ساري گلين
مير علي سيد سلامت
ساري گلين اویونو, ان اسکي آیين, اویون مراسيملردن بيري سایـيلير. سالور قازانـين خانمانينـين یـيغمالانما, بویوندا دئیيلير.
«شوکلي مليکين قوشونو, دون بوجاغيندان قازان بگين اوردوسونا گلدي- آلتون بان ائولرين کافرلر چاپديلار,… بویو اوزون بورلا خاتون اسير گئتدي. قازان بگين قاريجيق اولموش آناسي قره دوه بوینوندا آسيلي گئـتدي, خان قازانـين اوغلو اوروز بگ, بوینو باغلي گئـتدي.» (کيتاب دده قورقود «فرزانه»).
آلتون بان ائولر, ايشيق اولکهسينين «گونش»يندن عبارتدير, کي مليک شوکلي الينده اسير گئدير. بو اسارت اوروز (اينک رب-و- النووو) ايله بيرگه ۱۶ ايل قدهري, زامان آپارير. اون آلتي ايلدن سونرا, اوروز, گونش (یا سلجان خاتون- کي اسير دوشموش گونشدن عبارتدير و مليک شوکلينين قـيزي آدلانـير) یارديمي ايله, دوستاقدان قاچير و دوباره قایـيديب بير قارا وحشي اينکله موباريزهیه داخيل اولماقلا و غلبه چالماقلا, گونشي اسارتدن آزاد ائديب, اؤز بوینوزلاري اوسته حمل ائديب, قازان بگين یارديمي ايله محلينده نصب ائديرلر.
ساري گلين رقصي, اوروزون, قارا وحشي اينکله موباريزهیه داخيل اولماقدان اؤنجه بو موباريزهني عزيزلهمک آیين, مراسيم ايفاسيدير. فيگورجا, بير قول باغلي, بير قول آچيق, گؤز گونشده- «طلب», «تمنا», «شیداليق»… ان یوکسک درجهده, گؤستريلير. او کس کي موباريزهیه داخيل اولوب, اورهکدن, گونشه, ايشيغا, عاشيقدير و بو عئشق علويت, باشي اوجاليق, عدالت و دونیاني ايشيق طرفينه چاغيرماغا, دوغرو اولور. دئمهلي, sari, گونشدير. دئمک, ساري گلين گونشين اهريمن اليندن آزاد اولما مراسيمي- آیيني سایـيلير.