س: عزیز اوستاد، لوطفن اؤزونوزو تانیتدیرین! هاردا دونیایا گلیبسینیز و اؤیرنجیلیک زامانلارینیز …؟
ج: من ایوب اوغلو ابوطالب اللهیاری، «توتقون» تخلصی ایله گاهدان جیزما قارا شعرلر یازارام. آذربایجانین ایگیدلر یوردو، قاراداغ ماحالینین دیزمار منطقهسینین دلبر گوشهسی، «جوشون» کندینده رحمتلیک ساهر دئمیشکن: اکینلر گؤیرنده، آغاجلار گوللهننده، (آغلار گولر) آییندا سحیرلی، مرموز دونیادان ایشیقلی دونیایا گؤز آچمیشام. تخمیناً ۱۰ یاشلاریمدا، عائله ایله بیرگه، مؤحتشم تبریز شهرینه کؤچوب و ستارخان محللهسینده یئرلشمیشیک. ابتدایی، اورتا مکتب و اونیوئرسیتهنی تبریز شهرینده بیتیرمیشم. ۲۰۱۴ نجی ایلده آذربایجان اؤلکهسینه گئدیب، بوردا ادبیات اوزره فلسفه تحصیلی آلمیشام. ۲۰۱۷ نجی ایلده اوستاد شهریارین یاشاییش و یارادیجیلیغی موضوعسوندا دوکتورا دیسئرتاسیاسینی مدافعه ائتمیشم…
س: اوستاد نئجه اولدو کی ادبیاتدا چالیشماغا باشلامیسینیز؟ ایلک اؤیرتمهنیز کیم اولموش؟
ج: منیم ایلک معلیمیم رحمتلیک آنام اولموش. مکمل اولاراق شریف قرآن کیتابینی آنامدان اؤیرنمیشم. آنام قرآندان علاوه داها چوخ بایاتی، گرایلی شعرلر بیلردی؛ ائلهجهده اونون زومزومهلری، سیزلامالاری اوشاقلیقدان بری منده شعره گؤره گیزلی حس دویغو یاراتمیشدیر. یئنی یئتمه چاغلاریمدا شعر پریسی منیم سوراغیما گلمیش، داها سونرا ادبی چالیشمالاریم اولوب.
س: ایندییه کیمی یاییلمیش ادبی چالیشمالارینیز ساحه ده دانیشین لطفا. بو گونلرده سیزدن تازا کیتاب چاپ اولاجاقمی؟
ج: ایندییهدک ۱۹ جیلد مختلف موضوعلاردا فارسجا، تورکجه کیتابلاریم ایشیق اوزو گورموش او جوملهدن:
1-«حرم یاپراغی»، ۲-«منیم بیرینجی، ایکینجی پاییم»، ۳-«گونش کروانی» مختلف موضوعلاردا شعر کیتابلاریم، چئشیتلی قونولاردا، ۴-«مجموعه مقالات» عنوانلی فارسجا بیر جیلد کیتابیم، ۵-«حکایت سنگها» تورکجهدن فارسجایا ترجمه، ۷-«شهد مصفا»(بؤیوک فضولینین تورکجه دیوانینین تصحیح و یوزومو- ۳ جلد)، ۹-«ای شانه او گیسوی پریشانه دولاشما»(تبریزلی صرافین دیوانینین تصحیح و آراشدیرماسی)، ۱۰- مشکات نور( آیات دعایی قرآن کریم – فارسجا، تورکجه، عرب و لاتین الیفباسی ایله). ۱۱- بدیعی صنعتلر، ۱۲- گولپینار(تورکجه- رمان ). ۱۳- آت، مین حاق سؤز دانیش، ۱۴-کلاسیک شاعرلردن آراشدیرما، ۱۵- حکایهلر توپلوسو
چاپا حاضیرلانمیش کیتابلاریم: ۱-حضرت فضولینین لیلی مجنون عاشقانه منظومهسی. ۲- ایکی جیلد فارسجا، تورکجه شعر، ۳- تاریخ آذربایجان(تورکجه دن ترجومه) (۲ جیلد)، ۴- تورکجه، فارسجا مقالهلر توپلوسو(۱جیلد)، ۵- تانیشلیق(رمان)، ۶- تورکجه دیل تؤرهنی(گراماتیکا)، ۷- گونش زولاغی(رومان)، ۸- دیوان توتقون جیلد ۱ و ۲
ایراندا، آذربایجاندا ادبی- تحقیقی مقالهلریم چاپ اولموش… شاعرلرین کیتابلارینا اؤن سؤز، تقریظ یازمیشام و بیر نئچه تقدیرنامه و ادبی اؤدوللره لایق گؤرونموشم.
س: اوستاد سیزین فضولی حضرتلرینه ایرادتینیز آیدیندیر. فضولی حضرتلریندن ان سئودیینیز غزل هانسیدیر؟
ج:
آشیان مرغ دل زلف پریشانیندادیر
قاندا اولسام ای پری کؤنلوم سنین یانیندادیر.
عشق دردیله خوشام ال چک علاجیمدان طبیب؛
قیلما درمان کیم هلاکیم زهری، درمانیندادیر.
چکمه دامن ناز ائدیب افتادهلردن، وهم قیل
گؤیلره آچیلماسین اللر کی، دامانیندادیر.
سیزدن چوخ شعرلر اوخوموشام و هر بیر شعرینیزدن گؤزل دویغولار آلمیشام. رومان کیتابینیزدا چوخ باشقا بیر توتقونلا تانیش اولدوم. فضولی حضرتلرینین شعرلری، غزللری منی درین دویغولارا آپارار و شهد مصفا اوچ جیلدلیک کیتاب، فضولی حضرتلرینین دویغولارینا ترجمان اولموش…. و س. سیزین ادبیاتیمیزا قاتدیغینیز دهیرلر اصلا دانیلمازدیر و مطلق کی سیزدن یئنی کیتابلار گؤرهجهییک.
سون سؤز اولاراق، سیزدن بو صمیمی دانیشیق اوچون چوخ تشککور ائدیرم. قلمینیز هر زامان یازار اولسون.
