سن آنامدان قالمیش بیر ارمغان‌سان
گؤزه‌ل آنام قده‌ر سئویرم سنی!
اونون سسی گلیر سنین سسیندن
سنینله سئویرم آنا وطنی!
سن آخان قانیمسان دامارلاریم‌دا
آنامسان، ائلیمسن، آنا دیلیمسن!
یاشامین اؤزوسن، قوتسال وارلیق‌سان
سن منیم ابدی اؤز سئوگیلیمسن!
باشیم آشاغادیر سنین اؤنونده
وفاسیز اوشاق تک من آتدیم سنی!
گؤزونه گؤز تیکیب باخا بیلمیرم،
اوزون ایللر بویو اونوتدوم سنی!
باشقا دیللر ایله یازیب اوخودوم
سنی اوخوماغا وقت آییرمادیم!
«من تورکم» هارایی چکیب باغیردیم
اؤزگه دیل یانیندا چکیلدی آدیم!
توم دیللردن سونرا سنی اؤیرندیم
انصافسیز ظالیمم باغیشلا منی!
آنالار کوسمزلر اؤز ائولادیندان
قوی یئنه باغریما باسیم من سنی!
ایستیرم دیز چؤکوب الیندن اؤپوم
ایسترسن یاندیریب، یاخیتدیر منی!
بالاجا اوشاغام یاپیش الیمدن
اؤز دیلیمده یازدیر، اوخوتدور منی!
