دونن ناهاردان سونرا کیچیک چایین کؤرپوسوندن کئچدیم و اوزو یوخاری خیاباندا یولومو داوام وئردیم. مشهدی علی اکبری گؤردوم. یئنه همیشه کی کیمی دالدان ال لرین توتموشدو،باشین آشاغی سالمیشدی،بیر پارچانی اؤرتوک کیمی باشینا باغلامیشدی تا یئکه شیش کی نئچه ایلدیر آلنینین کناریندا هئی یئکه لیر گؤرسنمه سین. کؤهنه کوت گئیمیشدی.
بیر ایستی یای گونی ایدی.یاخینلیغینا یئتیشجک حالین سوروشدوم.جرأت ائله مه دیم اوزونه باخام.یئنه دئدی کی هر یئره گئدیب آمما ساغالان دئییل.چتین لیکله دانیشیردی.همیشه آغزینین سویو دانیشاندا آغزیندان اوزومه سه پیلردی و من ناراحت اولاردیم.بو دلیله فاصله نی رعایت ائله ییردیم.
دئییردی جماعت اونا یاخینلاشماقدان و اونونلا دانیشماقدان چکینیرلر و قورخورلار مبادا خسته لیگی اونلارا دا سرایت ائله یه.یئنه اوره ک وئردیم.نه ائله مک اولاردی.
اونو اوشاقلیقدان تانیییردیم .حامباللیق ائله یردی و ایل لردن سونرا بیر ال آراباسی باش باغلاییب و بو یاخین زامانا قده ر خالقین یوکونو داشیییردی و پول قازانیردی.ایندی داها ایشله مه ییر .فقط هردن خیابانلاردا گؤرونور و یالنیز آددیم وورو.
بیر گون دئدی بیلمه ییر نه گوناه ائله ییب کی تانری تئز جانین آلیب راحاتلاماییر.
او اؤنجه ایشله ین و دئیه ر گولر آدام ایدی و اوچ دوکانلاردا بیر دوستومون ماغازاسیندا کی هردن اورایا گئده ردیم هردن اونو اورادا گؤره ردیم و او کئچه جکدن و خاطیره لریندن دانیشاردی.
بو گون ائوده سؤزوم اولدو.کدرلی ائشیگه چیخدیم.هاوا چوخ ایستی ایدی.اؤزومو پارکا یئتیردیم.کؤلگه ده بیر نیمکتده اوتوردوم.قاریشقالاری گؤردوم کی آسفالتین اوزه رینده گل گئتده دیرلر و چالیشیرلار.بعضی لری نارین و ایری قوملاری یووانین ده لیگیندن ائشیگه چیخاردیردیلار و بعضی لری دن لری یووایا داشیییردیلار.چالیشما یئرلری یووانین هنده ورینده ایدی.گؤردوم قرمزی قاریشقالار اطرافدا سرعت ایله حرکتده دیرلر ،آمما جرأت ائله مه ییرلر اونلارین یووالارینا یاخینلاشسینلار.اونلارین بیری بیر کیچیک قاریشقانی توتموشدو.یئردن بیر یارپاق گؤتوروب و اونو قرمزی قاریشقانین الیندن خلاص ائله دیم و یووانین یاخینلیغیندا بوراخدیم.
قاریشقالارین چالیشمالاری دایانماز داوامی وارایدی.بیردن گؤردوم بیر اوزون قاریشقا یووادان چیخیر.گؤزلویومو ووردوم تا یاخشی گؤره م .یوخ، بیر قاریشقا باشقا قاریشقانی اؤز گوجلو انگینه آلمیشدی ائشیگه چیخاردیردی.قاریشقانی یووانین یاخینلیغیندا بوراخدی و یئنه یووایا قاییتدی.گؤردوم قاریشقا آخساییر.چتین لیکله یئنه اؤزون یووایا چاتدیردی آمما یئنه ائشیگه سالیندی.نئچه یول بو ایشی تکرار ائتدی.نهایت صدمه گؤرموش قاریشقا یورولدو آمما هله ده جانی وارایدی.اؤز دؤوره سینه فیریلداییردی آمما داها یووایا چاتماقدان اومودسوز اولموشدو و یووانین هنده ورینده کؤلگه لنیردی و اؤزون یئر اوزونده چکیردی.باشقا قاریشقالار ، کیچیکلی بؤیوکلی ، اونا اعتناسیز، قانی سویوق چالشماقداایدیلار.اونلارین اعتناسیزلیقلاریندان اؤفکه لندیم.
بیر قاریشقا کی کئچه جکده اونلار ایلا ایدی، اونلارایلا چالیشیب و حیات سورموشدو، ایندی قووولموش یالنیز و اومودسوز اؤز دؤوره سینه فیریلداییردی.عصبیّت ایله اؤز اؤزومه دئدیم گئدیم بیر شوشه نفت گتیریم یووالارینا تؤکوم و یاشاییشلارین بیر بیرینه ووروم.آمما یئنه فیکیرلشدیم و گؤردوم کی حیواناتین حیاتیندا غریزه اوزو ایله باشقا یاسا حاکمدیر و اونلاری گره ک اؤز باشلارینا بوراخاسان.بو ایستی آسفالتین آلتیندا نه خبرلر کی یوخ ایدی.
ناهار وقتیندن بیر ایکی ساحات کئچمیشدی و من تمام بو مدّتده بو صحنه لره تاماشا ائله میشدیم.قرمزی قاریشقالار اوو انتظاریندا هنده ورده سرعتله حرکتده ایدیلر. بیر قاریشقا باشقا قاریشقانی دا ائشیگه داشیدی آمما او قاریشقا هله ده جانی وارایدی ، تئز بیر ده ن گؤتوروب و سئوینجک یووایا قاییتدی.
×××
بو گئجه یئنه ده پارکدا همان نیمکت اوستونده اوتورموشام .چراغلارین ایشیغینین آلتیندا قاریشقالار چالیشماقدا دیرلار.بئچارالار فیکر ائله ییرلر کی هله گوندوزدور .باشلارینا بؤرک کئچیب.یوخودان ، دینجلمکدن بیر خبر یوخدور.
حیواناتین چوخ حصّه سی گونون دوغولماغی ایلا دن و خؤره ک ییغماغا چالیشمالارینی باشلاییرلار و گونون باتماغی ایلا یوخو و دینجلمه یه باشلاییرلار.او گونون صحنه لری یادیما دوشدو.قاریشقالارین ماجراسینی بیر دوستوما دئدیم و او دئدی اونلار اؤلن قاریشقالاری یووانین باشقا یئرینه قویارلار.
صدمه گؤرموش قاریشقا ایشی هارا چاتدی.او قاریشقا کی شاید منیم یا سیزین آیاغیمیزین آلتیندا صدمه گؤروب.
آه!یادیمدان چیخیب.مشهدی علی اکبر ایندی هارادادیر و حالی نئجه دیر؟
اهر- ۲۵/۴/۸۱
یک پاسخ
davud eherini sheirleri ile taniyiram .. bu oykuyu yazan davud eheri olsada , menim davud deyil ..