بو هیجران بو حسرت منی اؤلدورور
آی دالدادان گلیب گئده‌نیم ساغول!
اصلی کیمی کوچ ائیله‌ییب داغلارا
منی بئله کرم ائده‌نیم ساغول!
×××
من ائله قالمیشدیم داردا، چتینده
عذابیندا خوشدور محبتین‌ده
سئوگی دیاریندا، مملکتینده
کؤنلومون ایچینده بیته‌نیم ساغول!
×××
عشقین آتشی‌نین داغی اولموشام
خوبلار مجلیسینه ساقی اولموشام
بیر یارین باخچاسی، باغی اولموشام
بولبول تک گولومده اؤته‌نیم ساغول!
×××
بو “موغان‌اوغلو”نو داغلایان گؤزل
گؤزللیک چاییندا چاغلایان گؤزل
گنجه‌نی تبریزه باغلایان گؤزل
دار گونده دادیما یئته‌نیم ساغول!
