گؤیرچین قیزلار/ رقیه کبیری
آجان گئنه اؤز- اؤزویله دانیشا- دانیشا کوچه قاپیسیندان ایچری گیریب، قاپینی یاواشجا ایشگیلله‌دی.
«گونون جیزلاماسیندا بیر شوشه آلکولا گؤره بو چولاخ قیشلاریمنان اوچ ایسقاه یول گئدیب، قئییتمیشم.»
ألینده قره نایلون کیسه وار ایدی. من حوض قیراغیندا اوتوروب، اوچ قردشلرینن اوینوردوم. حوضون سویونو ألیم‌نن لپه‌لندیریردیم. اوچ قردشلر گیجه‌لیردیلر. گاه ساغا ساری اوزوردولر، گاه سولا. آجانی گؤرجک گئنه آز قالدی قاچیم نایلونون آغزینی آچیب، منه آلدیغی یئمه‌لیلری ایچیندن گؤتوروم. آمما قاچمادیم. بولورم مامان بالاخانانین ائیوانیندان باخیب گؤرسه، منه ساواشار. مامان دئییر: «آجان، بیر ده راهیب عمی‌جان‌نان سورا هر کیم سنه یئمه‌لی وئرسه آلما، دئنه ساغ اول، ائویمیزده وار، تَزه یئمیشم. سورا گل منه دئه، هر نه ایسته‌سن اؤزوم آلارام». دئییر: «بئله عادت ائله‌سن همیشه نفسی بوتون قالارسان».
آباینان مامان حیرصله‌نیب بیر- بیرلری‌نن دئییشنده قاپیلاری برکدن چیرپارلار. من آجان کیمی همیشه قاپینی یاواشجا ایشگیلله‌رم. راهیب عمی‌جان دئییر: «گؤیرچین قیزلارین یووالارینین قاپیسینی دا یاواشجا ایشگیلله. برکدن چیرپسان گؤیرچین‌لرین چورتو پوزولار.»
مامان دا موبل اوسته اوزانیب یاتاندا قاپینی یاواشجا ایشگیلله‌رم کی، چورتو پوزولماسین. بابانی تورپاقدا قویلایاندان بویانا مامان گونون چوخ واختینی موبل اوسته چورت وورور.
آجان قره نایلون ایچیندن آلکول شوشه‌سینی چیخاردیب، آشپازخانانین آچیق پنجره‌سینین هئره‌سینه قویوب دئدی: «سنی او ایناندیغین، أل چک بو آلکول اویونوندان آرواد! بسدی. دای اوزوم کسمیر محلله‌نین داواخاناسیندان آلکول آلیم. آخیرده، سنین بو میکروب اویونووا گؤره منیم آدیم پیسه چیخاجاق. آخی، بو ائوده میکروب هاردئیدی؟»
آبا آشپازخانادان چیخیب گلیب حوض قیراغیندا دوروب بالاخانانین ائیوانینا باخدی. مامان ائیواندا دئییلدی. آبا دئدی: «هاردئیدی؟! اصل میکروب ائله بالاخانادا یووالییب. سن بیول دئنن هاردئیدی!»
آجان دئدی: «أستافرواللاه هااا… ده‌لی شئیطان دئییر بیر کیربیت چک، ائوی ده، بالا خانانی داااا…واللاه، بیللاه داراشماز. سویوخ ده‌یمه دئییل کی بیر آسقیرماغینان داراشسین.»
«سنه دئمه‌میشم سسیوی قیس؟ ائله بئله دییسن کی بو قیزین دا آیاغی یئر آلیر دااا»
«هر نه‌دی، آنجاخ چاره‌سی آلکول دئییل. بابام ییغیشدیر بو واسواسیلیغیوی. دای بوننان بئله بیر قطره ده آلکول آلمییاجاغام.»
«سَننیخ اولسا دییرسن گلسین اوتوسون منیم بو تپه‌مده!»
آجان دئدی: «ده‌ده‌سی ائوینن گتیرمییب کی، هر نه پوخدی سنین اوغلووون شاهکاریدی.»
«کیم بولور؟ بلکه ده او داراشدیریب منیم اوغلوما؟»
آجان دئدی: أستافرواللاه هااا، بو آرواد ائله سؤزلر دئییر کی، آز قالیر جین ویرسین آدامین کله‌سینه»
راهیب عمی‌جان دامدان بویلانیب دئییر: «آبا بسدی. یادیننان چیخدی سنه نه تاپشیرمیشدیم؟»
آبانین دئیینماغینا جین منیم ده کله‌مه ویردی. دوروب قاچدیم بالاخانادا مامانین یانینا. اونا دئمه‌دیم آبا دئییر میکروب بالاخانادا یووالاییب. یوخسا مامان دوروب آباینان دئییشیب سورا دا قاپیلاری چیرپاجاقدی بیر- بیرینه. سورا دا دیزلرینی قوجاقلاییب آغلایاجاقدی.
مامان موبل اوسته اوزانیب، چورت وورور. گؤیلوم ایستیر مامانی قوجاقلاییب دییم، گؤیرچین قیزلارین ناغیلینی دئه! آمما قوجاقلامیرام، بیردن چورتو پوزولار. بابانی تورپاقدا قویلایاندان بویانا مامانین قوجاقلاماقدان خوشو گلمیر. قاباقجا خوشو گلردی. قاباقجا ناهار چاغلاری ایکیمیز باشیمیزی بیر یاسدیغا قویوب، منی قوجاقلاییب ناغیل دییردی. چوخ واختلار دا من ناغیلا قولاق آسا- آسا یوخلاردیم. آییلاندا یادیمدان چیخاردی هانسی قردش گئدر- گلمز یول‌نان گئتدی. هئش بولمورم قئییتدی یا یوخ!
آبا مریض‌خانایا گئدیب، قان وئرندن بویانا اونون دا قوجاقلاماقدان پیسی گلیر. هئش من ده خوشوم گلمیر آبا منی قوجاقلاسین. قاباقلار منی ائله سیخیشدیراردی، ائله بتر یاناغیمدان اؤپردی کی، نم نه واختاجان آغزینین اییسی یاناغیمدان چکیلمزدی. آمما ایندی نه زامان مامانین گؤزونو اوزاقدا گؤرور، أل- اوزومو آلکوللو پامبیغینان سیلیب، دئییر قورخورام سنه ده بولاشا.
بابانی تورپاق آلتدا قویلایاندان بویانا هامیمیزی مریض‌خانایا چاغیردیلار. هامیمیزدان قان آلدیلار. من ایینه‌دن قورخوردوم، آمما راهیب عمی‌جان دئدی: «کیشی، دؤشووو وئر قاباغا، شَستینن گئت قولوو توت، قان آلسینلار. کیشی نه قورخار، نه ده آغلار.»
دئدیم: «آخی بابانی تورپاغا قویلایاندا آجان دا آغلادی، سن ده. فقط من آغلامادیم. یانی من کیشی اولموشدوم سیز یوخ؟»
راهیب عمی‌جان دئدی: «هه واللاه، سن کیشی تامامسان، بیز یوخ!»
مامان دئدی: «آغلاماغین گلسه آغلا، آمما قولووو ترپتمه، قوی قان آلسینلار.»
ایینه قولومو اینجیتدی. آغلاماغیم دا گلدی، آمما گئنه آغلامادیم. دیش‌لریمی بیر- بیرینه سیخدیم. بابانین اوستونه تورپاق تؤکنده ده دیش‌لریمی بیر- بیرینه سیخدیم. من ده هردن بابانین اوستونه تورپاق تؤکن کیمی قاریشقالارین اوستونه تورپاق تؤکردیم. بابانی تورپاغا قویلایاندان بویانا، دای قاریشقالارینان ایشم یوخدی.
دونن راهیب عمی‌جان دئدی: «سن چیخ داما، گؤیرچین قیزلاریمیزا بیر باش چک، من ده بیر آزدان گلیم.»
اؤزو حیطه گئدیب، دهلیز قاپیسینی ایشگیلله‌دی. مامان، آبا، آجان، اوچو ده حوض قیراغیندا اوتورموشدولار. حوضداکی اوچ قردشلرین هئش بیرینین عئینینه دئییلدی.
اوچ قردشلری راهیب عمی‌جان منه آلیب. اوچو ده بیر بویدا، بیر رنگده. راهیب عمی‌جان اؤزو آدلارینی قویوب اوچ قردشلر. دئییر: «بو قیرمیزی بالیقلارین اوچو ده قردشدیلر. بؤیوک قردش، اورتانجیل قردش، کیچیک قردش. عئینی گؤیرچین جیلدینه گیرن اوچ باجیلار کیمی بولار دا بالیق جیلدینه گیریبلر.»
دئیرم: «راهیب عمی‌جان، آخی بولارین اوچو ده بیر بوی- بوخوندادیلار، هاردان بللی هانسی بؤیوکدی، هانسی اورتانجیل، هانسی کیچیک؟»
دئییر: «بالیق آدام دئییل کی، بالیقلار دا گؤیرچین باجیلار کیمی بیر بویدا اولارلار.»
من کی اینانمیرام. تویوقلار دا حئیواندیلار. یاخچی؟ بس نییَه جوجه‌لری بؤیودوکجه بوی آتیرلار.
دئییر: «گئجه‌لر یاتاندا یورقانین آلتیندا سن ده فیکرلش، من ده فیکیرلشیم، بو اوچ قردشلره بیر ناغیل قوشاخ، ناغیلین آخیرینده بالیق جیلدیندن چیخیب، گؤیرچین قیزلارینان توی ائله‌سینلر.»
یاتاندا اؤز یانیمدا اوچ قردشلره ناغیل قوشورام، آمما سحر یوخودان دوراندا گئجه قوشدوغوم ناغیل یادیما گلمیر.
راهیب عمیجانین دامداکی گؤیرچین قیزلارینین یانینا گئتمه‌دیم. آباگیلین اوتاغینین پرده‌سیندن گؤروردوم مامان آغلاییر. سسینی ده ائشیدیردیم. باخما کی قولومنان قان چکنده آغلامادیم، مامان آغلایاندا منیم ده آغلاماغیم گلیر. دئییرم بس راهیب عمی‌جان یئکه‌لیکده کیشی اولسام دا، مامان آغلاسا گئنه منیم آغلاماغیم توتاجاق.
مامان دئدی: «آجان، آبایا دئنه اوشاغی راحات بوراخسین. اؤزوز بولوسوز کی فقط قان- قانا ده‌یسه بولاشار. من ده کی گؤزوم کیمی موواظیبم. ایینه، پیچاق، قئیچی، حتی چای، سو ایچدیییم ایستیکانی بئله قیفیللی ایشکافا قویورام. ایش گؤرنده ده ألجک‌لی گؤرورم. بولورم ایستیکاننان، قاب- قاشیقدان بولاشماز، گئنه ده احتیاط ائلیرم. آمما آبا او قدر بو اوشاغین أل- اوزونو آلکولونان سیله‌جک کی، آخیر اونو دا اؤزونه تای واسواسی ائله‌سین.»
آبا آغلایا- آغلایا دئدی: «جان- جی‌یَر اوغلوم، گئدر- گلمز یولا گئدن اوغلوم! نیسگیللی اوغلوم!»
راهیب عمی‌جان همیشه دئییر: «ائله گؤیرچین‌لر ده همیشه ایکی یولدا اوچورلار، بیری گئدر- گلمز، او بیریسی گئدر- قاییدار یولودور». دئییر: «گئدر- قاییدار یول سو ایچیم کیمی‌دیر. هوشلو- باشلی گؤیرچین‌لر همیشه گئدر- قاییدار یول‌نان اوچوب، گئنه یووالارینا دؤنرلر. تکجه بوشا دوشن گؤیرچین‌لر گئدر- گلمز یول‌نان اوچوب، قاییتمازلار. دئییر: «بوشا دوشن گؤیرچین‌لرین هئش بیری بیر عابباسییا ده‌یمز».
بیلیرم بیرعابباسی قدیم پولدی. بابامین قدیم عابباسی‌لارینی مامان اؤز اوتاغینین ایشکافیندا، آناناس کومپوتونون قوطوسوندا ساخلاییر.
آبا آغلایاندا منیم آغلاماغیم گلمیر. چرقدینین اوجوینان بورنونون شیرتیغینی سیلیب، سورا گؤزلرینی ده اون‌نان سیلنده شیرتیقلار گؤزلرینه یاخیلیر. اوندا من ایره‌نیرم. بیر گون آبایا دییه‌جا‌م اوّلجه گؤزونو سیلسین سورا بورنونو.
مامان گؤز یاشینی دسمال کاغذینن سیلیب دئدی: «دئییرم نااینصاف، سن کی بولوردون گئدر- گلمزه گئده‌جاخسان، آخی نییَه منی ده بولاشدیریردین؟! آدام دا بئله نامرد اولار؟»
آجان دئدی: «قیزیم اؤلونون دالیجا دانیشمازلار. ایشدی. قیسمته هئش چاره یوخدی».
راهیب عمی‌جان دئدی: «مه‌یه اؤزونون خبری واریدی؟ تصادوف ائله‌مه‌سه‌یدی کیمین خبری اولاجاق ایدی!؟»
آجان دئدی: «اولماسا قوی بو اوشاق قالسین بوردا، سن گئت آتان گیلده قال. من گیله‌م کیمی بو اوشاغا باخارام.»
مامان دئدی: «آجان، باغیشلا ها، من آتام ائویننن گتیرمه‌میشم کی بو زهرماری، سنین اوغلون منه بولاشدیریب، ایندی ده مجبورسوز منیم داوا- درمانیمین، اؤزومون، اوشاغیمین خرج- مخاریجینی وئره‌سیز.»
مامان موبل اوسته چورت وورور. ائیوانین قاپیسینی آچیب، بویلانیب حیطه باخیرام. آجان قره نایلونو حوضون قیراغینا قویوب، اوتوروب سیقار چکیر. بولورم نایلوندا همیشه کی کیمی ایکی بسته پاستیل وار، بیری نوشابه پاستیلی، بیری ده آیی پاستیلی. هله جین کله‌مدن چیخمیییب. گؤیلوم ایسته‌میر پاستیل یییَم.
ائیوانین قاپیسینی یاواشجا ایشگیللیرم. آمما مامانین چورتو پوزولور، دوروب اوتورور. گؤیلوم ایستیر مامانی قوجاقلاییم. قوجاقلامیرام. یانیندا اوتورب، دئییرم: «منه گؤیرچین قیزلارین ناغیلینی دئه دا!»
مامان گؤزلرینی اوووشدورو. گئنه یوخوسو گلیر. دئییر: «گئت راهیب عمیجانین دئسین!»
راهیب عمی‌جان هر گون ایکی ده‌فه سحر چاغی ایشه گئتمه‌میش، بیر ده ایشدن گلندن سورا گؤیرچین قیزلارین قفسینین قاپیسینی آچیر. گؤیرچین‌لر گؤیون گئدر- قاییدار یولوندا گزیب دولاناندان سورا قفس‌لرینه قاییدیرلار.
بیر جوت چیل گؤیرچین راهیب‌عمی‌جانین چیینینده اوتوروب، اونون اووجوندان دیمدیک- دیمدیک کوروشنه یئییرلر. حوض قیراغیندا قره نایلون ایچینده قالمیش پاستیللر یادیما دوشور. راهیب عمی‌جان دئییر: «اووجوو دولدور کورشنه‌ینن، گل بورا.»
اووجوم دولو کورشنه‌یله گئدیرم راهیب عمی‌جانا ساری. چیل گؤیرچین‌لر اونون چیینیندن اوچورلار. دئییرم: «بو چیل‌لر ایکی باجیدیلار؟»
راهیب عمی‌جان دئییر: «بیری ائرککدی»
دئییرم: «راهیب عمی‌جان، گؤره‌سن گؤیرچین‌لرین ده قانی وار؟»
«مه‌یه قان‌سیز دا حئیوان اولار؟ یئر اوزونده‌کی بوتون حئیوانلار، بیتدن توتدو سیرکه‌‌یه‌جن، هامیسینین آدام کیمی داماری وار، قانی وار. قان اولماسا حئیوانین جانی اولماز کی»، دئییر.
«راهیب عمی‌جان، گؤیرچین‌لر ده ناخوشلارلار؟»
«آدام کیمی یوخ، آمما گؤیرچین‌لرین ده اؤزلرینه مخصوص ناخوشلوخلاری وار دا.»
«گؤیرچین‌لرین ده قان- قانا ده‌ین ناخوشلوخلاری اولار؟»
راهیب عمی‌جان دئییر: «نمنه؟»
دئییرم: «یانی ماماننان بابا کیمی قان- قانا ده‌یسه‌لر ناخوشلوخلاری بیر- بیرینه بولاشار؟»
راهیب عمیجانین اووجونداکی کوروشنه‌لر یئره تؤکور. منی قوجاغینا آلیب دئییر: «کیشی، اووجووو آچ، بو چیل قیزلار گلسین اووجوندان کوروشنه یئسینلر.»
۶/۱۰/۹۶
یک پاسخ
اوره کیمین ایچینه جان یاندیردی بو یازی اللری آغریماسین خانیم کبیرینی