فارسجادان ترجمه ائدنی: یدالله کنعانی
کؤچورن: رحیم خیاوی
دئدیم:
– مگر نه اولوب؟ به‌یم قراریمیز کؤرپه‌نی دوغوزدورماق دئییل و اونو دا من دوغوزدورمایاجاغام؟
ایکینجی کیشی دئدی:
– هه، سن دوغوزدورمالیسان، بو قدر! سونرا سنی ائوینه قایتاراجاغیق.
دئدیم:
– بس اوندا نییه گؤزومو باغلاییرسینیز؟
بیرینجی کیشی دئدی:
– نییه‌سینی سونرا بیله‌جکسن.
داها بیر شئی دانیشمادیلار. هیرسیمدن آغلاییردیم. اونلار دا آغلادیغیمی حس ائدیردیلر. البته، گؤزومو باغلاماقدان باشقا بیر اذیت ائله‌مه‌دیلر. اونلاردان بیریسی منی قالدیریب آتا میندیردیکدن سونرا یویه‌نی ده الیمه وئردی. آیاق‌لاریمی اوزنگییه قویدو. آی الله بونلار منی هارایا آپاریرلار؟ هارا گئده‌جه‌ییمی اؤیرنمه‌ییم دئیه آتلاری یئرینده‌جه بیر نئچه دؤره فیرلاتدیلار. اول بیر قدر اوزو آشاغی گئتدیک، سونرا ایسه اوزو یوخاری، یئنه ده یوخوشا سوردوک. کولک قاباقدان اسه‌رک محکمجه اوزومه ووروردو. هردن دوشونوردوم کی، یویه‌نی بوراخیب گؤزومده‌کی دسمالی بیر قدر کنارا چکیم، گؤروم هارا گئدیریک. اما میندیییم آت او ایکی آتلی‌نین اورتاسیندا ایدی. مطلق آرخامداکی نه ائده‌جه‌ییمی گؤره‌جک و منه مانع اولاجاقدی. بلکه ده هیرسله‌نیب و ائتدیک‌لری تهدیدی عمل ائدرلر. ائله نظره گلیردی کی، شهردن چیخیب صحرادا چاپیریق. آتلار سرعتله چاپیردیلار. آتلارین گئدیشیندن خوشوم گلیردی. اما ناراحت ایدیم. کئشگه حاجی منیمله گلمه‌یی تکلیف ائده‌یدی. تپه‌نی قالخیب بیر دار یولا دوشدوک. قایالیق اولدوغونو حس ائدیردیم. یوخوشا قالخیردیق، آتلارین دیرناق‌لاری محکم داشا دَییردی. آتلار تؤوشویه-تؤوشویه یوخاری قالخیردیلار. بیر ساعته قدر اوزویوخاری گئتدیک. آتلار داها زورلا یورویوردولر. گؤره‌سن، کؤرپه‌سینی داغدا دوغان کیم ایدی؟ دوز اوتورماقدان بئل-بوخونوم قوروموشدو. یوین الیمده دونموشدو. اما آتیم اؤنده‌کی آتین آرخاسینجا ایره‌‌لیله‌ییردی. گمان کی، آت دا بئلینده‌کی‌نین یازیق و گؤزوباغلی بیر قادین اولدوغونو آنلامیشدی. داغین زیروه‌سینه قالخدیق. آتلار داها تلسمیردیلر. بیردار دوزه‌نلییی دؤنوردولر. یقین کی، قایالیغین و اوچورومون قیراغییلا گئدیردیلر. آتلار دایاندیلار. ایکی کیشی آتدان دوشه‌رک منی ده دوشوروتدولر. گؤزوباغلی منی ائوه آپاردیلار. ائود‌ن غریبه سس‌لر ائشیدیلیردی. رطوبت و اودون‌لارین اوزرینده یانیق یاغ قوخوسو گلیردی. قادین سسی ائشیدیلمیردی. بلکه ده کؤرپه بیزدن قاباق دنیایا گلمیشدی. اما کؤرپه سسی ده ائشیدیلمیردی. کیشی‌لر بیر-بیرینین قولاغینا پیچیلداییر و دوداق‌لاری آلتیندا دانیشیردیلار. دوغاجاق قادین سسی ده ائشیدیلمیردی. چادرا باشیمدا گؤزوباغلی گؤزله‌ییردیم کی، نه ائده‌جه‌ییمی دئسین‌لر. قورخو بوتون وجودومو بوروموشدو. بیر کیشی مندن سوروشدو:
– بویلونو دوغوزدورماق اوچون سنه نه لازم‌دیر؟
– اول بویلونو گؤروب معاینه ائتمه‌لییم.
– معاینه ائتمک لازم دئییل. بویلو دؤرد گوندور کی، دوغماق ایسته‌ییر. حتی دؤرد-بئش گون ده وقتی کئچیب. آنجاق سنه لازم اولان شئی‌لری سؤیله.
سوروشدوم:
– باشقا ماماچا بویلونو گؤروب‌مو؟
دئدی:
– یوخ! ماماچاسیز دوغاجاغینی گمان ائدیردیک، اما دونن بو نتیجه‌یه گلدیک کی، اؤزو تکلیکده دوغماغا قادر دئییل.
– بیر قدر قاینانمیش ایلیق سو، صابون، بیر کاسا ایلیق اَرینمیش یاغ، بیر قایچی و بیر ده تور چراغی ایسته‌ییرم. ایشیقلی فنر ده اولسا، اولار.
– بیز بونلارین هامیسینی حاضرلامیشیق.
– بس اوندا بویلونو گؤرمه‌ییمه اجازه وئرین.
کیشی‌لرین بیری قولومدان توتوب منی بیر طرفه چکه‌رک دئدی:
– باخ، گؤردویونو بیر یئرده سؤیله‌یرسن‌سه، باشینی کسه‌ریک.
دئدیم:
– مگر بویلونون کؤرپه‌سینی من دوغوزدورمایاجاغام؟
دئدی:
– هه، اما بو بویلونون عادی بویلو اولمادیغینی ایندی گؤره‌جکسن. اما بویلونون اوتاغینی ترک ائتدییین آندان، اونو گؤردویونو اونوداجاقسان.
– سیز یازیق و چاره‌سیز بیر قادینین باشینا نه بلا گتیرمک ایسته‌ییرسینیز؟ منیم بیر سؤزوم یوخدور. کؤرپه‌نی دوغوزدوروب گئتمک ایسته‌ییرم.
– ساغ اول سنی، آنلایان قادینسان!
او، قولومدان توتوب احتیاطلا باشقا اوتاغا آپاردی. اورادان دا بیر آیری اوتاغا کئچدیک.
– ایندی اؤزون بویلونو گؤره‌جکسن. کؤرپه دوغولان کیمی بیزی سسله گلک.
من هیرسله دئدیم:
– سیزجه کؤرپه‌نی گؤزوباغلی دوغوزدورمالییام؟
کیشی دئدی:
– آها، دوغرو دئییرسن، باغیشلا، اونوتدوم. آرخانی منه چئویر، دؤنوب منی گؤرمه‌یه حاقین یوخدور. گؤزونده‌کی دسمالی آچیب گئده‌جه‌یم. کیمسه سنه یاردیم ائتمه‌یه‌جک. سن کؤرپه‌نی دوغوزدوردوقدان سونرا بیزی چاغیر.
آرخامی اونا چئویردیم. کیشی گؤزومده‌کی دسمالی آچدیقدان سونرا قاپینی اؤرتوب گئتدی. اوتاقدا بیر شئی گؤرونموردو. تعجبلندیم. گؤزلریمی بیر قدر اوووشدوردوم. یوخسا، کیمسه منیمله ظارافات ائتمک ایسته‌ییردی، اونو بیلمک ایسته‌ییردیم. دووار یئنیجه هؤرولموشدو. چونکی هله یاش گؤرونوردو. دئیه‌سن، بیر گون قاباق تیکیلمیشدی. دووار پنجره‌نین قاباغینی باغلامیشدی. منه لازم اولان شئی‌لری قاپی آغزینا دوزموشدولر. اما بویلو هارادا ایدی؟ قارشی قاپیدان باشقا اوتاغا گیردیم. او اوتاقدا دا کیمسه یوخ ایدی. اوتاق بوش ایدی. بیرینجی اوتاق کیمی یئره حصیر دؤشنمیشدی. یئنه تعجبلندیم. به‌یم بورا مسجددیر؟ اما قارشیمداکی باشقا باغلی بیر اوتاقدان ایشیق گلیردی. یقین کی، بویلو اورادا اولمالی‌دیر. اورتا اوتاغیندا پنجره‌سینی دووارلا هؤروب گؤرونوشو کور ائتمیشدیلر. من اوّلکی اوتاغا قاییدیب فنرله بیرلیکده لازمی شئی‌لری گؤتوروب همین اوتاغا گئتدیم. ساکتجه اوتاغین قاپیسینی آچدیم. اول بیر شئی گؤرمه‌دیم. بویلونون باشقا اوتاقدا اولدوغونو دوشوندوم. بلکه ده بونلارین هامیسی کوبود بیر ظارافاتدان باشقا بیر شئی دئییل، دوشونجه‌سینه قاپیلدیم. وسایلی قاپی‌نین یانیندا یئره قویدوم. قاپینی باغلایارکن ایندییه قدر دویمادیغیم عفونت قوخوسونو حس ائتدیم. بلکه ده کؤرپه آنانین قارنیندا اؤلموشدور؟ اما یوخ! اؤلو کؤرپه‌نین قوخوسو بئله اولا بیلمز! غفیلدن بیر نفرین نفس سسینی ائشیتدیم. بو آدامین آرخاسی منه ایدی. کسیک-کسیک نفس آلیردی. اؤزو کیمسه‌یه محل قویمادان گوجه‌نیردی. یقین کی، بویلو کؤک اولدوغو اوچون کؤرپه‌نی دوغا بیلمیردی. بلکه ده کؤرپه بوغولموشدو. آرخادان ساکتجه سوروشدوم:
– چوخ آغریییر؟
هئچ بیر جواب ائشیتمه‌دیم. بیر قدر ایره‌‌لیله‌دیم. نفسین سسی گوجلو ایدی. عفونت قوخوسو داها دا چوخالیردی. سوالیمی تکرار ائتدیم. اونون یئکه باشی بیر پارچا ایله بوروندویوندن گؤرونموردو. ترپشیردی. چوخ یئکه و یومرو بیر باش ایدی. اولدوقجا آغیر حرکت ائدیردی. قاباغا، دالا و یئنه قاباغا-دالا حرکت ائدیردی. اما اوندان بیر سس چیخمیردی. بیر نئچه ثانیه‌دن سونرا باش حرکتسیز قالدی. ایره‌‌لیله‌دیییمه باخمایاراق بویلونون باشینی گؤرموردوم. مقنعه‌یه اوخشار بیر شئیله بویلونون باشینی باغلادیقدان سونرا، بیر رئزین ده بوینونا ساریمیشدیلار. مقنعه‌نین آلتیندان نفس آلماسی چوخ آغیر و چتین ایدی. اما یئکه‌پر و یونولمامیش گؤوده‌سی وار ایدی. دنیانین هئچ یئرینده بئله بیر هیکلده قادین تاپیلمازدی. بویلونو دوغوش وضعیتینده اوزاتمیشدیلار. بیر نازک پتو دا آیاق‌لاری اوزرینه سرمیشدیلر. عفونت قوخوسو بو پتونون آلتیندان گلیردی. اما بودلارین کؤک و اوزون اولدوغو آیدین ایدی. آیاق‌لاری پتونون آلتیندان باییرا چیخمیشدی. آیاق‌لار یئکه و شیشکین گؤرونوردو. یقین بویلو اصلا پهریز ساخلامادیغی اوچون بئله شیشمیش‌دیر. احتمال کی، بویلو وقتینده دوز چوخ یئمیشدی. قیچلاریندا هئچ بیر اینجه‌لیک یوخ ایدی. توپوق‌لاری چیرکدن کرمه باغلامیشدی. بو وارلیق او قدر دهشتلی ایدی کی، حتی اوندان قورخدوغومو دا اونوتموشدوم. الیمی اوزادیب بوینوندان رئزینی چیخاریب و باشیندان مقنعه‌نی گؤتورمک ایسته‌یرکن، اعتراضلا باشینی مقنعه‌نین آلتیندا ترپتدی. مقنعه‌نین آلتیندا دیشلرینی قیجادی. سونرا ایسه زاریماغا باشلادی. زاریلتی سسی بوغازی‌نین درین‌لیییندن چیخیردی. بو سسین جنسیتی بیلینمیردی. باشلانغیجدا بیر دیش آغریسی زاریلتی‌سینا بنزه‌ییردی. سونرادان باغیرماغا، گوجنمه‌یه و نفس آلماغا باشلادی. باخمایاراق کی، ایندییه قدر هئچ بیر بویلودا بئله چیغیرتی ائشیتمه‌میشدیم، اونا اوره‌ییم یانیب یازیغیم گلدی. قابا هیکلی اولان بو وارلیق، بئلی و یا قیچلاری سینمیش بیر حیوان کیمی باغیریردی. اما باغیرتی‌سیندا قادین سسینه بنزرلیک یوخ ایدی. مقنعه آلتیندا پوسقودا یاتمیش حیوان کیمی ایدی. باغیرتیسی هیرسلنمیش حیوان سسینه اوخشاییردی. فنرین ایشیغیندا پتونو گؤتوروب اونو معاینه ائتمک ایسته‌یرکن هیرسله هر ایکی قیچینی ترپتدی. دیزلری گؤروندو. ال‌لرینی پتونون آلتیندان چیخاریب قورخوتماق اوچون یومروغونو دویونله‌دی. سانکی دوروب منی دؤیمک ایسته‌ییردی. دلی، اورک‌کئچمه‌سی اولان بویلولاری چوخ گؤرموشدوم. یاخشی بیلیردیم کی، هئچ نه دوغوش کیمی بیر قادینی روحی جهتدن آلت-اوست ائله‌میر. قادین دنیانین ان ماراقلی وارلیغی اولدوغونو دا آنلامیشدیم. چونکی اونون بد‌نی بیر حالتدن باشقا حالته چئوریلیر.
تحصیل آلمیش ماماچادان ائشیتمیشدیم کی، قادین آی‌باشی اولاندان اون دؤرد گون سونرا یومورتا قویور، اوندا قیزدیرما یوکسلیر و غفیلدن آشاغی یئنیر. یئنه ده سرعتله قادین آی‌باشینا ساری گئدیر. او هر دوققوز آی و نئچه گوندن بیر اوشاق دوغا بیلر. قانی سوده و سودو ایسه قانا چئوریلیر. قادین بویلولوغو غریبه بیر پروسه‌دیر. قادین بو ایشی ایله بد‌نینه یارادیجیلیق امکانی وئرمکله یاناشی، اونو بد‌نی‌نین بیر پارچاسی ائدیر و سونرا یارادیر. قادین یارانیشین کئفلیسی‌دیر. آنام دئیردی، بوتون علم‌لر قادین بد‌نی اوزرینده تجربه اولونور. آنام بو مسئله‌لری نئجه بیلیردی؟
بیر دفعه دئدی، بویلو اولارکن دنیانی تجربه ائله‌میش اولورسان. اما هئچ نه بویلولوق کیمی اولمور. ایچری سیزینتی، قادینی دلی ائدیر. سونرا کؤرپه دنیایا گلیر. بونون بیر شکنجه اولدوغو دوغرودور. قادین‌لار وار کی، اوشاق دوغماغی کیشی‌لر ایله یاتماقدان داها لذتلی آن ساییرلار. بیر معلوم اولمایان وارلیق انسانین بد‌نینی ییرتاراق باییرا چیخیر. دوغوش آنیندا بعضی قادین دا گؤرموشم کی، باغیریر و دئییر: نه یاخشی‌دیر! آی الله نه یاخشی‌دیر! نئجه لذتلی‌دیر! هئچ نه بوندان داها لذتلی اولا بیلمز! آی الله اجازه وئر بو لذت دواملی اولسون! سونرا کؤرپه دنیایا گلدیکده ائله بیر راحاتلیق یارانیر کی، اونو هئچ نه ایله دَییشمک اولماز. سانکی فیرتینالی دنیز ساکتله‌شیر. قادین بد‌نی استراحت ائدیر. اما کیشی بد‌نی ایسه بو دَییشیک‌لردن، تجربه‌لردن، لذت‌لردن و آغری‌لاردان محروم‌دور. اونا گؤره ده قادین داها دؤزوملودور. بویلو بو درد و لذت‌لری تجربه ائله‌سین دئیه، مین بیر حیله‌یه ال آتیردیم.
بویلونون اوستونه قیشقیردیم:
– باخ، بیلمیرم کیمسن! گئجه یاریسی تهدید و قورخو ایله بو سویوقدا آتین بئلینده مین بیر عذاب ایله منی گؤزوباغلی بورا گتیریب‌لر. هامییا نفرت ائدیر‌م و بو ایشد‌ن بئزمیشم. منیم بیر وظیفه‌م وار. کؤرپه دوغولمایینجا بویلونو بوراخمارام. سن اگر بویلوسانسا قوی کؤرپه‌نی دوغوزدوروم. یوخ، اگر بویلو دئییلسنسه، اؤز ایشیمین آردینجا گئدیم.
آیاغا قالخیب یولا دوشدوم. هله ده قیشقیریردیم. اعتراضلی باغیرتی ایدی. قاپینی آچیب باشقا اوتاغا گیردیم. قاپینی آچماق ایسته‌دیکده آرخادان قیفیللی اولدوغونو حس ائتدیم. یومروغومو دووارا چیرپدیم. دووارین آرخاسیندان بیر سس دئدی:
– کؤرپه دنیایا گلدی‌می؟
– یوخ! گلمه‌ییب. بو بویلو دوغماق ایسته‌میر. حتی اونا الیمی وورماغا دا اجازه وئرمیر. اگر اونا ال وورماسام، اوندا کؤرپه‌نی نئجه دوغوزدوراجاغام؟!
آرخاداکی سس دئدی:
– کؤرپه‌نی دوغوزدورمادان بورادان چیخا بیلمزسن. آنلادین؟
