پاخیر آداملار
بختیار موغان‌اوغلو

نییه ائشیدمیرلر نییه بیلمیرم

مات قالیب اوزومه باخیر آداملار.

قولاقلارین یوموب آغزین آچیبلار

قانانی یاندیریب  یاخیر  آداملار.
***
ایشیقا گئتمیرلر هایا قاچیرلار.

شنلیک ایسته میرلر وایا قاچیرلار.

هریئرده  گؤرورلر  تایا   قاچیرلار.

بو ناخیر  آداملار   ناخیر  آداملار.
***
دوز یولو گئتمه ین یول آزاندیلار

بئله دوشوندولر بئله قاندیلار

قالایی تؤکولن میس  قازاندیلار

بو پاخیر آداملار پاخیر آداملار.
***
اوتانمیرلار یالان دئمک دن اؤترو.

قیریلیرلار حارام امک دن اؤترو.

بیر پییالا شوربا یئمک دن اؤترو.

اؤزلرینی شیشه تاخیر آداملار.
***
اولولاردان اؤیود گؤتورمه دیلر.

باشا دوشوب بیر ایش بیتیرمه دیلر

“موغان اوغلو” دئییر ایتیرمه دیلر.

اؤزلریندن باشقا آخیر آداملار……