پته‌م آشیب، بالیم گئدیر
گیله‌م سوزور، خالیم گئدیر
گئده‌ن کیمی، قالیم گئدیر
دیلده سویام، یئرده توپراق!
اؤلوم نه‌دی؟ مزار نه‌دی؟
یئریکله‌ین آزار نه‌دی؟
کفن بول‌دو، بازار نه‌دی؟
دیلده سویام، یئرده توپراق!
یئتیم قالان ائیواز کیمین
بختی یاتمیش آیاز کیمین
آیری دوشن آراز کیمین
دیلده سویام، یئرده توپراق!
قیزیل بالیق، جاوان گئدیر
زامان گزیر، آمان گئدیر
آغزین آچیر، یاوان گئدیر
دیلده سویام، یئرده توپراق!
آدیم دؤنوب شه‌هر اولدو
شیرین چاییم زه‌هر اولدو
هئچ بیلمه‌دیم نه‌لر اولدو
دیلده سویام، یئرده توپراق!
ائشیدیلمز های اولموشام
یاوان آجی چای اولموشام
سوسوزلارا تای اولموشام
دیلده سویام، یئرده توپراق!
دنیز باجیم هاردا قالیب؟
هانسی بوران، قاردا قالیب؟
آخی، بالیق داردا قالیب
دیلده سویام، یئرده توپراق!
هارای وورون، گَلَر صمد
گؤز یاشینی، اَلَر صمد
غم چاغیما مَلَر صمد
دیلده سویام، یئرده توپراق!
آدیم دنیز، اؤزوم سوسوز
یارام درین، دؤزوم سوسوز
آغلاماغا گؤزوم سوسوز
دیلده سویام، یئرده توپراق !
