چوخ دا کی کهکشان‌لار
بیزیم ائودن بیرآز بؤیوکدور
ایسته‌سن بونا دا غالب گله بیله‌ریک:
ساعات یامان نامرد اولار
تلس
قاباقدا مین بیر مئشه
مین بیر اولدوزلو گئجه
دویونجا کتاب وار
خیلی یول.
ال اوزاد مئیوه در،
بیرآز سس سال
یالاندان اولسا دا،
بیر شئیی سیندیر،
ائوین ائولییین قایتار اؤزونه،
ائشیت یارپاغی،
کهکشان اول
ساده کهکشان.
آغاجین دیبینه تی ان تی قویلاماق
آرا ووروشدوروب
تورپاغی بولودا دوشمان ائله‌مک
چتین بیر ایش دئییل
باجارسان گیلاناری دوشون
گیله-گیله جیرتدان اولان
شکیلچی ناری،
سؤزجوک‌لرین محله‌سیندن
پنجره تمناسیلا یولا دوشن
ایپک دویغولاری.
منه یئمک دئییل
گئییم دئییل
بیر استکان چایین اولسا یئتر.
۱۴۰۳/۰۸/۱۲
