اؤن سؤز
اودلار اؤلکه‌سی آذربایجان، پارلاق و شانلی تاریخه، زنگین مدنیته و ایگید خالقا مالیکدیر. آذربایجان اؤز قوینوندا مینلرجه غئیرتلی و شجاعتلی اینسان بسله‌ییب، چوخلو دؤیوشلردن مظفر چیخیب، اونودولماز شرف لؤوحه‌لری یارادیبدیر. بو پارلاق تاریخی کئچمیش، میللی وارلیغیمیزی دانان آلچاقلارین گؤزلرینه زهرلی تیکان کیمی‌دیر. بو کئچمیش خالقیمیزین باشی اوجالیغی، دوشمانلارین‌ایسه آلچاقلیغینی عکس ائتدیرن جانلی تاریخدیر. بابک‌لر، جاوانشیرلر، کوراوغلولار، نبی‌لر، قاچاق‌کرم‌لر، ستارخان‌لار، حیدرخان‌لار، نیگارلار، هجرلر، زینب‌پاشالار، سریه‌لر و …. بو یورددا، بو اودلار اؤلکه‌سینده بویا- باشا چاتیب، تاریخیمیزده پارلاق اولدوزلارا چئوریلیبلر. بو آذربایجان ایگیدلری شرفله اؤلمه‌یی، شرفسیز یاشاماغا اوستون توتوب و غدار دوشمانلارین قارشیسیندا اییلمه‌ییبلر.
آذربایجان موباریزه تاریخینین بیر چوخ صحیفه‌لری اونون رشادتلی اوغول‌لارینین قهرمانلیغی‌ایله قیزیللانیبسادا، بو یوردون قیزلاری‌دا اؤز آتا- بابالاری و قارداشلاری کیمی بو پارلاقلیغین گونشلرینه چئوریلیبلر. اونلار ایگیدلیکله دؤیوشوب، جلادلارین اؤنونده آلچالماییبلار. شاهسئون قیزی ثومه‌رینلی “سریه” آذربایجانین قهرمانلیق تاریخینین پارلاق اولدوزلارینداندیر.
“سریه” اردبیل تابعه سیندن اولان “ثومه‌رین” ماحالیندا یاشاییب، اورادا‌ایسه ۱۳۲۴-۲۵نجی ایللرده آذربایجاندا باش وئره‌ن میللی آزادلیق حرکاتی‌نین دؤیوشچوسو اولوب، میللی نئهضتین قانا چکیلمه‌سیله، غدارجاسینا شاهین یئرلی نوکرلری واسیطه‌سیله اؤلدورولوبدور. سریه‌نین یاشاییشی، موباریزه‌سی و شرفله اؤلمه‌سی بیرداها “آصلانین ائرکک دیشیسی اولماز” سؤزونون فاکتیک ثوبوتو اولموشدور.
آذربایجان میللی نهضتی‌نین شاه و استبداد قوشونونون توسطی‌ایله قانا چکیلمه‌سی تاریخین ان دهشتلی فاجعه‌لریندندیر. اونلارین آذربایجاندا تؤکدوکلری قانلارین هر بیر داملاسی شاهین یئرلی نوکر و سلطنت‌رئژیمی‌نین ننگ و آلچاقلیق لکه‌سینه چئوریلدی.
شاه قوشونو آذربایجانین بوتون شهر و کندلرین قانا چکمک داوامیندا، اردبیل منطقه‌سی‌نین موباریزلری و آزادیخواهلاری قارشیسینادا چیخیرلار. بو گونلرده “سریه” حیات یولداشی “علی” و موباریز یولداشلاری‌لا بیرلیکده ثومه‌رین اطرافیندا شاه اوردوسو و اونون یئرلی نوکرلریله ووروشوردولار. اونلار قارشیدا دوران دوشمانی اؤلدوررکن داغلارا دالی اوتوردولار. بورادا کند مالیکی نین سیلاحلی قولدور دسته‌سینه راست گلیرلر. بئش گون آتیشما داوام ائدیر. ثومه‌رین موباریزلری او جومله‌دن قهرمان سریه دوشمانین تکلیف ائتدیی “تسلیم” سؤزونه باخمایاراق، شجاعتله سون گولله‌یه قده‌ر ووروشا داوام وئریرلر. اونلارین گولله و سایر تجهیزاتلاری توکنمکده‌ایدیر. کند مالیکی آلچاقلیقلا بیر حیله‌یه ال وورور. سریه و یولداشلارینین قارشیسینا قران گتیریر، اونا ال باسیر، آند ایچیر و “شرفله!” “سؤز!” وئریر کی سریه و یولداشلاری دؤیوشدن ال چکسه‌لر، آماندا اولاجاقلار. آمما بو شاه نوکری دؤیوشون داوامیندا سریه‌نی توتوب، قرانا باسدیغی اللرینی اونون و بیر سیرا دیگر موباریزلرین قانینا بویاندیریر.
سریه اؤلدورولمه‌میشدن اول، بارماغینی جلادلارین گؤزونون ایچینه سیلکه‌رک، “بو سیزین اوچون هنر دئییل. تاریخ عهد و پیمان پوزانلاری نیفرتله یاد ائده‌جکدیر. آذربایجانین ایگید اوغوللاری منیم قانیمی یئرده قویمویاجاقلار.” دئییر.
سریه‌نین قهرمانلیق داستانی معلوم سببلر اوزره یاییلمامیش قالیر، یالنیز بیر ایکی کیچیک حجملی یازی “آزادلیق یولونون موباریزلری” کیتابی و سون ایللرده بعضی اینترنت سایتلاریندا یاییلیر.
سئوینجلی حالدیر کی گؤرکملی خالق شاعریمیز هاشم ترلانین سون اثری، ایلک دفعه اولاراق سریه و اونون حیات و موباریزه‌سینه حصر ائدیلمیشدیر. بو بؤیوک حجملی پوئتیک اثرده شاعر، آذربایجان خالقی‌نین آصلان قیزی ثومه‌رینلی سریه‌نین دؤیوشونو و شهادتینی بدیعی اثر کیمی اوخوجولارینا تقدیم ائتمیشدیر. اثرده بیر نئچه پوئتیک لووحه‌نین تاماشاچیسی اولوروق. سریه‌نین موغانا گئده‌ن کوچ اوسته آنادان اولماسی، بویا باشا چاتیب علی آدیندا ایگید بیر گنجله حیات قورماسی، بیر فدایی کیمی میللی نئهضته قوشولوب و آذربایجان دموکرات فیرقه‌سی سیرالاریندا دؤیوشمه‌سی و نهایت قولدورلارین خیانت اللری‌له اؤلدورولمه‌سی، اثری تشکیل ائده‌ن لؤوحه‌لردیر. بو اثر بؤیوک حجملی اولدوغو اوچون مستقل کیتاب شکلینده چاپ اولمالیدیر. عزیز اوخوجولارا تقدیم اولونان آشاغیداکی پارچالار، اثرین مختلف پوئتیک لوحه‌لریندن نمونه‌لر کیمی وئریلیبدیر.
ائلدار موغانلی
سریه‌نین قهرمانلیق داستانی
هاشم ترلان
دان سؤکولور، گونش یانیر باشیندا تاج،
شئح چکیلیر اوبالاردان یاماج- یاماج .
اوزاقلاردا آغ شلمه‌لی بوز داغلارین
زیروه‌سیندن شئح چیله‌نیر نارین- نارین.
گدیکلرده کاروان یولو مین آشیریم،
دره‌لرده سولار جوشور شیریم-شیریم.
شلاله‌لر هارای سالیب تؤکولدوکجه
سپه‌له‌نیر قایالارا اینجه- اینجه.
زامان گولور، گون قیسالیر پرده-پرده،
بولوت‌لاردا سئیره چیخیب زیروه‌لرده.
هر ایقلیمین اؤز رنگی وار ائلدن- ائله،
یای پاییزین الین سیخیر گوله-گوله.
بوردا ائلات قارتال‌لاری آچیر قاناد،
حؤکمون سورور چادیر-چادیر، ائلات-ائلات.
“ائل‌سئون”لر دیاری‌دیر بو ائل، مکان،
آت اوینادیب، قیلینج چالیب زامان-زامان.
پاییز گلیب کؤچ اوستو‌دور، گئدیر تلاش،
آران فیکری کؤنوللرده قالدیریب باش…..
×××××
داغلار آغ اؤرپه‌یین آتیب باشیندان،
پاییز عطری گلیر هر قاریشیندان…..
باخ! سونسوز گؤیلره، سای اولدوزلاری،
ارن قادینلاری، ارن قیزلاری!
امه‌یه، زحمته ایمانلاریلا،
اوست- اوسته گئیدیی تومانلاریلا،
دره‌دن تپه‌یه- تپه‌دن دوزه،
گئجه‌دن آچیلان یاشیل گوندوزه،
تلسسن گؤررسن اونلاری هر آن،
فخر ائیلر باخدیقجا دوغما ساوالان…..
آلاچیق آچیلیر،چکیلیر یوکه،
اوشاقلار ایش گؤرور اؤزوندن یئکه.
هر یاندا های- هارای قوپور، سس گلیر،
مرفشلر باغلانیر، آتا یوکله‌نیر…..
گونش ساوالانین باشیندا بیر تاج،
گولوردو ائللره وئردیجه خراج.
بوش قالان آرخاجین کؤنلو دارالدی،
گؤزلری یول گئده‌ن کارواندا قالدی.
هله‌لیک، هله‌لیک ای اوجا داغلار!
یئنه‌ده بو ائللر سیزی قوجاقلار…..
یهرین قاشیندان، آتین یالیندان-
یاپیشان قادینلار بویلانیر گونه.
داغلاردا بوی آتان، آراندا گولن
خیردا اوشاقلاری آلیب ترکینه.
چوبان نئی سسی‌نین لذتین دادیر،
سورونو هایلاییر اؤروشدن قاباق.
موغانین، آرانین گؤزو یولدادیر،
اوره‌یی چیرپینیر گؤروشدن قاباق……
گونش تئللرینی دارادی گئتدی،
دومانلیق قانادین آچدی یوللارا.
ائله بیل گوندوزون نورون اریتدی،
سانکی آل گونشی چکدیلر دارا.
قورشاغین ساللادی دومان بو آندا،
گؤیلر گورولدادی، کاروان دایاندی.
گؤیدن نوغول- نوغول دولو یاغاندا،
اوبالار گوموشو رنگه بویاندی .
بولوتلار چکیلدی، نه دومان، نه چن،
یئنه‌ده آل گونش بویلاندی دوم- دوز.
بیر قادین آت اوسته باغیردی درددن،
نورلو گؤزلرینده قارالدی گوندوز.
ناله‌نین سسیندن قوجا بیر قاری،
بیلنده بو دردین نه اولدوغونو.
یادینا سالدیقجا او دؤورانلاری،
اؤزونون آت اوسته دوغولدوغونو.
ائندیریب بوز آتین اوستوندن یئره
گلینی دؤره‌یه آلدی قادینلار.
گلدی ائل ماماسی، باخدی گؤیلره
عؤمرونده تجروبه، کؤنلونده ایلقار.
قوجالی، جاوانلی اؤتن بو کاروان،
ائلاتی اوخشایان دره، داغ، تپه.
گؤزلرده بیر سووال، قیزدیر یا اوغلان؟
دونیایا گؤز آچان بو نازلی کؤرپه.
اؤتور دقیقه‌لر، اؤتور لحظه‌لر،
باخیشلار بویلانیر یانان گون‌شه.
درده بورونسه‌ده گلین بیر ته‌هر،
هامینین صبیری دایانیب عرشه.
دوغومون سون چاغی…کورپه سسیندن
سئحیرلی لحظه‌لر دؤندو سئوینجه.
داغلارا سس سالان گور نفسیندن،
سینه‌سی دالغالی، گؤرکمی اینجه.
آناسی کؤرپه‌یه باخدی بو آندا،
نارین گولوشلرین ائتدی هدییه.
ازلدن ایلقاری واردی دوغاندا
قیز اولسا آدینی قویسون “سریه”.
سریه چاغریلدی، او گوندن بو قیز،
هامی قانادلانیب، آز قالیر اوچا.
کیم بیلدی او زامان قوجا دونیامیز،
بیر ایگید دوغوبدور اؤزوندن اوجا……
نه بیلسین تورپاغا شیمشک چاخاجاق
آتدیغی گولله‌نین هر ایشیغیندا.
نه بیلسین سنگرلر سوساجاق آنجاق،
شاهسئون قیزینین یاراشیغیندا…..
بیر عؤمور دولایی یوللاردان کئچیب،
روزگاری درک ائدیب، قلبی دؤیوندو.
قیزلار بولاغی‌نین سویوندان ایچیب،
سئوداسی اویاندی، چینارا دؤندو……….
“تومروس”دان نیفرتی، سئودانی ائلدن،
غئیرتی بابکدن، تورپاقدان گوجو-
آلدی، فخر ائیله‌دی مین بیر کؤنولدن
آتیلدی مئیدانا، سئومه‌دی کونجو……
اؤزونه گووه‌نن، داغا بوی دئیه‌ن،
ائلچیلر قاپیدان قووولدو بیر- بیر.
سریه‌دن اؤته‌ری قلبی گؤینه‌ین
گلنه یوخ! دئدی، اولمادی تدبیر.
نهایت سریه‌نین اوره‌یی جوشدو،
ایگید بیر اوغلاندان کئچه بیلمه‌دی.
گؤزلر بیر- بیرینه باخدی قوووشدو،
“علی”دن آیریسین سئچه بیلمه‌دی.
بیر سارای چکدیلر مرمردن داشی،
کؤنولدن- کؤنوله یوللار گؤروندو.
چالیندی ایلقارین ابدی مارشی،
آرزولار یام- یاشیل دونا بوروندو.
ایکی داغ، ایکی یار، ایکی همکؤنول،
حیاتین عئیبه‌جر درینلیکلری.
قایدادیر بیر گوله اوخشایاندا گول،
آچیلار باغبانین آیدین سحری…….
نهایت دولاندی نئچه قیش، باهار،
آخی بو ائل، اوبا بیزه وطندی.
چیخدی دان اولدوزو، اریدی بوزلار،
انتظار گؤزلرین صبری توکندی.
وطنه گووه‌نن، ائله ارکؤیون-
اولانلار یئل اولدو، سئل اولدو آخدی.
اینسانلار تورپاغین، اولدوزلار گؤیون،
شفقلر ظولمتین گؤزونه چاخدی.
ایناملا چاغلادی، سانجیلدی اوخ تک
فیرقه‌نین تملی ارکین قاشیندا.
اونون قدرتینه اویانمادی شک،
بو ائلین ،تورپاغین هر بیر داشیندا…..
قاپیسی آچیلدی غئیرتیمیزدن
زامانین حؤکمی‌له میللی مجلیسین.
صداسی سسلندی قدرتیمیزدن
میللت وکیلینه وئریلن سسین……..
فیرقه‌میز وطنین توتوب الیندن،
دئدی: سنی دئییب گلمیشم آنا.
گلمیشم او توپوق ووران دیلیندن،
بیر شؤهرت یارادام آذربایجانا.
۲۱ آذر، او شانلی گونده
دیلیمیز دیل اولدو آچاندا یئلکن.
آنادان دوغولان هر کؤرپه‌نین‌‌ده
پاسپورتو تورکوجه یازیلدی ائرکن.
کیتابلار دیلیمجه درج اولدو مین- مین،
معصوم دورنالارین گزدی تئلینده.
ابتدایی، اورتا، عالی مکتبین
اساسی قویولدو اؤز تملینده…….
تبریز کوچه‌لری نورلو، چیراقلی،
گؤیون اولدوزلاری سانجیلیب یئره.
ایگید فدائیلر نغمه دوداقلی،
بویلانیب صاباحکی آیدین سحره.
اورمیه، ماراغا، اردبیل، ساراب،
میللی حوکومتین اؤن سیراسیندا.
دربارین قالمادی اوره‌یینده تاب،
یئنه نوحه‌لندی ماتم یاسیندا.
سریه بو دؤورانی بئله گؤرونجه،
فیرقه‌نین بویونا هؤردو چلنگی.
فدائی آدلاندی هامیدان اؤنجه،
بئلینده پاترونو، الده توفنگی.
شررین قانادینی کؤکوندن قیریب،
دوردو کئشیگینده ائلین، اوبانین.
قارلی گئجه‌لرده اوجاق یاندیریب،
نبضی اللرینده اؤتن هر آنین.
اؤرپه‌یی باشیندا، قاتار بئلینده
سنگره یاتاندا نر اوغلو، نردی.
گؤزو دورنالارین ایپک تئلینده،
باخیشی یادلارین باغرین د‌لردی.
سؤزونه، امرینه ائدردی تمکین
فدائیلر اونا مین ائحتراملا.
دوشمانا توکنمز اوره‌یینه کین،
خالقینی سئوردی مین بیر ایناملا.
قارا بولوتلارین قانادی سیندی،
سحر نسیمی‌نین ایلک باهاریندا.
سریه‌‌ده زیروه‌لی داغا سیغیندی
21 آذرین قانادلاریندا.
فدائیلر آتلی، سریه ائننده،
امر ائتدی: حرکت! توزلاندی یوللار.
بیر یول آیریجیندا ساغا دؤننده،
مئشه‌نین ایچینده ترپندی کوللار.
سریه‌نین توفنگی دیللندی بیردن،
فدائیلر کسدی بندی، بره‌نی.
داغلارا یاییلان بو سس- سمیردن،
گولله‌لر بورودو داغی، دره‌نی.
دوشمانلار آغ یایلیق توتوب الینده:
– سیز آللاه، رحم ائدین،گولله آتمایین!
بیز تسلیم اولوروق، دئییب دیلینده
– بیزلری اؤلدوروب، قانا باتمایین.
فدائی اؤنملی، فدائی اؤتگم،
وطنین، فیرقه‌نین علاجی اوندا.
ظولمون آتشینده یاناندا اؤلکم،
بابکین بایراغی، قلینجی اوندا.
بو یوردون دالغالی گؤی دنیزینده،
ماوی گؤزلرینده اوزدو سریه.
صاباحکی باهارین قالیب ایزینده،
اوغروندا مؤحنته دؤزدو سریه.
دئدی: من بابکین قیزییام البت،
اونون آخان قانی، آلین تریمدیر.
الیمله قوردوغوم میللی حوکومت،
وطنیم، تورپاغیم، اؤز سنگریمدیر…..
* * * *
دربار یئنه جولان وئردی قانادینا،
قوشون چکدی،آت اویناتدی جوما-جوما.
حیله‌سیندن چاتماق اوچون مورادینا،
طاعون کیمی سپه‌لندی شن یوردوما.
یئنه دهشت، یئنه‌فریاد، یئنه‌ده قان،
سانکی گؤیون قوزغونلاری یئره ائندی.
هر فدائی گلدیم دئدی: آذربایجان!
سنسیز بیزه جان نه لازیم وطن، ایندی !
بیر- بیرینه قارشی دوردو خئییرله- شر،
ظولمت چکدی قلینجینی آل گوندوزه.
یاراقلاندی، داراقلاندی فدائیلر،
دؤیوشلرده قان گؤلونده اوزه-اوزه.
بیزیم سریه شاهسئونین ارن قیزی،
کناریندا سئوگیلیسی، جان سیرداشی.
تورپاغیما جانین هدیه وئرن قیزی،
توفنگلرین توشلادیلار یادا قارشی.
یئنه گئیدی غم لباسین آذربایجان،
دومان آلدی اردبیلین داغین- داشین.
ثومه‌رینین گؤزلرینده نم، هیجان،
ساوالان‌‌دا کدرلی‌دیر، چاتیب قاشین.
سریه دئدی: من بابکین نر قیزییام،
فرعونلارین ایمضاسیلا یوخدور آرام.
فدائییم، فیرقه‌میزین اولدوزویام،
جانیم گئده من دوشمانلا باریشمارام.
سنگر قوردو ثومه‌رینده سریه او گون،
عؤمور دوستو اؤز قهرمان اری ایله.
بو اوغورسوز زمانه‌دن قلبی کوسگون،
اود ساچیردی توفنگینین قه‌هری‌له.
اوز- اوزه‌دیر اولوم، اؤلوم، ایکی سنگر،
قورشونلارین اؤلوم ساچان نریلتیسی.
اویاناندا سرت قایالار دیزه چؤکر،
فدائینین اوره‌یینده وطن حیسسی.
ایکی کؤنول ساریلمیشدیر توفنگینه،
هر سنگرده دوشمانلارین سایی قات- قات.
سریه باخدی، غضبیندن دولدو کینه،
دئدی: یوخسا اویونجاقدیر بو کائینات.
بیر سس گلدی اؤن جبهه‌دن: چؤکور آخشام-
تسلیم اولون! عؤمرونوزو وئرین نجات.
سریه دئدی: من ائللردن یارانمیشام،
اؤلوم نه‌دیر؟ اودا منه باشقا حیات.
دؤیوش گئدیر، سنگر بویو قیل و قال‌دیر،
گولله سسی داغا، داشا سالیر هارای.
دؤیوش گئدیر…سانکی بوتون جاهان لال‌دیر
توفنگلرین سسینده‌کی سسدن ساوای.
دوشمان باخیب غضبلندی حئیرتیندن،
هوجوم ائتدی یاماج-یاماج، دره- دره.
سریه گولدو، آجی-آجی نیفرتیندن،
نعره چکدی شیغیدیقجا هر سنگره.
سریه خیال عالمینده،کؤنلونده یاس،
سون گولله‌لر داراغیندا مسلسلین.
دئییر:داها سون نوقطه‌دیر…ماجال قالماز،
سیلاحینین چاخماغینا وورسا الین.
هله دؤیوش آلوو ساچیر ثومه‌رینده،
خئیرین گؤزو کؤلگه‌لندی، شر اویاندی.
بو آن سریه گؤردو دوشمان سنگرینده،
آغ یایلیقدان صولح بایراغی دالغالاندی.
ایکی نفر نزاکتله، آرام-آرام،
اللرینده مقدس بیر قران گلیر،
باخیشلاری ظاهر دولو مین ائحترام،
گؤزلرینده مین بیر اینام، ایمان گلیر.
سریه دالغین…خیالدادیر، مین گوماندا:
– بو دبدبه، بو طنطنه ندن بئله.
اونلار آخی نه بیلسین‌کی بیز بو آندا
بیر گولله‌میز یوخدور بیزیم بوندان بئله.
اونلار دئییر: تسلیم اولون! بیله- بیله،
آمانداسیز، ال باسیریق قرانا بیز.
یوخسا صاباح قوشون گلسه اردبیله
دار باشیندان آسیلاجاق هر تیکه‌نیز.
تسلیم سؤزو قانادلاندی، هاوالانیب ،
قوچ سریه‌نین گؤزلرینده قه‌هر اولدو.
یاد اولدوغو بیر کلمه‌دن قلبی یانیب،
آرزولاری اؤز کامینا زه‌هر اولدو.
جرئت ائدیب سنگریندن بویلانمایان،
قوزغون اولوب هارین- هارین قوندو یئره.
سؤزون داندی، دوشمان پوزدو عهد و پیمان،
گونش باتدی اوبا- اوبا، دره- دره.
ال باسدیغی،آند ایچدییی قران یئنه
هاوالاندی،کور ویجدانلار لکه‌لندی.
سریه باخدی قولونداکی زنجیرینه،
غضب دولو گؤزلریندن نور الندی.
دئدی: سیز ای داشا چاخان اؤز ایلقارین
سانمایین کی عملینیز اولدو هونر.
تاریخ صاباح عهد و پیمان پوزانلاری،
نیفرت‌‌ایله یاد ائده‌جک هر گون سحر.
شاهید اولسون باشیمداکی بو آغ لئچک-
هونریمه، دؤیوشومله اولدوز تانیش.
اؤلسم، قانیم بو تورپاغدا گؤیه‌ره‌جک،
سریه‌لر بوی آتاجاق قاریش- قاریش.
گؤیه چیخساز، یئره ائنسز، بیلین صاباح،
بو دونیانی تیتره‌ده‌جک آخان قانیم.
حاق ایسته‌ین کؤنوللرده نه‌دیر گوناه،
اؤز خالقیما شؤهرت اولار آدیم، سانیم.
بو یاندیران، یاخان سؤزلر، قلینج اولدو
سانجیلاندا قانسیزلارین دار گؤزونه.
آج گولله‌لر سوزه- سوزه ساچین یولدو،
ظولمت چؤکدو سریه‌نین گوندوزونه.
سریه سؤندو، نغمه‌لری دوداغیندا،
گونش باتدی، کؤلگه قوندو دان یئرینه.
ائلیم دئدی، اوبام دئدی، ساغلیغیندا،
اؤلنده‌ده بزک اولدو سنگرینه…..
غئیرتینه سیغیشمایان بوتون جاهان،
بابکیمین ایگید قیزی سریه هانی؟
اویان سریه! دور آیاغا مزاریندان،
قاتیل‌لرین ترک ائیله‌ییب بو دونیانی.
دوغولاندا آت اوستونده دئدین :گره‌ک
توفنگیمله سالام وئرم آل گوندوزه.
ایندی ائللر چیچک سپیر اتک- اتک
ثومه‌رینده سن یاتدیغین او سنگره…..
سن دیریسن، اوره‌یینده یانار اوجاق،
شعله‌سیله سئیر ائتدیگین بودونیانی،
بو داستانلا اوزون ایللر یاشاداجاق،
وطنینده ترلان سنی، سن ترلانی.
3 پاسخ
Eseri yaydigiz uchun size minnetdaram, Hashim bey Terlana Uzun ömur arzilayiram, Qelemi guvvetli olsun
سلام لار
سیزه ؛ هابئله اوستاد طرلانا جان ساغلاملیغی دیله ییرم .
سلام
اوستاد ترلان-ین بو گؤزل یازیسینى سایتا قویدوغونوز اوچون تشککور ائدیرم. دوغرودان لذت آپاردیم.