۱۹۹۰ینجی ایله قده‌ر بیر چوخ یئرلی و خارجی یازارین و شاعرین اثرلرینی یایمیشدیر.
