ساری گلین
میر علی سید سلامت
ساری گلین اویونو, ان اسکی آیین, اویون مراسیملردن بیری سایـیلیر. سالور قازانـین خانمانینـین یـیغمالانما, بویوندا دئییلیر.
«شوکلی ملیکین قوشونو, دون بوجاغیندان قازان بگین اوردوسونا گلدی- آلتون بان ائولرین کافرلر چاپدیلار,… بویو اوزون بورلا خاتون اسیر گئتدی. قازان بگین قاریجیق اولموش آناسی قره دوه بوینوندا آسیلی گئـتدی, خان قازانـین اوغلو اوروز بگ, بوینو باغلی گئـتدی.» (کیتاب دده قورقود «فرزانه»).
آلتون بان ائولر, ایشیق اولکهسینین «گونش»یندن عبارتدیر, کی ملیک شوکلی الینده اسیر گئدیر. بو اسارت اوروز (اینک رب-و- النووو) ایله بیرگه ۱۶ ایل قدهری, زامان آپاریر. اون آلتی ایلدن سونرا, اوروز, گونش (یا سلجان خاتون- کی اسیر دوشموش گونشدن عبارتدیر و ملیک شوکلینین قـیزی آدلانـیر) یاردیمی ایله, دوستاقدان قاچیر و دوباره قایـیدیب بیر قارا وحشی اینکله موباریزهیه داخیل اولماقلا و غلبه چالماقلا, گونشی اسارتدن آزاد ائدیب, اؤز بوینوزلاری اوسته حمل ائدیب, قازان بگین یاردیمی ایله محلینده نصب ائدیرلر.
ساری گلین رقصی, اوروزون, قارا وحشی اینکله موباریزهیه داخیل اولماقدان اؤنجه بو موباریزهنی عزیزلهمک آیین, مراسیم ایفاسیدیر. فیگورجا, بیر قول باغلی, بیر قول آچیق, گؤز گونشده- «طلب», «تمنا», «شیدالیق»… ان یوکسک درجهده, گؤستریلیر. او کس کی موباریزهیه داخیل اولوب, اورهکدن, گونشه, ایشیغا, عاشیقدیر و بو عئشق علویت, باشی اوجالیق, عدالت و دونیانی ایشیق طرفینه چاغیرماغا, دوغرو اولور. دئمهلی, sari, گونشدیر. دئمک, ساری گلین گونشین اهریمن الیندن آزاد اولما مراسیمی- آیینی سایـیلیر.
