او ایستی یای گونی، ناهاردان سونرا، ۸-۷ اوشاق ایدیق، اهر چاییندان قاییدیردیق. چای قوروموشدی. آمما بیر باغین کناریندا کیچیک گؤل وارایدی و او گونی ایکی بالاجا توسباغا، بیر نئچه بالیق توتموشدوق. ایکی ده‌نه سو ایلانینی دا توتوب، دیشلرینی کیبریت چؤپو ایله سیندیریب و دئمه‌لی الی دولو ،سئوینج ایله شه‌هره، ائولریمیزه قاییدیردیق.
یولدا اوشاقلارین بیریسی، ابی‌نین قارداشی دالی قالمیشدی. بیردن گؤردوک قاچا-قاچا الینده بیر کؤهنه کوت بیزیم طرفه گلیر. یاخینلاشیب، نفس وورا- وورا دئدی:
– بو کوتو یول کناریندا تاپدیم.
کوتون جیبینده بیر نئچه یئر سندلری و ۱۲۰ تومن ده پول وار ایدی. اوشاقلارین بیریسی گوله-گوله دئدی:
-جانا بالاخان! بو پول ایلا سینمایه گئده بیله‌ریک و هر بیریمیز ده بیرکوکاکولا ایچه‌ریک.
من بیر آز فیکیرلشدیم و دئدیم:
-آی اوشاقلار! حتمن بو کوت بیر یازیق کندلینین‌دیر و کنده گئدنده شاید آتینین اوستوندن دوشوب. هارادا اولسا ایندی گله‌جک. گلین اونو گؤزله‌یک و بونلاری اونا وئره‌ک.
اوشاقلارین هامیسی راضیلاشیب و داها بیر سؤز سؤیله‌مه‌دیلر.
بیر مدّتدن سونرا گؤردوک اوزاقدان بیر کندلی، باشیندا لبه دار، باشینا دؤیه-دؤیه، یئره باخا- باخا گلیر. من اونون طرفینه گئدیب و اونا دئدیم:
– عمی جان! حتمن کوتونو ایتیریبسن. ناراحات اولما. بو سنین کوتون، یئر سندلرین و بو دا سنین پول‌لارین.
او اول سئویندی. اونلاری آلدی آمما سونرا دئدی:
– یوخ! منیم نئچه مین تومن پولوم دا کوتومون جیبینده وار ایدی. تئز اولون پوللاریمی منه وئرین.
من و اوشاقلار هامیمیز تعجّوبله بیربیریمیزین اوزوموزه باخدیق و ناراحات اولدوق. عجب دردسره دوشموشدوک. بو دا بیزیم یاخشیلیغیمیزدان.
دئدیم:
– عمی جان! دئییرسن بس بیز او قده‌ر ساده ایک کی پول‌لاری گؤتوره‌ک و بورادا سنی گودک ، کی سن ده بیزیم یاخامیزدان توتاسان؟!
دئدی:
– من بونلاری بیلمه‌رم. اگر وئرمه‌سز گئده‌جه‌ییک شهربانی‌یه.
بیز دوغروسو قورخدوق. بیر داشقاچی قوم گتیریردی. یاخینلاشدی. آتینین جیلووونو چکیب دایاندی. من موضوعنو اونا سؤیله‌دیم. منه طرف اشاره ائله دی و کندلی عمی‌یه دئدی:
– من بو اوغلانی تانیرام. آتاسی یاخشی آدامدیر. اینانماییرام یالان دانیشا.
آمما کندلی عمی بیزلری بوراخان دئییلدی و دائم آند ایچیردی.
من بیر آز فیکیرلشدیم. اوزومو توتدوم ابی‌نین قارداشینین اوزونه و دئدیم:
– دوزونی سؤیله. پول‌لار هارادادیر؟
آمما او بیر سؤز سؤیله‌مه‌دی. بیر شاپالاق. دئدی:
– منیمله گل.
گئتدیک. یول کناریندا، بیر باغین ایچینده بیر یئرده گیزلتدیگی بیر دسته پولو چیخاردیب، منه وئردی. گلدیک. پول‌لاری کندلی عمی‌یه وئردیم. پول لاری سانادی و سئوینجک دئدی:
– چوخ ساغ اولون.
بیر آز دا بیزی خئییر دعا ائدیب و کنده ساری یولا دوشدی.
اوشاقلارایلا ائولریمیزه ساری گئدیردیک. یولدا دئدیم:
– آی اوشاقلار! بیلیرسینیز کی بیزلر یالنیز سینمایه گئدیب، بیر فیلم گؤروب و بیر کوکاکولا ایچه‌جک‌ایدیک و ابی‌نین قارداشی بیزلره گوله‌جک‌ایدی و یازیق کندلی عمی ده بیر الی قالاجاق ایدی و بیر ده تپه‌سی…!
اوشاقلارین هامیسی گولوشدولر. یالنیز ابی‌نین قارداشی بیر سؤز سؤیله‌مه‌دن بیزدن آیریلیب و فیکیرلی- فیکیرلی ائولرینه طرف یولا دوشدی …!
اهر- ۱۱/۲/۷۷
