گئدیریک مال- داوارا یونجانی چیندن گتیرک
تویوغو، اؤرده‌یی، هشترخانی چیندن گتیرک
چای دادی وئرمیر آغیزدا بو وطن چایلاریمیز
چایی کشمیردن آلاق، چایدانی چیندن گتیرک
دوزدو کی دولما بیزیم سوفرامیزین زینتی‌دیر
دیمز هئچ زحمتینه، دولمانی چیندن گتیرک
کیمده وار حوصله قیش فصلینه الجک توخوسون
جورابی، الجکی، شال گردانی چیندن گتیرک
قورودو باغلاریمیز میوه‌یه قالدیق حسرت
هولونو، شافتالینی، آلمانی چیندن گتیرک
نه‌یه لازیمدی کی بیز هئی دئم اکک هئی قوروسون
یاخشیدیر مرجومه‌یی، بوغدانی چیندن گتیرک
آلیریق آی باشی یارانه‌لری خرجله‌ییریک
انجیری، توت قوروسون، خورمانی چیندن گتیرک
دئدیم آرواد نه زامان یارمانی قایناتمالیییق
دئدی دای صرف ائله‌میر یارمانی چیندن گتیرک
نه قده‌ر بیزلری تحریم ائده‌لر گوجله‌نریک
آز قالیبدیر کی دوزو، دوزدانی چیندن گتیرک
وئرمه‌سه ایینه بیزه چین قالاریق تومانچاق
اوسکویو، ایینه ساپی، توممانی چیندن گتیرک
بیلمیرم ایران اولوب چین، یا کی چین ایران اولوب
دؤز بیر آزدا! گئدیریک ایرانی چیندن گتیرک.
یک پاسخ
صمیمی سالاملار کاویان معلیم
طنز وساتیریک شعرین گوجو ، اورکلره آسانلیقلا یول آچماسی واجتماعی اثری همده معاصر ادبیاتیمیزدا آز اولماسی دانیلمازدی. بلکه سیزین کیمی حال اهلی حاللاندیرا بو عرصه نی . عومروز برکتلی اولسون