واغزال گؤرونتولری
بختیار موغان اوغلو
واغزالدا اولان گونده‌لیک جیغان- ویغان سسی خیاواندان اؤتنلرین بئینلرینی قیجیقلاندیریردی.
آوتوبوس سوروجولرینین اورکلرینی ذکی قهوه‌خاناچی‌نین خوروز قویروغو چایی اوخشایا بیلمیردی. گؤزلری یول چکیردی حسرتلرینین یوللارینی گودنلر کیمی.
سوروجو حضرتقولونون ائشمه بیغلاری عسگرلیک دؤورومون خاطره‌سینی اویادیب، آهیل واختیمدا غورور حیسسی یارادیردی منده.
چئشیدلی دییاپازوندا یولچو سسله‌ین آوتوبوس کؤمکچی‌لری یولدان اؤتنلرین چوخونو جین آتینا میندیریردی.
خودوشون بوغازینین خیردالیقلاری موسیقی دوشوننلره یعقوب ممد اوفون سسینی خاطیرلادیردی.
قهوه خاناچی قنبر اوز به اوز تایدا عاشیقلار چایخاناسینین قاباغیندا اوستول آچمیشدی.
بئکارچیلیقلاریندان باشلارینی قاشیماغا واختلاری اولمایان موسیقی ایفاچیلاری چایدان سوزوب، هردن بیر عاشیق دیلینده آتماجالی زارافات دا ائدیردیلر بیر-بیرلرینه.
اردبیل، مشکین، اهر، تبریز هردن بیرآرادا تهران سسله‌ین آوتوبوس کؤمکچی‌لرینین یاغلی سسلری چورتونو پوزوردو عاشیقلارین. – “یولا دوشوروک… یولا دوشوروک…!”
ائولریندن باشلارینی گؤتوروب شهره قاچانلارین اورکلرینی اوزوردولر؛ قاباقلارینی کسه‌رک، تبریزه گئدیرسینیز؟ – سوروشوردولار. یوخ جاوابینی ائشیدنده قانادلاری قیریلیب، یانلارینا دوشوردو یئر تاپیب یووا قورا بیلمه‌ین قارانقوشلار کیمی.
معللیم آدینا ارزاق دوکانینین ساتیجیسی‌نین تره‌زینین آرخاسینذا ووردوغو چورتو هردن بیر تله‌سیک قاریخیب دوکانا گئچن موشتری‌نین کال اؤسکورک سسی پوزوردو. یوخوسو باشینا دوشن ساتیجی موشترینی گؤردوکده گؤزلری بوز اوستونه چیخان دانانین گؤزلرینی خاطیرلادیردی.
– بیر گیله سیکارئت وئر…!
۲۵تومنلیک دمیر پول تره زینین ایچینده فیریلداییب، گیجه‌له –گیجه‌له یئره سریلینجه، تاققا-تاقلا خیاواندان اون -اون بئش ماشین گئچیردی.
ساتیجی آللاه برکت وئرسین دئیه، سیکارئتی وئریب، دفینه کیمی تاپدیقی موشتریسینی یولاسالیب، اوتوروردو دمیر اوتوراجاغینین اوستونده.
۱۹۷۱جی ایلده بوراخیلان مرسدس مارکالی آوتوبوس‌لارین ساخلایجلارینین خارت -خورت سسلرینی ائشیدن خیرداوات تاکسی سوروجولری یولچو الده ائتمک ایچین یورتا -یورتا یویوروردولر یولچولارا ساری یوروشه چیخان آکسیاچیلار کیمی. یولچو اوستونده دالاشان تاکسی سوروجولرینه ساتیجی‌دان باشقا هارایچی تاپیلمیردی. یاناقلاریندا تورپ اکیلن تاکسی سوروجولرینی بیر پارا یولدان اؤتنلر ماراقلاندیرماسادا جوموشون یورغا یورتماسی خئیراوللاه کیشی‌نین ساری- تیکان یوکلو آیغیرینی خاطیرلادیردی. گون آشیری بو گؤرونتولری سئییر ائدن ساتیجینین گؤزلری قالمیشدی خییاوانین پیادا یولوندا سیگارئت سومورما یاریشینا چیخان گنجلره باخا…. باخا….!
