ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

alirza sarrafi
آذربایجان شیفاهی خلق ادبیاتیندا نغمه‌لر
علیرضا صرافی

نغمه‌لريميزي نئچه گروپا بؤلمك اولور :
امَك نغمه‌لري، مراسيم نغمه‌لري، اووسون نغمه‌لري و… آشاغيدا اونلارين حاقّيندا معلومات وئريله‌جك:
1-     امَك نغمه‌لري
‌امك نغمه‌لري اينسانلارين ان قديم يارادايجيقلاريندان بيريسيدير. ايلكين ‌اينسانلارين گؤردوكلري ايش دسته‌جمعي ايدي. هر ايش گروپو‌، ايشين آغير يوكونو يوٍنگولتمك اوٍچون بير –بيريله اويغون طرزده موعيّن ريتم ايله چاليشيرديلار‌، هر ايش مثلاُ آغير بير داشي ديغيرلاتماق‌، گمي سورمك‌، يئر شوخوملاماق و … دائما تكرار اولان منظم بير حركتلردير‌، ‌اينسانلارين ايش پروسه‌سينده موزون حركتلري واردير، مثلا بير-بير ايله ايرَلي گئديب، دالي چكيلر‌، اللريني بيرليكده قووزاييب، ائنديريرديلر. …ائله بو ريتملرله اويغون ايلك موسيقي‌لر و ايلك رقصلر يارانميشدير.
دئمه‌لي موٍشترك ايش گؤرونجه‌، ايشين موعيّن ريتمي‌،‌ بدن‌، ال و آياقلارين موزون حركتي‌، چكيش‌لرين و باشقا ايش وسيله‌لرينين بيرـ بيريله توخونما سسي، ‌‌اينسان نفسلرينين بير –بيرينه قووشوب، بيرلشمه‌سي موعيّن ريتم و هاوا يارادير. همين هاوا و موسيقي‌ايله اويغون بعضا ‌اينسانلارين آرزو‌، امللريني تمثيل ائدن سؤزلر ده اورتايا چيخير و بئله‌ليكله امك نغمه‌لري يارانير.
بيلديگينيز كيمي آفريقا و استراليا و آمازون مئشه‌لرينده هله ده بير پارا قبيله‌لر چوخ بدوي شكيلده ياشاييرلار، ‌اونلارين حاقّيندا ائتنولوژيك موطاليعه‌لر‌، بير چوخ خلق ياراديجيليغي‌نين منشأيني او جومله‌دن امك نغمه‌لرينين منشأيني آيدينلاشديرير.
آشاغيداكي ايكي ميثال امك نغمه‌لرينين نئجه يارانماسي حاقّيندا جانلي ميثال اولا بيلر:
بوتن اورتا آفريقادا شاهيد اولدوغو بير صحنه‌‌ني بيزيم اوٍچون بئله تصوير ائدير :
بیر گئجه آغ دريلي بير تاجيرين اجير ائتديگي قارا ايشچيلر‌، اود يانديريب‌، دؤره‌سينده اوتورموشدولار‌، اؤز آرزو‌، ديلكلريني شعر كيمي ترنّوم ائديرديلر. اونلار او قدر شعر قوشدولار كي يوخويا گئتديلر، هر دفعه بير نفر بير ميصراع سؤيله‌يير و هامي بير سسله پوتي –پوتي دئييرديلر (پوتي قورد آنلاميندادير ).
آغ دريلي ساحيل بويو گئدينجه،
پوتي ـ پوتي.
بيز گئدريك او ظاليمين آردينجا،
پوتي ـ پوتي.
ظاليم بيزه الجه چؤرك وئرينجه،
پوتي ـ پوتي .
بيز كئچريك دره‌لردن‌، دوزلردن،
پوتي ـ پوتي .
بو دؤولتلي بزيرگانين دالينجا،
پوتي ـ پوتي.
باشقا بير موسافر يئنه اورتا آفريقادا تونقا قبيله‌سينده بير اوغلان اوشاغين گؤروركي اؤز آغ دريلي اربابي اوٍچون داش قيرير و بو نغمه‌‌ني اوخويور:
بيزي سؤيورلر. ائهه…
بيزي دؤيورلر. ائهه…
ايچيب قهوه‌‌ني، ائهه…
بيزه وئرميرلر. ائهه…
او ائهه دئييركن چكيجي داشا چيرپير، كؤكسونو اؤتوروردو.
ايران توركلري بير چوخ ايش ساحه‌سينده او جومله‌دن جوت سوٍرنده‌،‌قويون ساغاندا‌،‌يون أييرنده‌، باليقچيليقدا‌، اووچولوقدا‌، خالچا توخوياندا و …اؤزونه مخصوص نغمه‌لر اوخويارلار‌،‌ميثال اوٍچون آشاغيداكي نومونه‌لري ارائه وئريريك :
1-1-    پامبيق آتما نغمه‌سي:
آذربايجاندا پامبيق آتان حالاجلار پامبيق آتا –آتا بو نغمه‌‌ني اوخويارميشلار :
پم، پم‌، پلّاجم‌،
پامبيق آتارام‌، حلّاجم‌،
پامبيق آتارام نه‌يين اوٍچون؟
پامبيق آتارام خانيم اوٍچون .
خانيمدا بير پول گؤرموشم‌،
پامبيق آتارام اونون اوٍچون .
پم‌،پم‌، پلاّجم‌،
پامبيق آتارام حلاّجم.
بو نغمه‌‌ده (پم‌،‌پم ) سسلري پامبيق آتانين تئله ووردوغو ضربه‌لرين تؤرتديگي سسله عئينيدير. نغمه‌‌نين ريتمي ايسه‌، ايشين اؤز طبيعي ريتميدير .
1-2-    داش توپلاما نغمه‌سي:
آغري داغينين اتگينده كي زميلرده چوخلو داش وار‌، اكينچيلر هر ايل ايشه باشلامازدان قاباق‌،‌بيرليكده داشلاري زميلردن ييغيب قيراغا آتيرلار‌،‌و ايش گؤره-گؤره بو نغمه‌‌ني اوخويورلار :
باخ زمينين داشينا،
وور اربابين باشينا !
بئله كي داشي زميدن قالديراندا بيرينجي ميصراعي «باخ زمي‌نين داشينا» و اونو آپاريب زمي‌نين قيراغينا آتاركن ايكينجي ميصراعي «وور اربابين باشينا» اوخويورلار .
1-3-    كره توتما نغمه‌سي:
كره توتماق اوچون آيراني تولوغا دولدوروب، باشيني برك باغلاييب، ايكي طرفدن اونو چالخايار، بو نغمه‌ني اوخويارلار.
چالخا‌، چالخا ياغ اولسون،
ياغ تولوقدا داغ اولسون .
چالخايين باجي قيزلار
كؤينگي چي ـ چي قيزلار.
يون اييرمه نغمه‌سي :
قاشقايي ائللرينده قادينلارين گؤردوگو ايشلردن بيري ده يون اييرمه ايشيدي، بو آغير ايشي اونلار آشاغيداكي نغمه‌ني زومزومه ائدرك گؤررلر:
اليم شئر‌، اليم شئر‌،
شئر گل منه مدد وئر !
مدد وئرنيم يوخدور‌،
چؤرك يئينيم يوخدور.
توولار اليم‌، ايرلار ديليم
توولارام‌، ائدم گيليم .
هر رنگي بير ياز اولسون
هر نقشه شاهباز اولسون.
اليم شئر،‌ اليم شئر‌،
شئر گل منه مدد وئر!
اليم خمير ايچينده‌،
قيچيم چومور ايچينده.
اليم شئر‌، اليم شئر،
شئر گل منه مدد وئر!
1-4-    دوٍيو دؤيمه نغمه‌سي:
قاشقايي ائلينده تويلاردا دوٍيو پيشيررلر. دوٍيونو آريديب‌، اونون چلتيگيني آييرماق اوٍچون اونو سيركو آدلي قابلارا تؤكوب، دؤيرلر. بو آغير ايش اوٍچون ائلين بوتون قادينلاري و قيز گلينلري يارديمچي اولماليديرلار. قيز گلينلر يورولماسين دئيه‌، بو ايش بير نوع رقص كيمي ايفا اولونار‌، بئله كي آغاجلارين باشينا رنگلي دستمال باغلاييب‌، بيرليكده ايرَلي گئديب، آغاجي دوٍيولره ووروب‌،‌ بيرليكده چكيلرلر. سس_ سسه وئريب اوخورلار. بو نغمه‌لره هاينا هئلي هاينا دئييرلر.
هاينا هئلي هاينا‌،‌
سيزلرده دئيينگ هاينا
بيزده دئرك هاينا‌،
واري دئينگ هاينا .
***
اوتايدا يار اوباسي‌،
دؤيولور ناغاراسي
بوغچا گتير گول آپار‌،
خلوتدي باغ آراسي
هاينا هئلي هاينا‌،‌
سيزلرده دئيينگ هاينا
بيزده دئرك هاينا‌،
واري دئينگ هاينا.
***
كهر آتين قولونو‌،
مخمل ائدينگ چولونو.
بيز گلميشيك آپاراق‌،
سيزينگ باغينگ گولونو.
هاينا هئلي هاينا
سيزلرده دئيينگ هاينا
بيزده دئرك هاينا‌،
واري دئينگ هاينا.
بير پارا امك نغمه‌لري او قدر يايغيندير كي اونلارا موٍعّين آدلار وئريلميشدير مثلا ساغين نغمه‌لريني قويون ساغانلار اوخويار، هولاوارلاري جوت سوٍرنلر و هانا نغمه‌لريني ده فرش توخويانلار اوخويارلار آشاغيدا اونلاردان بير نئچه اؤرنك وئريلير:
1-5-    ساغين نغمه‌لري:
قويون ساغاندا قويون دينج دورسون دئيه موعيّن نغمه‌لر اوخونار‌، بو نغمه‌لره ساغين نغمه‌لري دئييرلر .اورنك اوٍچون :
ننه‌م‌،‌ننه‌م
سني ساغان منم‌، منم
گول مونجوقوم بوينوندادي
ممه‌لرين قوينوندادي
قويروغونو فراغات قوي
آياغيني ايراحات قوي
بوينوزوندا اوٍزرليگيم
ائو –ائشيگيم‌، بزرليگيم
ننه‌م‌،‌ننه‌م
سني ساغان منم‌، منم
1-6-    هولاوارلار:
آذربايجاندا جوٍت سوٍرنده جوٍتچولر هولاوار آدلي ماهنيلار اوخويارلار.اؤرنك:
اؤكوز‌،‌اؤكوز‌،‌خان اؤكوز،
بوينو قيزيل قان اؤكوز،
چك چاييري چمندن
سنه جان قوربان اوكوز.

منيم كليم ناز ائيلر،
قويروق وورار توز ائيلر.
چيينيله چمن سؤكر‌،
ييه‌سيني شاهباز ائيلر.

داغ دؤشونده ياتانا،
گون گئدر آي باتانا.
قارا اؤكوز قارغييار
جوتون ماجين توتانا.

باشينا من دولانيم
من دؤنوم، من دولانيم.
اؤلمه، اؤلمه يازيغام
كؤلگه‌نده من دولانيم.
1-7-    هانا نغمه‌لري:
فرش توخويانلار دا بير دزگاه باشيندا سس- سسه وئريب، بئله اوخويارلار:
آيناني قويوب ايش آراسينا
دمبدم باخير ديش آراسينا،
باشداكي گده سال گده سال!
قالميسان دالا، قال گده قال!
بورداان اوزاق باكيدي
تئللري ياناكيدي.
عوًمرومده بير يار سئوديم،
اودا يانيمداكيدي.

حَيَتلري شافتالي
سندن خاهيشديم بودو
كئچل باشين چك دالي.
بو نغمه‌لرده بير چوخ واختلار ايشين آغيرليغينا گوًره و موزدون آزليغينا اعتيراض سسي اوجالير. آشاغيداكي اوشاق و آتا يادا آنا آراسيندا دئييشمه بو باخيمدان ديقته لاييقدير.
اوشاق:
اي واي آمان كرخانا،
باغريمي قان ائيله‌ييب.
ايلمك سالان بارماغيم
ايلمك قابار ائيله‌ييب.
آتا:
اولسون اوغول گئت گينن
آخشاما جان سورت گينن
آخشام آلان پوللارين
وئر داوايا‌،بارماغيوا سورت گينن

2-     مراسيم نغمه‌لري
شيفاهي ادبياتين أن قديم قوللاريندان بيري ده مراسيم نغمه‌لريدير. مراسيملر ايلين موختليف موسملرينده اجرا اولونار. او جومله‌دن نوروز‌، چيلله گئجه‌سي‌، چرشنبه آخشامي‌،‌سيزدك و …
بيرده ‌اينسانين دوغوم گونوندن اؤلومونه قدر اؤنملي حاديثه‌لرله علاقه‌دار دبلريميز وار. بونلارين بير چوخوندا اؤزونه مخصوص بير نغمه‌لر اوخونار. اونلاردان نومونه اولاراق:
2-1-     چيلله گئجه‌سي نغمه‌سي:
داش ماكيدا چيلله گئجه‌سي بو نغمه‌ني اوخويارلار:
آي چيلله‌، چيلله قارداش
آتين قامچيلا قارداش.
بير گلدين دانيشماديق،
قلبيم آچيلا قارداش.
قوشا چايدا ‍(مياندابدا) چيلله آخشامي گون باتاركن اود يانديريب، اوٍستوندن آتيلارلار. سونرادا اودو قاريشديريب‌، داغيديب، بئله اوخويالار :
چيلله قوودو‌،‌چيلله قوودو
سحر مينجيق،‌ سحر مينجيق.
سحر مينجيق دئديكده ساباهيسي گون مينجيق – مينجيق ياغيش ياغماسيني آرزيلارلار.
2-2-     آخر چرشنبه نغمه‌لري:
ايلين آخر چرشنبه‌سي قيزلار سودان آتيلار‌، بو نغمه‌‌ني اوخويارلار :
آتيل‌،‌ ماتيل چرشنبه
باختيم آچيل چرشنبه.
سو باشينا گلن باشقالاري ايسه :
«آغيرليغيم‌، اوغورلوغوم، درديم‌،‌ بلام‌،‌تؤكولسون بو سويا گئتسين».
دئيه سودان آتيلارلار .
2-3-     نوروز بايرامي نغمه‌لري:
نوروز بايراميندا‌، خوي‌،‌مرند كندلرينده‌، ائله‌جه ده آذربايجانين بير چوخ يئرلرينده بئله نغمه‌لر اوخونار:
گلير نوروز بايرامي
آچيلار گوللر هامي.
ساخلا گلين آنامي
آنامي‌،‌هم آتامي.

نورز گلير، ياز گلير
نغمه گلير‌، ساز گلير.
باغچالار دا گول اولسون!
گول اوسته بولبول اولسون!

نوروز‌، نوروز خوش گلدين
خوش گلدين‌،‌بوش گلدين
بوش گلدين‌،‌دولو گلدين
بول گلدين‌،‌سولو گلدين
اردبيلده سحرين آلاقارانليغيندا دوروب،نوو اوستونه گئدر‌،نوو اوستوندن آتلانيب:
«ديش آغريم،باش آغريم،گوًز آغريم‌، بوردا قالسين». دئيرلر.
بايرام قاباغي آذربايجانين بير چوخ يئرلرينده تكه‌مچيلر گلر ويازين موشتولوقچوسو كيمي تكه‌م اوينادار، تكه‌م ساياسي اوخويارلار.
“فرهاد اردبيلين يورتچو ماحاليندا ائشيتديگي تكه‌م سايالاريندان نئچه‌سيني ثبت ائدميشدير:
تكه‌م گلدي‌،قيشين عوًمرو قوتاردي،
چوبان توتدو اونو داغدا اوتاردي.
گلير بايرام‌،داليسينجا ياز گله‌جك.
سيزين بو تازا بايراميز موبارك.

تكه‌مين ده كندي وار،
اويناتماغا فندي وار..
هر قاپيدا اويناسا
بير نلبكي قندي وار.

تكه‌م گئتدي مئشگينه
وعده وئردي بئش گونه.
گلمه‌دي اون بئش گونه،
تكه‌مي اوًلدوردولر
آتديلار خان كوًشگونه.

آشاغيداكي سؤزلري ده عليرضا اردبيلدن توپلاميشدير:
آي منيم آلا تكه‌م
باشيما بالا تكه‌م.
گزه گن آروادلارين
سيرغاسين يالا تكه‌م.

ياشيللار آي ياشيللار‌،
دوواردان بويلاشيرلار.
بو آيّامين قيزلار
ار اوسته ساواشيرلار.

آغ دومانين اوزلري،
يئره گلمز ديزلري.
بو آيامين قيزلاري
كبين كسير اوًزلري.

تكه‌م گئتدي مرنده،
تاماشادي گلنده.
كول باشينا تكه‌مين،
قايناناسي اوًلنده.

تكه‌م تكه‌م آتلاما
قول –قيچيوي قاتلاما.
ساباه كي بايرام گلير،
گئديب،چوًلده اوتلاما.

تكه‌م بير اويون ائيلر،
قوردولان قويون ائيلر.
ييغار گيلان دويوسون،
چپيشين تويون ائيلر.

اميرالموًمنين تخته چيخاجاق،
يئزيدين بوينونا نوخدا ووراجاق،
شيرين شربت سو يئرينه آخاجاق.
سيزين بو تزه بايراميز موبارك،
آييز، ايليز،گونوز، هفته ز موبارك.

سولطان سر تووله‌‌ده باغلار بوز آتي،
اونون بوينوندا وار قيزيل ساعاتي،
خانلار‌،بَيلر بيزه وئرسين باراتي.
سيزين بو تزه بايراميز موبارك،
آييز، ايليز،گونوز، هفته ز موبارك.

2-4-     توي نغمه‌لري
توي مراسيمينده ده اؤزونه مخصوص ماهنيلار اوخونار. اؤرنك اولاراق:
چيخديم بَيين اوتاغينا،
گليني آليب يانينا،
قادان آناوين جانينا.

تويلار موبارك، موبارك باده
اي گولو ريحان موبارك باده

حيطلري بازيليدي،
كاتان كؤينك يازيليدي.
آنا كؤنلوم آرزيليدي.

تويلار موبارك موبارك باده
ائي گولو ريحان موبارك باده.

فخر ائدير گلين آناسي،
هونرليدي بو بالاسي.
گلين دئمه نار داناسي.

تويلار موبارك، موبارك باده
اي گولو ريحان موبارك باده.
فرهاد اردبيلين يورتچو ماحالينين توي قايدالارين يازاركن گلينين تعريفينده اوخونان بو نغمه‌لري قئيد ائتميشدير.
توي دويوسون آريتميشام؛
دامدان – داما داغيتميشام؛
قيز آناسين قاريتميشام.
گؤًروم آي قيز تويون موبارك اولسون،
قوهومون‌، قارداشين‌،ائلين‌،وار اولسون.

كربلا يولوندا سالديرديم گونبز،
تويونو ائيله‌سين گؤًزه گؤًرونمز.
اوخودو قورآني دئديلر بيلمز.
گؤًروم آي قيز تويون موبارك اولسون،
قوهومون‌، قارداشين‌،ائلين، وار اولسون.

بَيين تعريفينده ده بئله اوخونار:
خونچايا دوزموشم نوغولنان بادام،
تويونو ائيلرم اوركدن شادام.
تويونو ائيله‌سين حضرت آدام
گؤًروم آبَي تويون موبارك اولسون‌،
ساغديشين،سولدوشون،ائلين وار اولسون.

بَي بزندي چيخدي دامين اوستونه،
شفق سالدي دووارلارين اوستونه،
گئدين دئيين دوشمانينا، دوستونا:
گلين گلير دولو قازان اوستونه.
گؤًروم آ بَي تويون موبارك اولسون‌،
ساغديشين‌،سولدوشون،ائلين وار اولسون.

ايلخيچيدا بئله نغمه‌لر اوخونار:
ساق‌ديشينا روستم اولماز برابر
سولديشينا ايسفنديار يالاندير.

بَي اوزو كوچه‌ني ائديب موٍنوّر
گؤروم آ بَي تويون موبارك اولسون
گليني آپارماغا گلن اوغلان آداملار بئله اوخورلار.
آپارماغا گلميشيك،
يار آلماغا گلميشيك.
اوغلانين آدامي‌ييق
آپارماغا گلميشيك.
وئرين بيزيم گليني!
قايني باغلا بئليني!
قيزيل گوللر كولدادير؛
ال چاتمايان قولدادير.
قيزين باختي آغ اولسون؛
قوهوملاري ساغ اولسون
گؤروم چيلچيراق اولسون
خراسانين دره گز بؤلگه‌سينده گلين آپاراندا بو ماهنيني اوخورلار:
آت گتيرين آتلانسين،
آتي كهر يار،يار
گلين گلسين تئز مينسين
آدي گؤهر يار،يار
روخصت وئرين قيز چيخسين‌،
اولدو سحر يار،يار،
يولا سالين تا گئتسين
وئردي خبر يار،يار.

اوچ باجيدان بيريسي،
آتلانادي يار،يار
ايندي اونون گونوسو
پاتلانادي يار،يار.
گلين بئلي اينچه‌دي
اينچه‌ بئللي يار،يار‌،
اوّل چاغا اوغلاندي
بيلين ايندي يار،يار.
نئچه صانديق جاهازلار،
قيفيل تؤلو يار،يار،
بيزدن سيزه قيز گلر
زولفو تؤولويار،يار.
قاشقايلار دا بئله اوخويارلار:
اوباميز سرحدده ‌دير،
مئيليميز شربتده‌دير
بيز كي قيزي آپارديق
دوشمنلر حسرتده‌دير.
گلينه باخ گلينه‌،
الين ووروب بئلينه.
گلينه پيس دئمه‌يين
قاچار گئدر ائوينه.
گلين گلير‌،خان گلير،
بيزيم ائله جان گلير.
آت گتيرين چوللايين
طاووس نقشي يوللايين.

ليباسيني تئز گئيسين
يولا سالين تا گلسين.
بيزيم اوبا ايراقدير
گلين گلسين، تئز مينسين.

اوچ باجينين بيريسي،
قدملري گؤز اوسته
گلين بئلي اينجه‌دير
واريميزدان اوجادير.
گلين آتا ائويندن چيخان گون بَيين كيچيك قارداشي گلينين بئلينه شال باغلايار وبو باياتيني اوخويار:
آنام،باجيم‌،قيز گلين،
ال آياغي دوز گلين.
يدّي اوغلان ايستيرم،
بير‌جه دته قيز گلين.

3-  اووسون نغمه‌لري
آشاغيدا قئيد ائتديگيميز نغمه‌لر‌، جادي و اووسون كيمي‌، طبيعتده تاثير قويماق نيّتي ايله اوخونور :
اووچولار اووو نيشانلاييب‌، اوخ آتاركن بئله دئييرلر :
هاش گئده‌،‌
هوش گئده،
بو اوخ سنه
توش گئده.
اووچونو يولا سالاركن اونون دالينجا بو ويردلري اوخويارلار:
اوواگئدن‌، اووون توش
اووون اولسون مارال‌، قوش
قورد –قوشو سحر –آخشام
لرزه –لرزه سالان گل
بدهئيبتدن‌،‌بداصيلدن،
بدنظردن دولان گل.
بيراوشاقين بوغازي آغريياندا اونون بؤيوگو اليله بوغازيني سيغارلاييب بو ويردي اوخويار:
گئجه گلميسن‌، گئجه قاييت
گوٍنوز گلميسن‌،‌گوٍنوز قاييت
هاواخت گلميسن‌،‌او واخت قاييت
وبئله اينانارلار كي‌خسته‌ليك،نوخوشلوق گوٍنون‌هانسي ساعاتيندا گلميشدي‌سه ائله او ساعاتدا‌ دا نوخوشون جانيندان چيخيب، گئده‌جك.
بيزلرده بئله بير اينانج واردير كي اوزرليك دنه‌لرين اودا توتوب يانديرساق ائودن قادا‌،بالا سوووشاجاق، پاخيللارين‌،گؤزو پارتلاياجاق و دوشمنلر كور اولاجاقدير. اوزرليگي اود اوستونده‌كي قابا تؤكه تؤكه بو شعيرلري اوخويارلار:
اوزرليكسن هاواسان.
مين بير درده داواسان.
درد قاپيدان گيرنده،
سن باجادان قوواسان.
بير،ايكي،اوچ، دؤرت،بئش،آلتي، يئددي،
قادا‌،بالا قويدو گئتدي.

خوراسان توركلري ايسه بئله شعيرلر اوخورلار:
گؤز وورانين گؤزو چيخسين
ديل وورانين ديلي شيشسين
گؤتوره بيلمه‌ينين بئلي سينسين
قادا بالا بيزدن گئتسين.
بير پارا اووسونلار دا واردير كي نثر پارچالاريدير.مثلا:
اوشاغي بله‌يندن سونرا آناسي اوچ يول اليني يئره چاليب،اوشاغين كورگينه وورار و دئير:
–           هامي‌نين يوخوسو سنين اولسون.
و اينانير كي اوشاق آغير ياتاجاق.
ايرانين قوٍزئي دوغوسوندا اولان شاهرود شهرينين بير پارا كندلرينين اهاليسي توركدور. “ابر”آدلي همين كندلرين بيرينده شوملانميش زميلره توخوم سپمك موعيّن مراسيم ايله كئچيريلير .اكينچيلر توخومون آغيرليغي‌جا خورما يا دا قاوون زمينين بير گوشه‌سينه قويارلار سونرا اوٍزو قيبله‌يه‌،ساغ اليله يئره توخوم سپيب،بونلاري اوخويارلار:
خودايا سنين امودونا شو بوغدا‌، شو خورمايا اوٍزوم يا انار كيمي عمل ائتسين، تويا خرج بولسون
4- ساياچي سؤزلري
ساياچيلار ايلين موختليف فصيللرينده، مثلا چيله گونو‌،‌يادا يايين قوراقليق گونلرينده ائل‌، اوبا ايچينه گئديب، سايا آدلي شعرلر اوخويارلار.
بايرام قاباغي دا تكه اوينادان تكمچيلرين اوخودوغو شعيرلر ده سايالار سيراسيندا يئر توتور.
هم ده بيزلرده ياس سايالاري واردير كي او حاقدا آغيلار بؤلومونده بيلگيلر وئريلميشدير.
سايا سؤزونون منشأيي حاقّيندا بو گونه كيمي موختليف نظريه‌لر سؤيله‌‌نيليب‌،‌مثلا فريدون بي كؤچرلي اونو فارسجا سايه سؤزوويله عئيني بير كلمه كيمي قلمه آليب‌، باشقالاري ايسه اونو سايماق فعليندن آلينما بير كلمه كيمي آنلاييبلار.
منجه سايالارين فورم‌، مؤحتوا و سؤز خزينه‌سي باخيميندان چوخ قديم بير قوشمالار اولدوغو نظره آلينيرسا اونو ساكا و ساقا سؤزلريله ايلگيلي اولدوغونو دوشونمك اولار.
معلوم اولدوغو كيمي بير چوخ شعر و ماهني آدلاري موعيّن تورك ائللرينين آديله باغليدير. مثلا گرايلي‌، وارساغي‌، كئشگؤللو ‌، بورچالي‌، باياتي‌، اووشاري آدلي مشهور موسيقي هاوالاري و شعر فورملاري‌، گرايليلار‌، وارساقلار‌، كئشگوللولر‌، بورچاليلار‌، باياتلار‌، آوشارلار آديله باغليدير.
اولا بيلسين كي اسكي چاغلارين مشهور قبيله‌لريندن اولان ساكالارين آديني داشييان بو اسكي قوشمالار حقيقتا ده ائله اصلينده ساكالارين طرفيندن يارانميش اولسون.
ماراقليديركي بو گون اسكانديناوي خلقلري‌نين ديلينده ده ساقا آدلي بيزيم سايالاريميزا اوخشار فولكلوريك شعرلر ترنّوم اولماقدادير. همين سؤزجوكSaga شكلينده انگيليزجه‌يه ده كئچميش و او ديلده شيفاهي‌، منظوم تاريخي روايت معناسيندا ايشله‌‌نيلير.
سايالاردان نومونه‌لر :

سلام عليك ساي بيلر‌،
بير-بيريندن يئي بيلر .
سايا گلدي گؤرونوز ؛
سلام وئردي آلينيز .
بير قويونلا‌، بير كئچي
آغلي قارا بوز كئچي
سايا چييا وئرينيز .

ننه‌م او شيشك قويون‌،
يونو بير دؤشك قويون .
بولاماني تئز يئتير
قيريلدي اوشاق قويون.

ننه‌م او خاللي كئچي،
ممه‌سي باللي كئچي.
اوجا قايا باشيندا
توتوبدو ياللي كئچي‌،

گؤيده‌كي گؤي بولودلار
يورقانيدير چوبانين.
ياستي –ياستي تپه‌لر
ياستيغيدير چوبانين .
يومرو –يومرو قايالار
يومروغو دور چوبانين.
الينده‌كي دگنك
قالخانيدير چوبانين.
يانيندا‌كي بوز كوپك
يولداشيدير چوبانين.
آغزي قارا جاناوار
دوشمانيدير چوبانين.
قويونون يوزو گلدي
دولاندي دوزو گلدي.
چوبانين قوجاغيندا
بير امليك قوزوگلدي.
يئرين داغ اولسون چوبان‌،
كئفين چاغ اولسون چوبان.
قويونو ياخشي ساخلا
اوزون آغ اولسون چوبان.

سيزين جانيز ساغ اولسون.
پاييز بوغدا ياغ اولسون
هامينيز ائلليگينجه
داماغينيز چاغ اولسون.

ننه‌م قارا قاش قويون
قارلي داغلار آش قويون.
آي قارانليق گئجه‌ده
چوبانا يولداش قويون.

چوبان قويونو گؤتوره‌سي.
اونو بره‌يه يئتيره سي،
آغ بيلكلي گلينلر
ساغيم، ساغيم دئييه سي،
آغ بيرچكلي قاريلار
بيليغيم، بيليغيم دئيه‌سي،
بو اوغلومون دئيه سي
بو قيزيمين دئيه‌سي.
ساري سويو قالاندا
بوز كؤپگه تؤكه‌سي.
……
ياغيش ايستمه سايالاري
ساياچيلار ايلين قوراقليق آيلاريندا دا كندلره،گليب ياغيش سايالاري اوخورلار:

آلا داغين بولودو،
قارا داغين بولودو.
آلّاه بير ياغيش گؤندر،
دئملريميز قورودو .
ياغيش ايستمه سايالاري عئيني حالدا موٍعين مراسيم ايله ده كئچيريلير.بونلار كوسا گلين بعضا ده چؤمچه خاتين آدلاري ايله آدلانير .
قاشقاي توركلري ياغيش ايستمه مراسيمينده بئله اوخويارلار::
كوساگلين نه ايستر؟
تاريدان ياغيش ايستر.
آلله ياغيش وئره‌يدي
نذريم قبول اولايدي.
ياغ ياغيشيم سئل گله
ياغ تا يئتتيملر دويا.
ياغ فاغيرين آرپاسينا
ياغ قوجانين لته‌سينه
تاري ايشي حسابدير
كوسا خاستي سئلابدير.
خوراسانين دره‌گز بؤلگه‌سينده بو نغمه‌ني اوخويارلار:
كوسان كوسان نه ايستر ؟
تاريدان ياغيش ايستر.
كوسان ايشي قصابدي
قاردا ياغسا حسابدي.
كوسان يازيق كاسيبدي،
چوخ بورج اونو باسيبدي.
آلّاه ياغيش وئر گينن
نذريم قبول ائت گينن.
ياغ ياغيشيم سئلگينه،
ياغ يتيمين بئلگينه
ياغ صغيرين باغچاسينا
ياغ قوجانين ديمه‌سينه.
آذربايجاندا ايسه بئله سايالار اوخونار.
چؤمچه خاتين نه ايستر
آللاهدان ياغيش ايستر
الي قولو خميرده
بيرجه قاشيق سو ايستر

چاخ داشي‌،چاخماق داشي
ياندي اورگيم باشي.

بيچينلرين يولداشي
اكينلرين يولداشي
قالاق، قالاق خرمنلر
هاني چايين نم داشي؟

چاخ داشي‌،چاخماق داشي
ياندي اورگيم باشي.

ياندي آلمالار باشي،
ياندي هئيوالار باشي،
هئيوالار ساري ساري
دوزله‌يير ساپا قاري.
بولوتلار سيزي تاري
گلين بو كنده ساري.
بو كند بَي‌لر كنديدي،
ايگيت خَي‌لر كنديدي..
داغلار قوراق – قوراقدي
تيكان توراق – توراقدي
تيكان نه‌يه كاريمدي،
منه لازيم اوراقدي.

چاخ داشي‌، چاخماق داشي
هاني گؤيون يولداشي
ياندي داغلارين باشي
آللاه بير ياغيش گؤندر
گؤيرتسين داغي‌،داشي.
آلاداغين بولودو‌،
اكينچي‌نين اومودو
آللاه بير ياغيش گؤندر،
آرپا‌، بوغدا قورودو.

چاخ داشي‌،چاخماق داشي
ساياچييا پاي داشي.
اولدوغوندان پاي وئرن
علي اولسون يولداشي.
وار اولان‌،الين قيسان
ياستيغي ميسمار داشي.
وئرن ال آللاه الي
اللره يارديم علي
ائللره يارديم علي.
چاخ داشي‌،چاخماق داشي.
سايا چييا پاي داشي.

قودو قودونو گؤردونمو؟
قودويا سالام وئردينمي؟
قودو بورادان اؤتنده
قيرميزي گونو گؤردونمو؟
ياغ وئرين ياغلاماغا
بال وئرين باللاماغا
قودو گولمك ايسته يير
قويمايين آغلاماغا.
قودويا قايماق گرك
قابلارا يايماق گرك
قودو گون چيخارماسا
گؤزلرين اويماق گرك.
ياغيش كسمه سايالاري

گتي گتي ها گتي گتي
قيزيل قايا ديبيندن
بير قيرميزي گون گتي
كئچل قيزي قوي ائوده
ساچلي قيزي گتي گتي
گون گئديب، سو ايچمگه
آل دونون دييشمگه.
دومانلار قاچين، قاچين
گونش يولون آچين‌،آچين
توتوب سيزي آسارلار
بوينوزا دامغا باسارلار.
قارا تويوق قاناتي
كيم ووردو‌،كيم سانادي؟
گئتديم گون گتيرمگه
ايت بالديريم دالادي

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *