عاشیق مسلم عسگری‌‌نین «داستانلار» آدلی کیتابی‌نین سسلی وئرسیاسی استانبول اونیوئرسیتئتی‌نین مرکزی کیتابخاناسی‌نین بین‌لخالق سایتیندا اوخوجولارا تقدیم اولوندو.
«داستانلار» کیتابی‌نین سسلندیریلمه‌سی لایحه‌سی‌نین ایدئیا مؤللیفلری «پروفئسور فتحی گئدیکلی» و «دوکتور محمد رزاقی»‌دیر. بو سسلی کیتاب، مصطفی رزاقی‌‌نین اوخوماسی ایله دونیا‌نین هر یئریندن اولان عاشیق روایتلری سئو‌نلره تقدیم ائدیلمیشدی. عاشیق ادبیاتی تدقیقاتچیلاری‌نین زنگان ولایتی‌نین شفاهی منبع‌لریندن ان یاخشی شکیلده فایدالانماسی اوچون بو ۲۷ روایت دؤرد آی عرضینده، ۲۶ ساعاتدان چوخ مدتده آذربایجان تورکچه‌سینده سسلندیریلمیشدیر. بوندان علاوه، ایلک علمی عاشیق کیتابی اولان «مسلم عسگری‌‌نین داستانلاری»‌نین بیر نوسخه‌سی دوکتور محمد رزاقی طرفیندن استانبول اونیوئرسیتئتی‌نین مرکزی کیتابخاناسینا هدیه ائدیلدی.
کاسئت‌لرین توپلانماسی، داستانلارین متنه کؤچورولمه‌سی، رئداکته‌سی، اویغونلاشدیریلماسی و نتیجه‌ده «داستانلار» کیتابی‌نین چاپ اولونماسینی (۱۴۰۳- تهران- نشر ۱۱۴) احاطه ائده‌‌ن بو ۲۲ ایللیک شخصی و مستقل لایحه، ایندی تورک و عاشیق ادبیاتی تدقیقاتچیلاری‌نین استفاده‌سی اوچون هئچ بیر محدودیت اولمادان استانبول اونیوئرسیتئتی‌نین کیتابخانا سایتیندان بین‌لخالق سویه‌ده الده ائتمک مومکوندور. بو، سسلی فورمتده یاییملانان ایلک عاشیق کیتابی‌دیر.
«داستانلار» کیتابینی آشاغیداکی لینکدن الده ائده بیلرسیز:
https://katalog.istanbul.edu.tr/client/tr_TR/default_tr/search/detailnonmodal/ent:$002f$002fSD_ILS$002f0$002fSD_ILS:4146353/one?qu=2026%2F150063&h=0
خبری ایشیق سایتینا گؤندرن: دوکتور محمد رزاقی