بیر خاطره دکتر ترابی جنابلاری «حلاج اوغلو»دان
داود مثمر «ماراغالی عاصی»

گونلرین بیر گونونده عزیز و محترم شاعر دوستوموز نهاوندی «مغان» تخلصلی جنابلاری ماراغادا بیزدن ۶۰ینجی شمسی ایلینده وعده آلدی کی فلان هفته تبریزده قوناغیم وار کی استاد یحیی شیدا جنابلاری دا شرف حضورو اولاجاقدی. بیزده چوخ مشتاق زامانیندا ۴نفر حیدر عباسی «باریشماز»، مرحوم نادر فرید فتحی «آیدین» و کتابفروش دوستیمیز فرهاد طاهری و بنده تبریز دئیه یولا دوشدوک. ماراغادان چیخا چیخا بیر قوشما باشلادیق اوچ شاعر معلم تبریزه یئتیشنده قورتاردیق. گؤزل صفت و مهربان «مغان» بیزی حیاط قاپیسیندا قارشیلاییب گوروش ائدرکن بیزی ایچری آپاریب گؤردوک رحمتلی استاد یحیی شیدا جنابلاریدا ایکی یا اوچ نفریلن ایلشیب‌لر. اوز دبیمیلن شیدا بیزی دوستلارینا و اونلاری بیزه تانیتدیردیلار. چای گلدی معرفی و مقدمات سونرا ،خوش – بئش باشلاندی. او گونو مغانین ائوی چئوریلدی بیر فرهنگ و تورک دیلی درنگینه. شفاهی خلق ادبیاتیندان توتدو تا ایللر بویو قفسده جاندان دوشموش آنا دیلیمیزین یازی قایدالارینادک سسلرین یازی قایدالارین و حروفین هم‌آهنگ اولماسی و اینجه- قالین نه‌دیر؟ شیرین بحث‌لر آچیلدی. وارلیق مجله‌سی و اورانین یازیچیلاریندان مرحوم دکتر جواد هئیت، مرحوم دکتر نطقی، دکتر بیدلی و منظوری خامنه‌ای و باشقالاریندان یاد اولدو.
سونرا هره بیر شعر اوخودو .سایین حیدر عباسی جنابلاری دا بیر قورباغالار عنوانیندا شعر باشلادی. یئتیشدی او یئره کی، قورباغا پوخو کلمه‌سی واریدی. دکتر ترابی جنابلاری ایستی باخیشلا کی شعرلره دقتیله قولاغ آسیردی تعریض ائله‌دی. عباسی ده باشقا بیر کلمه‌نی اونر وئردی. هامی دوردو باخدی! بیردن منیم قافامدا تاپیلدی کی سولدوزدا دا اوکلمه‌یه «جاماخ» دئییرلر و حوویضین دیبینده او جلبکلره قورباغا جاماغی دئییلیر. دکتر ترابی بیر ایستی باخیشلا کی اونون محبتیندن نشات آلیردی تشکرلرین بنده دن بیلدیردی، من ده جنابلاریندان تشکریمی تواضع ایله جوابلادیم. یئری جنت اولسون!