یازیچیلیق قابلیتیمی، آنا دیلیمه دؤندوکده کشف ائتدیم
قایناق: «خوشخبر» قزئتی/ کریم دلاویز
اؤنجه گوجلو یازاریمیز خانیم رقیه کبیری‌دن بیزیم‌له بو مصاحیبه اوچون وقت آییردیقلارینا گوره درین تشککور و میننتدارلیغمیزی بیل‌دیریپ بیلسینه اوغورلار آرزولاییریق.
رقیه کبیری آرتیق ادبیات، رومان و صیاحتنامه یازماق صاحهسینده تانینمیش بیری‌دیر، بیزیم اوخوجولارا اؤزونوزو یئنیدن تانیت‌دیرماق اوچون نه جواب وئره‌‌ردینیز؟
آلتمیش یاشلی، ادبیات و اوخویوب- یازماق دوشگونلویو اولان بیر انسانام، دئیه بیلرم.
یازیب، یاراتماق دونیاسینا نئجه ماراقلی اولدوز؟ یازیب-یاراتماق نئجه باشلاندی و نجور گلیشدی سیزده؟
هر انسانین یازیب-یاراتماق قابلیتی اولدوغونا اینانیرام، انسان بو قابلیتینی تانیییب، اؤزونه ایناندیغی گون و یورولمادان چالیشماقلا پئشهکار بیر یازیچیلیغا ساری آددیم آتا بیلر دئیه، دوشونورم. آنجاق بیزیم اؤلکه‌ده رسمی صورتده مکتب و درسلیک کتاب اولمادان آنا دیلینده یازماغا باشلاماق ایسته‌دییینده بیراز فرقلی احوالات یاشاییرسان، آنا دیلینی مکتبسیز، کیتابسیز اؤیرنیب، یازیرکن صاحیب اولدوغون وارلیقلارینلا نه قدر بیگانه اولدوغونو باشا دوشورسن. من صاحیب اولدوغوم وارلیقلاریملا بیگانه اولدوغومو بیر چیله گئجه‌سی شنلیینده باشا دوشدوم. مندن شعر اوخوماغیمی ایسته‌دیلر، منسه بیر فارسجا شعر اوخودوم. سونرا قوناقلاردان بیری دئدی: «ایندی اؤز دیلیمیزده بیر شعر اوخو!»
آزما-چوخ معجز، شهریار و حافظ غزللرینین تورکجه‌سینی اوخوماغی باجارسایدیم دا، او گونه کیمی تورکجه یازماق عاغلیما بئله گلمه‌میشدی. اؤز دیلیمیزده یازماغی باشارمیرام دئدیییم آن سانکی کهف یوخوسوندان آییلمیش کیمی اولدوم. ائرته‌سی گون بیرینجی ایشیم بهزاد بهزادی‌نین فارسجا-تورکجه سؤزلوک کیتابینی آلماق اولدو.
قاباقجالار فارسجا جیزما-قارالامالار، آشاغی سویه‌ده شعرلر و حیکایه‌لر یازدیغیما باخمایاراق آنادیلیمده یازماغا باشلادیقدان سونرا ۴۳ ایل عرضینده دانیشدیغیم دیلین ظرفیتلریله تانیش اولوب، گیزلی قالمیش بیر خزینه‌نی کشف ائتمیش کیمی هیجانلانیردیم. قاباقجا بیر نئچه فارسجا حیکایه‌م سایتلارین بیرینده و آردیندان بیر حیکایه و ایکی مقاله‌م دیلماج درگیسینده چاپ اولسا دا، من هر زامان حیکایه‌لریمین چاپ مبدأنی «آفتاب آذربایجان» درگیسینده چاپ اولموش تورکجه حیکایه‌لریم نظرده توتورام. او حیکایه‌لر نحو و نگارش باخیمیندان سورونلو اولسا دا، منیم اؤزگوونلییمی آرتیریب، آنا دیلیمده یازماغی داها آرتیق جدی توتدوم. دئمک اولار یازیچیلیق قابلیتیمی کشف ائتدییمین سببی آنا دیلیمه دؤنمک اولدو.
من بیلدیغیم قدری سیزین یارادیجیلیق صاحه‌نیز گئنیش بیر آلانی قاپساییر؛ ان آزی بئش صاحه‌نی آد آپارماق اولار، سوسیال قونولاردا یازیلار خصوصا قادینلار حاقیندا قیسا حیکایه‌لر، صیاحتنامه‌‌لر، شعرلر و اوشاق ادبیاتی، ندن بو قدر گئنیش؟
ایندیه کیمی ندنینه فیکیرلشمه‌میشم. سوسیال قونولارلا باغلی یازدیغیم یازیلار «آیاق اوستو یازیلار» آدلی آندا یازدیغیم یازیلاردان عیبارتدی و بو یازیلاری تاکسیده، بازاردا، چؤرک صفینده بئله یازمیشلیغیم اولوب. قادینین اجتماعی- سیاسی جایگاهی هر هانسی بیر اؤلکه‌نین قانونلارینین نئجه‌لییینی اؤلچمک اوچون بیر محک داشی کیمی‌دیر. بیزیم اؤلکه‌نین شرایطینده قادینلار گونده‌لیک مسئله‌لرله باغلی دوشونجه‌لرینی متن و یا اینجه‌صنعتین باشقا ژانرلاریندا پایلاشماقلا مستقل بیر فکری کیملیک قازانا بیلرلر و بو حرکت آتاارکیل دوشونجه‌نین اتوریته‌سیندن قورتولماق اوچون اؤنملی بیر آددیم‌دیر. قادینلارین دوشونجه‌لریله باغلی ان قیسا یازیلاری بئله قیمتلی‌دیر دئیه دوشونورم.
اوشاق ادبیاتی چوخ مسئولیتلی بیر ژانردی، من بو ژانردا پئشهکار بیر یازیچی دئییلم، ساده‌جه نسیم خانیم صادق برنجی‌نین رساملیغی ایله بیر کتاب چاپ ائتمیشم.
شاعیر اولدوغوملا باغلی هئچ بیر ادعام یوخدور، شعر یازسام دا، ایللر‌دیر فایلیمدا قالیر و پایلاشمیرام. صیاحتنامه، رومان و حیکایه ژانرلارینین بیربیرینه بنزرلییی اولدوغونو دوشونورم، آنجاق صیاحتنامهده گؤروب، گؤتوردوکلرین، جغرافیا، تاریخ، معماری و کولتورل اؤزللیکلری حاقدا یازماقلا یاناشی گؤردوکلرینله باغلی شخصی تأویللرینی ده یازیرسان، اوسته‌لیک رومان و حیکایه‌نین عکسینه صیاحتنامه عمومیتده سفر تاریخینی نظرده توتاراق خطی بیر روایت کیمی یازیلیر. رومانا گلینجه، رومان ژانری اؤنجه‌دن معین اولموش بیر طرح اساسیندا، حیکایه‌ایسه هم اؤنجه‌دن معین اولموش طرح یا مضمون اساسیندا هم ده بیر آندا یارانیب، یازیلا بیلن بیر یازی ژانری‌دیر و تخیل دئییلن عنصر بو ژانرلارین اؤنملی عنصرلریندن ساییلیر.
بوتون بو آچیقلامالاردان مقصدیم فعالیت آلانیمین چوخ دا گئنیش اولمادیغینی و صیاحتنامه ایله رومان بیر عایله‌نین ایکی فرقلی اولادی کیمی اولدوغونو قید ائتمک ایسته‌دیم.
بو صاحه‌لرین هر هانسی بیر توالی نظملری وار می؟ یعنی زامان اولاراق بیریندن بیرینه گئتمک کیمی. قید ائتدییم توالی وارسا ندنلرینی آچیقلایا بیلرسینیز می؟
سیزین دوشوندویوز کیمی اثرلریمی هر هانسی بیر نظم اساسیندا یازمامیشام. سفرده توپلادیغیم عکسلر و یازدیغیم آنلیق یازیلاری پازل کیمی بیربیرینین کنارینا دوزوب، نهایتده صیاحتنامه کتابی کیمی چاپ ائتمیشم. رومان و حیکایه‌یه گلینجه، رومان مضمونو بیر آندا عاغلیما گلسه ده، یازماغا باشلامامیش طرحینی یازیب، باشلانیش، سون و اورتادا اوز وئره‌جک حادیثه‌لری اؤزومه معلوم ائلرم. بونونلا بئله یازی پروسه‌سینده چوخ شئلر دییشه بیلر، آما بعضی حیکایه‌لر بیر آندا ذهنیمده یارانیب، او آنی ایتیرمهدن یازاماغا باشلایارام. مثال اوچون گونلرین بیرینده پئشهکار بیر تبریزلی عکاسین «فرزندان فاقد هویت» آدلی عکس مجموعه‌سینه باخیردیم، بو عکسلرین ایکیسی منه او قدر تاثیر ائله‌دی کی، او آن ذهنیمده «امارات چوخ اوزاقدی؟» آدلی بیر حیکایه یاراندی، زامانی ایتیرمهدن گئجه سحره کیمی اوتوروب، حیکایه‌نی بیر باشا یازدیم.
صیاحتنامه صاحهسینده قلم چالماق و سفر گؤروشلرینی پایلاشماق ان قدیم یازی فرمتلریندن اولسا بئله بیزیم چاغداش ادبیاتیمیزدا یئری بوش گؤرونوردو، شخصا سیزین بو صاحه‌یه گیرمه‌نیز منیم اوچون چوخ ماراقلی‌دیر، صیاحتنامه یازماغین فیکری هاردان باشلاندی؟ سفرین احوالات و دویغولارینی پایلاشماق نئجه حیس‌دیر؟
عمومیتده سفره گئتدییمده گؤردوکلریمی عکس قالیبیندا ثبت ائتمک و آنلیق یازیلار یازماق عادتیم‌دیر. ۳۰ ایللیک چالیشمادان سونرا امکلیلیکدن دولایی منه وئریلن پول ایله چین، اورتاآسیانین بعضی اؤلکه‌لری، یونان و ایتالیا کیمی تاریخی یئرلری گزمک هدفلریمدن بیری ایدی. آنجاق اؤلکه‌میزین اقتصادی وضعیتی یالنیز چین و اؤزبکستان اؤلکه‌لرینه سفر ائتمه‌یه امکان وئردی و یاریمچیلیق قالمیش بیر چوخ دیله‌ییم کیمی سفر ایله باغلی دیلکلریم ده یاریمچیلیق قالدی. صیاحتنامه یازماق فیکری توریست کیمی اوغلوملا بیرلیکده چین اؤلکه‌سینه(پکن شهرینه)گئتمه‌میش باشلاندی. تورکیه‌دن «رولان بارت» یازدیغی «چین یولچولوغو دفترلری» آدلی بیر کتاب آلمیشدیم. بارت بو اثرینده متندن علاوه فرقلی نیشانه‌لرله، مثلا قاش-گؤزسوز بیر آدام رسمی، یا باشیندا آغاج بیتتمیش بیر اوغلان و یا بیر قادین آیاغی کیمی رسملرله روایتینی ایره‌لی سوردورموشدو. اونون سفر روایتلرینی اوخویورکن من ده صیاحتنامه یازا بیلرم کیمی بیر فیکیر عاغلیما گلمیشدی، همان ایللرده شیوا فرهمند راد «چه میدانم» آدلی وبلاگیندا نیوزیلند صیاحتنامه‌سینی بؤلوم- بؤلوم پایلاشیردی من ایسه اونون ثابیت اوخوجولاریندان ایدیم. او جاذبه‌لی یازیلاری اوخویورکن صیاحتنامه یازماغا قطعی قرار وئردیم. چین پارادوکسلارلا دولو، سیاسی باخیمدان سوسیالیست، اقتصادی باخیمدان کاپیتالیزم دوشونجه‌لریله اداره اولونان بیر اؤلکه اولدوغونا گؤره گؤرمک ایسته‌دیییم اؤلکه‌لردن ساییلیردی. خصوصا تیانآنمن مئیدانیندا اوز وئرن حادثه‌لره گؤره او مئیدانی یاخیندان گؤروب، دانشجولارین مقاومت ائتدییی مکاندا آددیملاییب، دویغولاریمی قلمه آلماغا چوخ ماراقلی ایدیم.
سفر احوالاتی و دویغولارینی پایلاشماق حاقیندا دئمه‌لییم کی رومانین عکسینه صیاحتنامهده یازیچی حقیقی بیر شخص کیمی بوتون مکانلاردا، حادثه‌لرده حاضیر اولان اؤنملی بیر عنصردی و بیلرکدن حیاتینین بیر بؤلومونو اوخوجویا گؤستریب، تجربه و دویغولاریندان اوخوجویا دا پای وئرمهیه چالیشیر، نئجه کی قدیمدن دئییبلر: وصفالعیش، نصفالعیش. آنجاق رومان یازیلیرکن یازی پروسه‌سی یالنیز و یالینز یازیچییا عایید اولان بیر پروسه‌‌دیر. منجه هئچ بیر یازیچی بو پروسه‌ده یاشادیغی دویغولاری پایلاشماق ایستمز. چونکی بو پروسه یازیچینین تایسیز و معنوی ثروتی ساییلیر و اوخوجو یارادیجیلیق پروسه‌سیندن خبری اولمادان، روماندا یارانمیش بیر دونیایلا قارشیلاشیر.
یئری گلمیشکن هانسی صیاحتنامه‌لری بیه‌نیرسیز؟ (البته باشقالار یازان منظوروم‌دی)
دئدیییم کیمی صیاحتنامه اوخوماق باشقا بیر انسانین ذوق و تجربه‌لریله اشتراک ائتمک کیمی‌دیر، منسه اسکی و چاغداش صیاحتنامه‌لری اوخوماغا ماراقلی اولان بیر انسانام. آنا دیلیمیزده یازیلمیش، حامد احمدی‌نین «تاپیلماق اوچون ایتمک» آدلی صیاحتنامه‌سینی چوخ بینمیشم. بو صیاحتنامهده آل احمدین ایزی گؤرونسه ده، بعضی تجربه‌لر و باخیشلار حامداحمدی‌نین دونیا گؤروشونه مخصوص بیر باخیش‌دیر.
گلک رومان و قیسا حیکایه‌‌لره، سیز اوچون رومان و قیسا حیکایه نه دئمک‌دیر؟ مثال اوچون، گونجل، اجتماعی ( سوسیال ) و… مسئله‌‌لری طرح ائتمک اوچون بیر مئدیا (واسیطه) دیر، یوخسا اؤزلوگونده سیزه بیر ذاتی دیری وار ؟
حیکایه و رومان، هر بیری اؤزونه مخصوص ییغجام و گئنیش دونیالاردان عیبارتدی و بو دونیالار ساده‌جه یازماقلا یارانیر. یازماق ایسه منیم اوچون بیر پروسه‌‌دیر، بو پروسه‌ده رئال حیاتدا یاشانمیشلار، یاشانا بیله‌جکلر و یاشانماز حادیثه‌لر اوز وئریر و بو حادیثه‌لرین ایچینده سوسیال مسئله‌لر ده یئر آلا بیلر، آنجاق یازیچی بیر سوسیال ایشچی (اجتماعی مددکار) کیمی اؤزل بیر وظیفه‌نی عهده‌لنمیر، یاراتدیغی دونیالاردا ساده‌جه یول-یؤندم گؤستره بیلر دئیه دوشونورم.
رومان و حیکایه‌لرینیز سایی اولاراق چوخلوق قازانیر، سیزجه رقیه کبیری بیر رومان یازیچیسی‌دیر یوخسا شاعیر یا صیاحتنامه یازاری‌دیر؟
رمان، حیکایه و صیاحتنامه بیر عایله‌نین بیربیریندن فرقلی اوولادلاری اولدوغونا گؤره من ده ساده‌جه بیر یازیچی اولدوغومو دوشونورم.
دئیه بیلرسینیز بیر رومان نئجه یارانیر؟ یعنی بیر اجتماعی معضل رمان یازماغا سبب اولور، یوخسا باشقا جور یارانیر؟
بو حاقدا یازیچیلارین بیربیریندن فرقلی تجربه‌لری وار. اؤز تجربه‌لریم حاقیندا دانیشماق ایسته‌سم، دئیه بیلرم هر بیر رمانیمین فرقلی یارانماق سببلری اولوب. مثلا بیرینجی رمانیم، «ائویم» رمانی آلتمیشینجی ایللرده زنداندا یاشادیغیم آجی تجربه اساسیندا یارانیب. ۲۰۱۱-جی ایلده ناسا طرفیندن کیوراسیتی آدلی بیر تدقیقاتچی ماشینین مریخه گؤندریلمه‌سی «یئردن اوجا تورپاق» کیمی علمی-تخیلی رمانیمین یارانماسینا سبب اولدو. مهاجرت و انسانلارین مهاجرتینه سبب اولان حادثه‌لر هر زامان منیم ان اؤنملی قایغیلاریمدان اولوب، «قوشلار داها قورخمورلار» و «دوشرگه» رمانلارینین اساس مضمونو مهاجرت و مهاجرته سبب اولان حادثه‌لر‌دیر. «دوشرگه» رمانیندا بو گونوموزده یاشادیغیمیز غیرسیاسی مهاجرت سببلرینه توخونسام دا، «قوشلار داها قورخمورلار» رمانیندا اؤلکه‌نین ایکی اؤنملی تاریخی بسترینده، ۲۵-۱۳۲۴ و ۱۳۵۷ انقلابیندان سونراکی مهاجرت مسئله‌سینه توخونموشام. آجلیق باراتاسی رمانینین یارانماسینین سببی «آش تؤکن» قبرستانی حاقیندا ائشیتدیییم بیر روایت اولموشدو. «مرّ آغاجینین کهربا گؤزلری» رمانینین یارانماق سببی ایسه سوسیال شبکه لرده گؤردویوم بیر اعدام صحنه‌سی ایدی، آز سونرا جرثقیلدن آسیلاجاق شخص باشینی اعدام مأمورونون چیینینه قویوب، آغلاییردی. شکیلی گؤردویوم آن اوغورلوقدان دولایی اعدام اولونان شخص اوچون متاثر اولسام دا، عاغلیم قالدی اعدام مأمورونون چیینینده، دئدیم گؤره‌سن بوندان سونرا کیم باشینی او چییینه قویاجاق؟ مأمورون آناسی؟ حیات یولداشی؟ یوخسا اوولادلاری؟ او چییین اوزون مدت مندن ال چکمه‌دی و نهایتده «مرّ آغاجینین کهربا گؤزلری» رمانینین سرهنگ کاراکتری یاراندی.
هانسی صاحه‌نی داها چوخ بیه‌نیرسیز و او صاحه‌ده یازاندا تورکوسو کندیزی – کندینیزه داها یاخین و راحات حیس ائدیرسیز؟
یازماق پروسه‌سی ان چوخ دوشگون اولدوغوم صاحه‌‌دیر، اصلینده بو پروسه چوخ کشمکشلی بیر صاحه‌‌دیر، گئجه‌لر یوخولاریوی باشیندان اوچوردا بیلر، گوندوزلر بیر آغاج‌دلن کیمی بئینیوی دیمدیکله‌یه بیلر، بعضی کاراکترلر سولوک (زَلی- زالو) کیمی حیاتیوین بوتون عرصه‌لرینه یاپیشیب، دقتیوی نرمال حیاتیندان آلا بیلر، بونونلا بئله من بو پروسه‌نین دوشگونویم. ویلیام فاکنر نوبل اؤدولونو آلیرکن بو کشمکشلی صاحه‌یه روح ترلمه‌سی کیمی بیر عنوان وئریب. اؤز دیلیمیزه سوموک سیندیرماق دا دئمک اولار بو تایسیز و کشمکشلی صاحه‌یه. یئری گلمیشکن آرتیرمالییام یازماق پروسه‌سینده من اؤزومدن، اطرافیمدان قوپوب، بوتونلوکله یاراتدیغیم دونیادا یاشاییرام.
بو گونکو ادبیاتیمیزی نئجه گورورسوز؟ یازی پوزولار ( شعر، رومان ….) سیزی قانع ائدیر می؟ هر هانسی بیر اوره‌ک سوزونوز وارمی؟
بیر نئچه شاعیرین اثرلریندن باشقا عمومیتده بو گونوموزده یازیلان شعرلرین بیر چوخ ساییسی (من اوخودوغوم شعرلر حاقیندا دانیشیرام) بیربیرینین اوزریندن کپیه‌لنمیش کیمی شعرلردی. نثر ایسه تورکجه یازماغا ماراق گوسترنلرین ساییسی گونوگوندن آرتیر و بو آذربایجان ادبیاتی اوچون اومود قایناغی‌دیر. گله‌جکده گونوموزدن داها آرتیق ساوادلی و گؤرکملی یازیچیلار، اؤزللیکله قادین یازیچیلارین عرصه‌یه گله‌جکلرینه اومودوم وار.
سیزین اکثر یازیلاریز آذربایجان تورکجه‌سینده یازیلمیش، آنا دیلینده یازیب یاراتماغین هانسی شیرینلیکلری وار ؟
ساده‌جه آنا دیلینین شیرینلیینه گؤره دئییل، مدنیت و دیل عدالتسیزلیغی اولان بیر اؤلکه‌ده آنا دیلینده یازماق بیزیم اوچون بیر ضرورت‌دیر یوخسا ایستر-ایسته‌مز باشقا دیلین دونیاسینا تبعید اولونوب، اؤزلویوموزدن بیگانه‌لشمه‌یه محکوم اولمالییق. براهنی کیمی آنا دیلیمیزی ایچیمیزده ساخلاییب، ساغالماز بیر یارایا چئوریلمه‌سینی ایسته‌میریک‌سه، علم، ادبیات، فلسفه و…بوتون صاحه‌لرده آنادیلیمیزده اثرلر یاراتمالییق دئیه دوشونورم
اوخوجو اتمسفرینی نئجه گورورسوز، بو قدر زحمت، هزینه و مشققتله بیر کیتاب چاپدان چیخیر سورا نئجه قارشیلانیر ؟
عمومیتله آشپزی، فال، انگیزشی کتابلار و کنکور کتابلاریندان ساوایی کتاب بازاری کساد‌دیر. هاندا قالسین خلاقه ادبیات صاحهسینده، اؤزو ده آنا دیلینده یازیلمیش اثرلر اولسون. شخصا بوتون آخساقلیقلار و چتینلیکلره باخمایاراق یئنه ده یازماقدا اصرارلییام.
یاخین گله‌جکده هانسی اثر یا اثرلری سیزدن گؤره‌جه‌ییک؟
چوخ یاخیندا «آذربایجان روزنامه‌لرینده معاصر طب» آدلی اثریم نشر اولوناجاق. بو اثر، انجمن (اوچ دوره) آذربایجان (۱۳۲۰ش.) و آذربایجان( ۲۵-۱۳۲۴ش.) قزئتلرینده معاصر طب ایله باغلی یازیلمیش مقاله‌لره شامیل اولور. مقاله‌لر هم اورجینال اولاراق قزئتدن کسیلیب، هم ده تایپ ائدیلیب. و ایکی ایلدی اوزرینده ایشله‌دیییم مشروطه خانیم رمانینین سون فصللرینی یازماقدایام.
ایندیه‌دک الده ائتدیگینیز نائلییتلر و جایزه لردن دانیشماق ایستردینیزمی؟
منجه اوخوجولار کیتابیمی آلماق اوچون صفده دایانان گون منیم اوغور قازاندیغیم گونودور، آنجاق بئله حادیثه‌لر یوخو کیمی‌دیر، حتی بو آرزونو دیله گتیریرکن بئله بیر گونو خیال ائتمکده عاجیزله‌ییرم.
ادبی اؤدوللر یازیچی اوچون تشویق قایناغی اولسا دا، گله‌جکده یازاجاق اثرلری اؤنجه‌کی اثریندن داها یاخشی اولماسی اوچون، یازیچینین اوزرینه مسئولیت یوکله‌ییر. اوسته لیک بو اؤدوللر مسابیقه طرفیندن معین اولونموش عنصرلردن باشقا ژوری هئیتینین دونیا گؤروشو و سلیقه‌سی اساسیندا سئچیلیر دئیه دوشونورم و یازیچینین اساس اؤدولو قید ائتدیییم کیمی اوخوجو طرفیندن وئریلمه‌لی‌دیر.
آلدیغیم بیرینجی ادبی اؤدول «ماوایل» آدلی حیکایه اوچون آذربایجان جمهوریتی اؤلکه‌سیندن اولوب، ۲۰۱۶ و ۲۰۱۸ ایللرینده تورکیه‌نین کاشغارلی محمود اؤدولونون ایران قولوندا «آگورادا یاندیرین منی» و «گؤیرچین قیزلار» حیکایه‌لری اوچونجو یئری قازانیب، کئچن ایل بوتون اثرلریمه گؤره استرالیادا یاشایان آذربایجانلیلارین قوردوغو «وارلیق» درنه‌یینین بیرینجی ادبی اؤدولونه لاییق گؤرونموشدوم و آلدیغیم سون اؤدول مهرگان ادب جایزه‌سی طرفیندن «مرّ آغاجینین کهربا گؤزلری» رمانینین فارسجا ترجمه‌سینه وئریلمیش اؤدول اولوب. یئری گلمیشکن بو رمانی تورکجه‌دن فارسجایا ترجمه ائدیب، «چشمان کهربایی درخت مرّ» آدیندا تهرانین نشانه نشریاتیندا چاپ ائدن مرحوم حمزه فراهتی‌یه بیر داها منتدارلیغیمی بیلدیرمک ایسترم.
و منه مصاحیبه زامان تانیدیغی اوچون خوشخبر قزئتینین سوروملو م‌دیری و بوتون امکداشلارینا تشککورلریمی بیل‌دیریرم.
ایضاح: دانیشیغین یازی شیوه‌سی «خوش خبر» روزنامه‌سینده اولدوغو کیمی وئریلیبدیر. (ایشیق)
