اؤتوشدو ایستی فصیل‌لر دوباره قیش گلدی
سویوق سوخولدو ائوه آشکاره قیش گلدی
آتین گتیردی یئنه شاختا گؤر نه جولانه
مثال رستم دستان تپیلدی میدانه
نه رحم ائدیر قوشا- قوردا سویوق نه انسانه
بویادی جنگلی، دریانی قاره قیش گلدی
دوزوبدو لشکرینی گؤر نئجه صفه شاختا
اوتاقدان هایلاییسان دیرماشیر رفه شاختا
یقینا ائیله‌یه‌جک چوخلارین خفه شاختا
اومید قالیبدی فقط کردگاره قیش گلدی
لباس دونور یوجاغین بنزه‌ییر قورو دری‌یه
سو شیرده بؤیله دونوب یایدادا چتین ارییه
سویوق اراده ائدیب عؤمرومون ایپین سرییه
گتیردی من یازیغی آه و زاره قیش گلدی.
ائوینده فنکوئلی واردیر ایندی اعیانین
فقط چتیندیر ایشی قیشدا یوخسول انسانین
دابانی چاتلایاجاق ائوده کبلا صغرانین
آیاقلاری اولاجاق پاره- پاره قیش گلدی
نه نفتی وار نه ذغالی نه پاره‌سی کاسیبین
نه واردی قارلی قیشا آیری چاره‌سی کاسیبین
ازلده پیس گتیریب استخاره‌سی کاسیبین
بو طایفانین چوخو چیخماز بهاره قیش گلدی
سینیبدی پنجره‌میز یئل باسیر ائو ایچره قاری
نه واردی کرسی کلک ائوده نه یانار بخاری
والور ایشیلداسادا یوخدو ذره‌جه چیخاری
عیال دئییر کیشی دور ائیله چاره قیش گلدی
گئجه باشا چکیرم ائوده کؤهنه یورغانی
ولیک تیتره‌ییرم صوبحه‌جن بالام جانی
وبا و سل آپارا بؤیله بیر زمستانی
فقیری ائیله‌مه‌یه بختی قاره قیش گلدی
اوشاقلار هووخورور ائو ایچره هئی الین ایاغین
قاپی بئله چیغیریر آز قالا باتار قولاغین
دیوارلاری بویاییب توستوسو سینیق چیراغین
فقیری چکمه‌یه بالای داره قیش گلدی
گئییندی پشم لباسی عیالی پوللولارین
یونلدی اسکییه فکری خیالی پوللولارین
توفاندا قوپسا اولانماز زوالی پوللولارین
سویوقدا تیتره‌یه‌جک اوستو پاره قیش گلدی
تعجبم نییه بس پوللولارلا یوخدور ایشی
بیر آیری لذت آلیر شاختا فصلی پوللو کیشی
گل ای اؤلوم یاخالا بیر بئله ایکی‌اوزلو قیشی
فقیره سونجوق آتان قلبی قاره قیش گلدی
دوچار اولایدی قیشی کاش یولدا محتکره
دؤنئیدی وضعی چیته، سیگارا، اته، پنیره
داها یئتیشمزیدی اوندا یوخسولا فقیره
داها گؤرونمزیدین بو دیاره قیش گلدی
