او گوندن بری
هر شئی ده‌ییشیب
یول‌لار فرقلی
آغاج‌لار کوسولو.
سئوگیلی بیر قیزین
دوداغینداکی خاطیره‌لر سوزالیر
گؤزو شورانلیق قویوسودور.
دئدیک گله‌جکسن
آنان بویونا باخیب
ایچین- ایچین آغلایاجاق سئوینجینی؛
پنجره‌لر چیرپیلاجاق
گونش نامینه،
اولدوز عشقینه.
شاختا یولسوز اولور
نه تورپاغین حؤرمتین ساخلاییر
نه قیزیل گولون.
عمان‌لار بیر مئتیرلیک مزارین دوستاغی‌دیر
سن ده کی
نه بیلیم
مزارین کی یوخ.
دئمک
عمان‌لارین هامیسی بختیار دئییل.
بولود آغلاماسا دا
سوچو یوخ
بولود
هانسی سئوینجینی
بیزیمله پایلاشمالی‌دیر آخی؟
۱۴۰۳/۰۹/۰۶
