چئویرن: رقیه کبیری
ترجمه: رقیه کبیری
رقیه کبیری
00:00
00:00

أل‌لریمیزده پلیس قالخانی، باشیمیزدا حربی دبیلقه ، قورویوجو بُویونلوق، گؤوده زرهی، دیز قورویوجوسو و بئل‌لریمیزدن ساللانان باتوم‌لاریمیزلا اقتدارلی روبوت لشکری کیمی خیابانین اورتاسیندا صف چکیب، فرماندهین امرینی گؤزله‌ییریک. یوموروق‌لارینی بیزه ساری توتوب، آغیزلارینی گؤیه آچیب، باغیریب، شعار وئرن جمعیت ایسه قارشیمیزدا دایانیب.
جمعیته باخیرکن دبیلقه‌‌نین اوزقُورویوجو تلقی‌نین اوزررینده نقطه بویدا بیر قیرمیزی لکه گؤزومه ساتاشیب، فیکریمی قاریشدیریر. اؤزومو گؤرمه‌مزلییه وورسام دا، نقطه گؤزومه سوخولور. چوخ یوکسک سویه‌ده حاضیرلیق أمری آلدیغیمیز اوچون دقتیم پوزولمامالیدیر. آمما او قیرمیزی نقطه لیزر ایشغی کیمی بئینیمین ایچینه نفوذ ائدیر. ألجکلی بارماغیم ایله نقطه‌نی سیلمه‌‌یه چالیشیرام. سیلینمیر. ذهنیمی نقطه‌دن یاییندیریم دئیه قارشیمیزداکی شعار وئرن جمعیتین یوموروق‌لارینا دقت وئریرم. هر آدامین اوره‌یی یوموروغو بویدادیر دئییرلر. یوموروق‌لاری ساییرام. بیر، ایکی، اون، اون بئش، یوز، ایکی یوز…بو قدر یوموروغو سایماق ممکن دئییل. گؤز قاباغیندا گؤرونن یوموروق‌لارین بوی‌بوخونونا باخیب، اورک‌لرین اندازه‌سینی اؤز یانیمدا تخمین وورورام. اینجه یوموروق‌لار، اینجه اورک‌لر، کوبود یوموروق‌لار، کوبود اورک‌لر…
اؤز أل‌لریم ایله هم‌قاطارلاریمین أل‌لرینه باخیرام، هامیمیز أل‌لریمیزی قارا ألجک‌لرین ایچینده قوروماغا چالیشساق دا، اورک‌لریمیزی ایکی قات قوروماغا چالیشیریق. بیز اورک‌لریمیزی گؤوده زرهی ایله پلیس قالخانی آرخاسیندا گیزلی توتموشوق.
ألجک‌سیز یوموروق‌لار، ألجکلی یوموروق‌لار، رنگ‌به‌رنگ یوموروق‌لار هاوادا اویناییر… یاشیل یوموروق‌لار، قارا یوموروق‌لار، ساری یوموروق‌لار، قهوه‌ای یوموروق‌لار، بنؤوشه‌ای یوموروق‌لار، ماوی یوموروق‌لار و بیر قیرمیزی یوموروق…
طلق آرخاسیندان قیرمیزی یوموروغا باخیرام. حربی دبیلقه‌نین طلقی آرخاسیندان باخماق، پنجره‌دن باخماق کیمی دئییل، پنجره انسان وجودوندان آیری اولدوغونا گؤره، باخیب قیراغا چکیلیب، گؤرونتولرین تأثیریندن قاچماق اولا بیلر، آمما حربی دبیلقه‌ باشا قویدولدوغو آن، باش صاحبی ایله بیرله‌شیب، باش صاحبینه اقتدار باغیشلاییب اونو گوجلو و أل‌چاتیلماز گؤستریر.
طلق اوزریندن بئینیمه سیزان قیرمیزی نقطه‌یه فیکیر وئرمه‌ییم دئیه قارشیمیزدا قیمیلدایان جمعیته باخیرکن اؤز-اؤزومه دوشونورم: گؤره‌سن وجودوموزا گئیدیییمیز بو قورویوجو ابزارلار گوجلودور، یوخسا هاوادا اوینایان بو یوموروق‌لار و یوموروق بویدا اورک‌لر؟!
قیرمیزی یومروق بئینیمه میخلانیب، گؤزومو اوندان آییرماغا قادر دئییلم. جمعیت شعار وئریب، باغیریرکن بیزه ساری هجوم گتیریر. قیرمیزی یوموروغون حرکتینی گؤزومله دولاندیریرام. باخدیقجا قیرمیزی نقطه‌نین شعاعسی طلق اوزرینده گئنیشله‌نیر. داها دؤزه بیلمه‌ییب، دبیلقه‌نین طلقینی یوخاری چکیرم. قیرمیزی یوموروق ایله آرامداکی لکه‌لی پنجره یوخا چیخیب، هر شئی گؤز اؤنومده آیدینلاشیر. من او قیرمیزی یوموروغو تانیییرام. او یوموروق منیم اوره‌ییمدیر، منیم دؤشومون آلتیندا دؤیونور. من او قیرمیزی یوموروغون کیمه عاید اولدوغونو باشا دوشونجه یوموروغومو سیخیرام، اوره‌ییم اووجومدا دؤیونور.
یوموروق‌لارین ساییسی چوخالیب، سس‌لر ایسه گئت-گئده ایتیله‌شسه ده، من هؤووشنه ایله یالنیز او قیرمیزی یوموروغو گؤزومله تعقیب ائدیرم. بیزیم ابزارلاریمیزین گوجو قارشیمیزداکی جمعیتین جانینا قورخو سالان کیمی بیرلیکده باغیران سس‌لر ایله یوموروق‌لار، اؤزللیکله او قیرمیزی یوموروق دا منیم جانیما خوف سالیر.
فرمانده دبیلقه‌مین طلقینه اشاره ائدیر. «فرماندهین أمری دَمیری کَسر» سؤزو، منیم و هم‌قاطارلاریمین قولاغینا سیرغا کیمی آسیلیب. أن یاخجی پلیس أمرلره اطاعت ائدن پلیس‌دیر. من و هم‌قاطارلاریم اوزوموزو ده اورک‌لریمیز کیمی قورومالیییق. طلقی اوزومه سالیرام. قیرمیزی یوموروق ایله منیم آرامداکی آیدینلیق کاسلاشیر. هؤووشنه‌م گئت-گئده آرتیر.
فرمانده هجوم أمری وئریر. داها بیزیم یومروق‌لاریمیز اورک‌لریمیز بویدا دئییل. هم‌قاطارلاریمین باتوم‌لاری هاوایا قالخیب ائنیر. من ایسه یالنیز او قیرمیزی یوموروغا ساری قاچیرام. اونو قورومالییام. جمعیتین سسی ایله گول‍له سسی بیر-بیرینه قاریشیر. جمعیت گوج‌لرینی آیاق‌لارینا وئریب، قاچیرلار. قیرمیزی یوموروق ایسه گؤزومدن ایتیر. او قیرمیزینی من اونون بارماق‌لارینا تاخمیشام. من او بارماق‌لارین بیرینه بیر حالقا سالمیشام. من او بارماق‌لاری دفعه‌لرجه بیربه‌بیر اؤپموشم، من او قیرمیزی یوموروغو، او قیرمیزی اوره‌یی باتوم‌لاردان قورومالییام.
قارشیمیزدان قاچان جمعیتین آراسیندا یالنیز بیر قیرمیزی نقطه آختاریرام. بیر آن یئنه قیرمیزی نقطه میخ کیمی گؤزومه باتیب سونرا نقطه‌نین نظمی پوزولوب، دبیلقه‌نین طلقی اوزرینه‌ قیرمیزی جوهر سپیلیر دئیه‌سن.
جمعیتی ایته‌له‌ییب، آسفالت اوزره دوشن قیرمیزی ألجکلی قیزی باغریما باسیب، اونو حربی پلیس قارشیسیندان قاچان جمعیتین آیاق‌لاریندان و هم‌قاطارلاریمدان قوروماغا چالیشیرام. قیرمیزی نقطه‌لر یالنیز آسفالتی لکه‌له‌میر. منیم قارا ألجک‌لریم، اوره‌ییم آرخاسیندا گیزلتدیییم گؤوده‌ زرهیم ده، دیز قورویوجوم دا لکه‌نیب. گئت-گئده لکه‌نین شعاعسی آسفالت اوزره بؤیویور…

[۱] دبیلقه: ضد شورش پلیس‌لره مخصوص طلقدن اوز قورویوجو صفحه‌سی اولان دبیلقه (عسگر بؤرکو).

[۲] اوزقورویوجو: محافظ

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

لکه

رقیه کبیری
www.ishiq.net

آذربایجان ادبیات و اینجه‌صنعت سایتی

لکه

رقیه کبیری
www.ishiq.net

آذربایجان ادبیات و اینجه‌صنعت سایتی

لکه

رقیه کبیری
www.ishiq.net

آذربایجان ادبیات و اینجه‌صنعت سایتی